Neh. 2 - BUKO SIPUNENAN

Nehemia mei ka Jerusalem

¹ Ka sara gogoi, epat ngalaggo ka sibabara iate ka laggo Nisan, ka teteret ai mukokom Rimata Artahsasta, labbeiakekungan anggur ka tubunia sialei pumataat simareureu baga, pumataat kele ka gogoi nenda ta' pei anai akugalaiake ka tubunia.

² Lulut nenda parere'nangan, “Angoi tuitco ekeu ta mangka bagam tapoi ta' anai simabesi nupaatu” Bulat ai te bagei nupaatu.” Tuge'gekungan,

³ lepa alegikungannia, “Murimanua le Tuanku teret buruburu! Kipa ta' kupurereureu baga, ke'bai laggai kudduat rateira taikebbukatku, kineneiget legeian le siragatat samba matatbaliu gugurukatnia amakataian ai labonia obengan.

⁴ Parere'nangan Rimata, “Oto apa siobat bagam besiakenennu?” Panindoukungan ka bagat patuatku ka Taikamanua sibakkat manua,

⁵ lepa panibokungan ka matat rimata, “Ke' bai pasese ka bagat Tuan, samba nuoba masiarepi panindogat paguguletnu, koiniake le aku ka tobbou Jehuda bule tugalai minca laggai kudduat rateira taikebbukatku.”

⁶ Iageti rimata sipukuddu ka bebet sinanalepnia, masiarepi panindogatku. Parere'akenangan leu si rimata piga burunia kukuddu sedda samba pigamoi kutoili, iageti paagaikungan ka tubunia gogoi sinetreakenenku.

⁷ Lepa geti tiddoukungan surat kaunenku ka tai gubernur ka Provinsi Efrat saigit ka kabelekat sulu, bule raropmake imariuriu puenungananku teret ka Jehuda.

⁸ Ai leu bagei surat akutiddou kaunenku kai Asaf, sipasikeli leleu purimataat, bule ipatarek loina pakeiet masigalai matatbaliu gugurukat irip laggai sisakkeri Uman Tuhan, kisedda leu pakeiet addeat masigalai irip laggai samba lalep kuddujietku geti. Isutnake le rimata sangamberi panindogatku nenda kalulut Taikamanua masiropmake aku.

⁹ Pasamba piga pa' utet saladdu saladdu samba Saladdu sipukukuro, ka parentat rimata tutrangan aku, tuitui aku ka Efrat saigit kabelekat sulu. Ka tubudda tai Gubernur sedda te akukau surat rimata nenda.

¹⁰ Tapoi ka teteret Sanbalat, tai Bat-Horon, samba si Tobia, sara siabeu tiboi tubu sibara ka Amon, masiarep kaooiku addeat masiropmake tai Israel, ibailiu le sibaraake asat bagadra.

¹¹ Sege aku ka Jerusalem, lepa puarikkungan telu ngagogoi.

¹² Ujunia nenda ta'aku poiliat ka tubut kasei pa', aakena Taikamanua seset patuat katubukku addeat masigalai minca laggai Jerusalem. Mancepnia ka talagat soibo pei le suru aku sogaikungan piga pa' saalei kuei kai ka ulau irip laggai. Ta'anai akuambit kai tarimeu bagei, sarat kaliddei sikudduijiku le'.

¹³ Magepgep pei le, kaddiuakemaian laggai masienungi Matatbaliu Gugurukat Lembah ka saigit kabelekat sulu. Kuailiake' kai ka isit ka kaiaman ka Matatbaliu Gugurukat Sampah, masienungi Bubuakat Naga. Ka bagat puenunganan nenda pulelekkungan simakakatai ka irip laggai samba itcokungan leu et sangamberi matatbaliu gugurukat sapru ailabonia obengan.

¹⁴ Lepa ka isit kabelaiat sulu laggai riuriuakemaian leu ka isit ka bare, ka matat gugurukat Oinan Sipukikitcit samba uggangan Rimata. Tapoi sedda ta'anai enungan kalidei sikudduijiku nenda, kalulut maigi poi siragatat.

¹⁵ Oto, gorosot kai ka Su'sut Kidron samba soibo nenda leu et riuriuake puenunganan pasamba masilelekngake irip laggai. Lepa nenda, tusoipmaian samba toili ka laggai ka enungan Matatbaliu Gugurukat Lembah.

¹⁶ Beri sara sia sikebbukat laggai siagai kaipa aku ei samba aponia isiakenenku. Aipoi teret oggak nenda ta' pei akupoiliat apapa katubutda sabangsaku, ka tai Imam samba katubutda sikebbukat laggai, ele katubutda tai pegawai, samba kasei pa siooi masipaeru laggai Jerusalem.

¹⁷ Tapoi lepa kuakungan ka tubdra, “Itco pei kam paoreat ka tubutta! Jerusalem legeina le siragatat samba sangamberi matatbaliu gugurukatnia sapru ailabonia obengan. Konan kam tapaeru kam minca sangamberi irip laggai Jerusalem bule bui'an rapaloloi sita minca.”

¹⁸ Lepa poiliatkungan katubutda kipa airopmake aku Taikamanua samba aponia sikuat Rimata ka tubuku. Alegirangan, “Konan kam tatadaake masigalai!” Lepa patarekrangan tubudra addeat masitaddaake mugalai.

¹⁹ Siisiakenenmai nenda aiagaian si Sanbalat, Tobia samba Gesyem, tai Arab, puga'garangan samba gegeirangan kai. Kuarangan, “Aponia nugagalai kam” Nuoba le kam paagra ka tubut rimata?”

²⁰ Alegikungannia, “Taikamanua sipuririmata ka manua Nia le masipariuriu galajetmai. Kai poi iate paguguletnia samba kutataddaakean le kai mugalai. Aipoi ka kam ta'anai pubabakkatmui ka Jerusalem. Ke'bai ratiboi sirimanua pagalaiat Jerusalem, beri kuadra onimui.”