Neh. 13 - BUKO SIPUNENAN

Israel masipasaraake tubu ka siooiake

¹ Ka teteret aitubasaake ukum Mose ka tubutdra sapaamian, tusese katukolobat nene: Tai Amon samba tai Moab bui raruruake tubudra ka paamian Taikamanua,

² aipoi ka teteret bangsa Israel ai sia ka puenunganan arabela ka Misir, ka rua bangsa nenda ta'arakau kan samba lo katubut bangsa Israel. Arabulagani le si Bileam bule ipateleiji bangsa Israel, tapoi Taikamanuanta aibailokngake le telei nenda bailiu panukanan.

³ Ka teteret araarep nenda bangsa Israel pasaraakerangan sangamberi sia siooiake sibara ka talagadra tai Israel.

Pasibaugat sigalaiakenen Nehemia

⁴ Kepei iaili tetere nenda Imam Elyasib siuddeatnakenen masipasikeli bibilet bilit pugalai ka Uman Tuhan, ai patabbaratdra simaeru pasamba si Tobia.

⁵ Elyasib masikau kai Tobia sara bili' sabeu, siripokatnia bili' nenda tukokoiake pangoirikat panguruat gandum, kemeyan, pugalai pakeiet ka uman Tuhan, panguruat ka tai Imam, perpuluhan gandum anggur samba tulat zaitun turubeiake ka tai Lewi, ka sipumumusik samba ka sipasijajago gugurukat uman Tuhan.

⁶ Ka teteret aipuaili nenda, ta'anai aku ka Jerusalem, aipoi ka rura telu pulurua puparentaat Artahsasta, rimata Babilonia, amei aku masisegeake ka tubut rimata. Iageti piga ngagogoi pa' obaakenangan aku,

⁷ toili ka Jerusalem. Kele akusege sene, tuge'gekungan akuagai si Elyasib aikauan kai Tobia sara bili' Uman Tuhan.

⁸ Pugolukungan simakope samba paribbaikungan sangamberi bibilet Tobia ka uja.

⁹ Lepa koiniakekungan bule tubaraake enung galaiakenen punen pasilinat sangamberi bili' nenda. Pasat nenda toiliakekungan sedda sengamberi panguruat gandum samba kemeyan samba leu pugalai Uman Tuhan.

¹⁰ Ai leu bagei, ailikungan sipumumusik samba tai Lewi arakaddiuakean Jerusalem samba senenda toili ka monenda, kalulut sapaamian ta'arasutnake purimanuaiatdra.

¹¹ Iageti kuteka sikebbukat laggai araobaake poi Uman Tuhan imakatai lepa sogaikungan minca tai Lewi samba sipumumusik nenda samba kukoiniake sia rapugalai minca.

¹² Lepa sangamberi tai Israel rataddaake minca masikau perpuluhan gandum, anggur samba tula Zaitun samba tuabitnia ka bilit kudduat balut komen.

¹³ Ka tubudra nene kukau galajet masipasikeli bili' kudduat balut nenda: Imam Salemya, Zadok sara sirimanua siagai ukum samba si Pedaya sara tai Lewi. Hanan togat Zakur samba punuteteu Matanya kukau galajet masiropmake sia. Kuagai sirimanua nenda momoi tukatonemi samba rapasikeli geti parubeiat komen nenda ka tubut sangamberi saaleinia mugalai ka enungan ka simaroipo.

¹⁴ Oi Taikamanuangku repdep le sangamberi sigalai akenenku addeat Umam samba pupasikelanannia.

¹⁵ Ka teteret nenda gogoi Sabat ai akuitco piga pa tai Jehuda masipiot anggur. Ai sirimanua sabagei sipasiabbit gandum, anggur, buat anggur, buat sileu samba bibilet bagei ka teitei Kalideira samba ambitdrangannia ka Jerusalem. Kukera le sia masisakiake ka Jerusalaem.

