Nah. 1 - BUKO SIPUNENAN

¹ Nene te sitoneakenen Taikamanua pagalaiat laggai Niniwe. Patonekat nenda, patoilanangan patonekat nenda katubut Nahum, sibara ka Elkos kapasiitco'.

Golut Tuhan ka tai Niniwe

² Tuhan Taikamanua ta'ioba ibara sitakainia, bulat tuukum le sirimanua sisagganginia. Ka kopet goluNia, siliakenangan besit patuatNia katubutdra.

³ Kirenangan si Tuhan ta' maruei ipugolu tapoi bulat Nia leu et simagege bailiu kasei sigalai jo ta' ibebelaake' sia ka ukumNia. Kaipa ipuenung si Tuhan sedda bara talabari, kasiperakatNia abu bailiu tanai rusa.

⁴ Ase'akenangan koat samba garakngakenanganNia, kisedda leuet sangamberi bagat oinan garak leleu Karmel samba su'sut Basan ibailiu magarak malajunangan leu sangamberi ogo' ka Libanon.

⁵ Sangamberi leleu mugeret tubu ka mataNia; samba sangamberinia maanau. Ke' moi si Tuhan, pungeungeunangan polak, samba pugeretnangan tubutdra sangamberi sipulalaggai.

⁶ Kasei pa' momoi masiomake ke' mugolu si Tuhan? Kasei pa siooi bela ka golu Nia? Lippatakenangan oloi goluNia gatca bukku bailiu abu kamataNia.

⁷ Maeru le si Tuhan, Ikunemi le paamianNia ka teteret ai sia ka bagat okkip. Ijago le sia sipukunem ka tubuNia.

⁸ Kele eba sabeu ipasikuilu sappruakenangan saggakNia. Sia simagege sipasisasaggangiNia bo'bonangan sia kamateiat teret tata.

⁹ Kenanen apapa' isiat galaiakenennu masisaggangi si Tuhan, bulat ta'te muririuriu. Ta' isisiliake' golut bagaNia, ta' mururua ngaminca' katubut saggakNia.

¹⁰ Tulabo' le' ekeu geti kele loinat bera' siperakat simagarak, kele parou simarui sipatotobbit.

¹¹ Sibara ka tubum, ale Niniwe, abarangan sara sirimanua siisiake' sikatai. Igalai le' isiat masisaggangi si Tuhan.

¹² Iageti kuanangan si Tuhan ka pamianNia tai Israel, “Kenanen tai Asyur nenda maron samba maigi sia, tapoi tuparagat te geti sia teret tata'. Ale kam sabangsaKu, akubailiuake'an kam sipangongorik, tapoi ta'an te Kugagalaiake' minca'.

¹³ Kineneiget Kukakappluake'an le pugegeatdra tai Asyur ka kam, samba Kutatakkiakean le rantei siappra kam.”

¹⁴ Nene' te siteuakenen Tuhan pagalaiat bangsa Asyur, “Ta'an babara geti reddenandra siriuriuake' bangsadra. Tularat buluijietdra ka bagat uman taikamanuandra Kupakakatai te. Purateiatdra tai Asyur aian Kupapatatarek, aipoi ta'an mateu rapurimanua.”

¹⁵ Itco pei kam, sara sikoiniakenen sienungi sangamberi leleu, sipasiabbit katuareman simaeru, iate tiboiet kamanangan. Ale kam tai Jehuda, punenake' kam punen sabeumui samba sunake kam palelenganmui Taikamanua. Laggaimui ta'an rapaneneiinei sirimanua sikatai. Atusubuake'an sia.