Nah. 3 - BUKO SIPUNENAN

¹ Paan te kakam laggai nene! laggai simasun patajuat samba pamamatei, simasun leu bibilet siraurau.

² Arepmake' kam nau liliso samba ipujuluk roda, kopkop ipabalau kuro' samba iputangat kereta pasaggak.

³ Saladru sipukukuro' bulat maatjak tubutdra masisaggangi, lanjau sipubibila' samba sosoat sipukirisau. Sirimanua simamatei ta' momoi tuadde, tolatdra apasaksakngan, sibailiu katusoksokngan sirimanua.

⁴ Laggai Niniwe tuukumake kele' sara sipaelet, laingen tubunia bulat maala' bagatta, maigingan bangsa ai gauti, samba musum igalai pualakat baga.

⁵ Kuanangan Tuhan Sipulugege, Ale Niniwe, Kuoreian le' ekeu! Golokkungan komaknu kamatadda tai bangsa bailiu itcorangan keikeijetnu.

⁶ Kubailiuake te ekeu bibilet kasitsitakenen, Kubaijuk ekeu palolitlolit; Kubailiuake' ekeu ibbungen.

⁷ Sipasiitco' ekeu raareuake' tubutdra samba kuarangan, “Niniwe legeian le siragatat! Kasei pa' sioba mureureu baga pasambania? Ta'anai sia sioba' masikau pusuibiat katubunia.

⁸ Ale Niniwe, kipa iooi ekeu' peile' maeru ka Tebe inan laggai Misir? Tebe leu et kudduatnia ka be'bet bagat oinan sipasikekekrenia kele' irip laggai. Oo, bagat oinan Nil nenda te irip pasiddonannia.

⁹ Tebe masiparenta Sudan samba Misir, samba gegenia sita'puteterat. Libia samba Put iate paaleiakenennia.

¹⁰ Kenanen bai kisedda, sipulalaggai ka Tebe araukummake' sia samba ambitrangan sia ka pasiribbaiat. Ka sangamberi parubaat enungan sedda rapabo'boki tatogadra teret matei. Palenggurangan saute'ra rantei samba parubeirangan sia katalagatdra sipasitatangsi sia.

¹¹ Ale Niniwe, ekeu leuet ikakalapui geti kalulut puineng. Ekeu leuet masibesiake' geti bela ka saggaknu.

¹² Sangamberi irip laggaimui nenda kele'an le' loinat sileu simaigi bua simara'. Ke'bai tujiujiu loina'nia nenda buania bele ka bagat ngangandra sirimanua sioba' masikomnia.

¹³ Sangamberi saladdrumui saggo kele sinanalep samba laggaimui tata' puroronnia masimattai saggak. Obengan te geti masikasakake' lekkerat matatbaliu gugurukatmui.

¹⁴ Aisu' le oinan panarengan ujut ragoilik ekeu, samba paron le sangamberi irip laggaimui! Paperaki le polak ottot imalotte bailiu pasigalai batu bata samba patareknungan pugalainia.

¹⁵ Apa le nugalai, bulat sarat musisiboboi te'. Aipoi sarat bulat ilalabo te ekeu teret tata' ele matei ka bagat pasaggangan. Tatata' le ekeu kele' buat siureman ipakominia sit. Amakakrangan ekeu kele sit!

¹⁶ Sipasisasakiake ka laggaimui igitdra sisaliu igit panyanyat ka manua! Tapoi kineneiget tata' sia, kele sit ikebbakake' kappo'nia ituburut lepa' pepe.

¹⁷ Sia sabeu tiboi tubu samba saute'mui kele'an le mungkuat sit sipukukunem ka irip laggai kateteret simaleppet. Tapoi ke' abelangan sulu burut sia ramapepe. Beringan sara sirimanua siagai kaipa araei.

¹⁸ Ale Rimata Asyur! tai gubernurmui amateian sia, samba tai bupatimui ailaulauan sia teret buruburu. Pasaragainangan sia sikudduiji laggaimui ka leleu, samba berisara sirimanua momoi masitoiliake' sia minca'.

¹⁹ Sikirinan katubumui ta'momoi tulaggek, samba siorangan katubumui ta'momoi tualeake. Sangamberi sirimanua sipasiarep katuareman katukataikatnu mupokpok angkat bagadra. Aipoi sangamberi sirimanua amangorikngan kalulut pukakatainu sita'anai kalepakat.