¹⁶ Ai piga pa' tai Tirus sipukukuddu ka Jerusalem masiambit iba samba senengamata pusakiet ka Jerusalem ka gogoi Sabat sibailiu sakiakenen katubutda tai Jehudi.

¹⁷ Iageti golukungan? siuteake Jehuda samba kuakungan, “Ta'pa' nuagai kam, anugalaian kam jo kalulut masipalolit gogoi Sabat?”

¹⁸ Lulut jo kele nene te ai ukum Taikamanua taikebbukatta samba iparagat laggai nene. Nuoba pa' kam kineneiget masituppai golut Taikamanua ka tai Israel pa samba masipalolit gogoi Sabat?”

¹⁹ Kalulut nenda parentaakekungan bule' kapanandat senen gogoi Sabat, iate gogoi Jumat sangamberi matatbaliu gugurukat laggai atuluplupmakean teret ka soibokat, samba ta momoi tubuka ke' ta'pei atusabau gogoi Sabat, ka gogoi sabtu sinoibo. Kukudduake piga pa' pakoinienku ka matatbaliu gugurukat nenda masipasikeli bule ka gogoi Sabat ta anai pusakiet tuaambit ka bagat laggai.

²⁰ Tapoi ai leu piga pa' sipasisasakiake pusakiet sipugogoi ka teitei irip laggai ka gogoi Jumat sinoibo.

²¹ Kuakungan kamatadda, “Siboboile nupasingena kam teret simanceman sedda. Pasikeli, ke' nugalaiake kam minca, kuukumake geti kam!” Ka teteret nenda ta'an amoi sia minca ka gogoi Sabat.

²² Lepa koiniakekungan tai Lewi ragalai punen pasilinat tubu samba masijago sangamberi matatbaliu gugurukat addeat masipasikeli bule sangamberi sirimanua masisuru'gogoi Sabat. Panindoukungan, “Oi Taikamanua, repdep le aku kalulut nenda leu et samba pununtuki aku baga siripot beunan nuntut bagam.”

²³ Ka teteret nenda akuitco leu, maigi tai Jehudi amutalimouan pasamba tainanalep sibara ka bangsa Asdod, Amon samba Moab.

²⁴ Sabagei tatogadda ta raagai ngagan Jehuda sarat ngangan Asdod ele ngangan bagei le.

²⁵ Kuteka'samba kupateleiji le sia. Ai kupaboboki samba kurakkut alaira. Lepa kukoiniake sia musuppa ka onin Taikamanua bule sia samba tatoga ta'an geti mutatalimou sia minca ka bangsa bagei.

²⁶ Kuakungan, “Ta' pa' jo nene leu sigalai Rimata Salomo? Ta' anai rimata ka polak nene siabeu ka sia. Taikamanua sipununtukinia baga samba bailiuakenangannia rimata ka sangalio Israel. Kenenen kasedda arapusumingannia tai nanalep bangsa bagei mugalai jo.

²⁷ Bulat makatai le sigalaimui! Maro' le bagamui masioddoi Taikamanua masitalimouake tainanalep sibara ka bangsa bagei!”

²⁸ Joyada iate togat Imam Sabeu Elyasib. Tapoi sara katalagat tatogat Joyada ibailiu talikut Sanbalat sibara ka laggai Bet-Horon. Kalulut nenda tuituiakekungan si Joyada ka Jerusalem.

²⁹ Panindoukungan, “Oi Takamanuangku, repdep le kipa sangamberi sirimanua nenda rapalolit onin imam samba palelenganNu pasamba tai imam samba tai Lewi!”

³⁰ Kise te kupalina bangsa Israel ka sangamberi sitaiagaietdra. Teuakekungan aturan ka tai imam samba tai Lewi, bailiu senenda ai galaiakenenda.

³¹ Kupagaba leu et bule ka sara tetere, loina obengan addeat panguruat buluakenen momoi tutarekngake samba sapaamian momoi raambit panguruat buat mone siboiki. Kalepakatnia manindou aku, “Taikamanuangku repdep le sangamberinia nene samba panukani le aku.”