Neh. 3 - BUKO SIPUNENAN

Pasiperukat Irip laggai Jerusalem

¹ Nene te segeakenen pagalaiat kipa enungannia itupaeru irip laggai Jerusalem. Elyasib Imam Sabeu samba paaleiakenennia masigalai minca Matatbaliu Gugurukat Biribiri. Ottotrakerangan matat baliunia samba punenirangannia addeat Tuhan. Paerurangan samba punenirangan irip laggai teret ka pujagoat Seratus samba ka pujagoat Hananeel.

² Kepei babara tai Imam, sirimanua nene leu masipaeru irip laggai pasamba matatbaliu gugurukat samba pujagoatnia ka bagat patunan kele kise: Tai Jeriko, Zakur togat Imri masiriuriuake masigalai ka bebenia.

³ Muntogat Senaa masigalai Matatbaliu Gugurukat Iba pasamba loina simuine, matatbaliu baut samba sangamberi lekkeratnia.

⁴ Meremot togat Uria masiriuriuake masigalai ka bebenia. Musulam togat Berekhya masiriuriuake masigalai ka bebenia. Zadok togat Baana masiriuriuake masigalai ka bebenia.

⁵ Sipulaggai ka kota Tekoa Sikebbukat ka laggai nenda ta'raoba masigalaiake galajet simabesi galai sikau katubutda.

⁶ Joyada togat Paseah samba Mesulam togat Besoja masigalai Matatbaliu Gugurukat Jesyana pasamba loina simuine, Matatbaliu, lelekri samba sangamberi lekkeratnia.

⁷ Melatiah sibara ka Gibeon samba Jadon sibara ka Meronot. Tai Gibeon samba tai Mizpa: masiriuriuake masigalai patunan ka bebenia teret ka uma purimataat gubernur Efrat ka saigit kabelekat sulu.

⁸ Uziel, sara siagai masipaddai mas, togat Harhaya. Hanaya, sara sipasigagalai tula simasingin masiriuriuake masigalai patunan teret irip laggai Lebar.

⁹ Refaya togat Hur, sibakkat sangarubeiat tobbou Jerusalem, masiriuriuake masigalai ka bebenia.

¹⁰ Jedaya togat Harumaf masiriuriuake masigalai patunan ka bebet lalepnia. Hatus togat Hasabneya masiriuriuake ka bebenia.

¹¹ Melkia togat Hariam samba Hasub togat Pahat-Moab masigalai patunan Irip laggai samba pujagoat supuobengan.

¹² Salum togat Halohesh, sibakkat sangarubeiat kupkumen Jerusalem masigalai patunan irip laggai. Raropmakenia tatogania tainanalep.

¹³ Hanum samba sipulalaggai ka Zanoah masigalai Matatbaliu Gugurukat Lembah pasamba matatbaliu, baut, samba lekkeratnia. Ia leu et irip laggai nantania sangaribu eto teret Matatbaliu Gugurukat Sampah.

¹⁴ Malkia togat Rekhab, sipasibakkati tobbou Bat-Kerem masigalai Matatbaliu Gugurukat Sampah pasamba matatbaliu, baut samba lekkeratnia.

¹⁵ Salum togat Kolhoze, sibakkat tobbou Mizpa masigalai Matatbaliu Gugurukat Bubuakat pasamba tobat, matatbaliu, baut samba lekkeratnia. Ia leu et irip kolam Selah ka leggret lalep purimataat teret takat orat gogorosonan barania ka laggai David.

¹⁶ Nehemia togat Azbuk, sibakkat sangarubaiat tobbou Bet-Zur masigalai irip laggai teret ka ratei David, kolam sigalai samba kudduadda tai saladdu.

Tai Lewi siooi masigalai irip laggai

¹⁷ Piga ngarubeiat pa' irip laggai araperu minca tai Lewi ka bagat patunan nene: Rehum togat Bani masigalai patunan irip laggai. Hasabia, sibakkat sangarubeiat tobbou Kehila masigalai patunan irip laggai ka bebet kupkumennia.

¹⁸ Binui togat Henadad, sibakkat sangarubeiat kupkumen laggai Kehila masigalai patunan irip laggai.

¹⁹ Ezer togat Jesua, sibakkat Mizpa masigalai irip ka taiming enungan ka matat uma kudduat bebetuet teret katubilukat irip laggai.

²⁰ Barukh togat Zabai masigalai irip laggai barania ka sudut enungan teret matatbaliu lalep Imam sabeu Elyasib.

²¹ Meremot togat Uria samba punuteteu Hakos masigalai irip laggai barania ka matatbaliu lalep Elyasip teret ka tu'tut lalep nenda.

Tai Imam siooi masigalai irip

²² Piga ngarubeiat pa' irip laggai arapaeru minca tai imam ka bagat patunan nene tai imam simalegre ka Jerusalem.

²³ Benjamin samba Hasub masigalai irip laggai ka matat lalepdra. Azaryah togat Maaseya togat Anaya masigalai irip laggai ka bebet lalepnia.

²⁴ Binui togat Henaded masigalai irip laggai barania ka lalep Azaryah teret ka taiming irip laggai.

²⁵ Palal togat Uzai masigalai irip laggai ka taiming irip laggai samba pujagoat lalep purimataat ka rubeiat ka pata ka bebet ulau pujagoat.

²⁶ Pedaya togat Paros masigalai irip laggai teret ka matat baliu gugurukat oinan ka isit kabelaiat sulu samba menara siboiki pujagoat ka Uman Tuhan. (Ta' mareunan barania sedda ai laggai sipuoni Ofel kudduatdra sipugagalai Uman Tuhan).

Sipugagalai sabagei

²⁷ Piga ngarubeiat pa' irip laggai arapaeru minca sirimanua nene ka bagat patunan kele kise: Sipulalaggai ka Tekoa masigalai Irip laggai barania ka matat menara pujagoat Uman Tuhan teret irip ka bebet kupkumen laggai Ofel.

²⁸ Tai Imam sikukuddu ka bebet Matatbaliu Gugurukat Kuda masigalai Irip laggai sipamamatai ka senen lalepdra sibara ka gugurukat nenda teret ka isit ka bare'.

²⁹ Zadok togat Imer masigalai Irip laggai sipamamatai ka lalepnia. Semaya togat Sekhanya, sipasijajago matatbaliu gugurukat ka kabelaiat sulu masigalai irip laggai sipamamatai ka lalepnia.

³⁰ Hanaya togat Selemya samba Hanun togat Zalaf si ka enem. Mesulam togat Berekhya masigalai patunan irip laggai sipamamatai ka lalepnia.

³¹ Malkia, sara sirimanua siagai mugalai mas masigalai Irip laggai teret ka kudduatdra sipugagalai Uman Tuhan samba lalepdra sipasisasakiake ka matatbaliu gugurukat Mifkat samba teret ka bebet bili' ka pata ka taiming irip laggai isit sikalaut bare'.

³² Sia sipugagalai mas samba sipasisasakiake masigalai ka rubeiat irip laggai pangampulat, barania ka bili ka pata ka taiming irip teret ka matatbaliu gugurukat biribiri.