Mrk. 9 - BUKO SIPUNENAN

¹ Kuanangan minca ka matada, “Kukua nia ka matamui: Ai piga pa sipuririo se tapei mamatei sia araitcoan Purimataat Taikamanua ioi ka bagat gege.”

Pulatsanan Jesus ka leleu

² Pasat enem ngagogoi ambitnangan Jesus si Petrus, si Jakobus samba si Johanes manatara ka leleu simabuak sarada. Ia geti silinangan tubunia Jesus ka matada,

³ bulau leppeinia kirisau lepa. Ta anai kasei pa sipananaptap ka polak nene siagai masibulauake kele bulau nene.

⁴ Lepa itcorangan si Elia samba si Mose airapatitiboake Jesus.

⁵ Kuanangan ka matat Jesus si Petrus, “Pate eru takuddu sene Guru. Ai leu kugalai kai telu sapou: sara kekeu, sara kai Mose, sara kai Elia.”

⁶ Tapoi ta iagai apa sikuania nene, aipoi ai le sia maloloto.

⁷ Ia geti kuneminangan sia tanairusa, maarepnangan nganga sibara ka tanaisusa masikua, “Nene te Togaku, kilibet bagaku, reddet kam ngangania.”

⁸ Paingorangan matada raitco ka bebera, ta anai kasei pa sabagei araitco, sarat Jesus le.

⁹ Ia geti ai sia tugogorosot barada ka leleu, paneineinangan sia Jesus bui rapoiliat nia ka kasei pa siitcora nenda, ke tapei tusuru Togatsirimanua ka simamatei.

¹⁰ Siddonirangan ngangania, tapoi sia pasasambada paise sia apa katukolobatnia “tusuru ka simamatei.”

¹¹ Lepa nounourangan nia sipasiuluinia kuarangan, “Kipa ne rakukua siagaisurat, buita moi boiki si Elia?”

¹² Aleginangan nia Jesus, “Kirenangan momoi boiki si Elia masipaeru sangamberinia. Tapoi kipa kele sitususurat pagalaiat Togatsirimanua buita iorik maigi paoreat samba rapaloloi nia?

¹³ Kukua nia ka matamui: Amoian nia si Elia, tapoi siobat bagada le aragalai ka tubunia, kele sitususurat ka Surat Sipunenan pagalaiat tubunia.”

Ialeake sara toga pinasaileu sanitu Jesus

¹⁴ Kele aratoili raei ka sipasiului sabagei, itcorangan maigi sirimanua sigoilik sia samba siagaisurat ai sia paise sambada sipasiului Jesus.

¹⁵ Kele araitco Jesus, tugegerangan, pabalaurangan raroroi nia.

¹⁶ Nounounangan sia Jesus, “Aponia nupaukeli kam?”

¹⁷ Aleginangan nia sara ka talagada simigi, “Guru, kuambit togaku nene ka matam, aipoi ai ka tubunia ketsat taiagai manibo.

¹⁸ Ke iguruki nia sanitu, pangitngitnangan nia; bela bubut ka ngungunia, putangatnangan sotnia, pusironnangan tubunia. Akutiddouan ka sipasiuluinu rausiake nia, tapoi ta amoi arausiake nia.”

¹⁹ Kuanangan ka matada Jesus, “Bulat reddenan sitaimatonem baga le bai kam. Apangan le burunia kupaalei kam? Apangan le burunia kupuomi kam baga? Ake kam nia sene!”

²⁰ Ambitrangan nia ka matat Jesus. Kele aiitco Jesus sanitu, pangingitnangan leu tubut toga, bele ibele ka polak boddoboddot, bela bubut ka ngungunia.

²¹ Nounounangan ukkuinia Jesus, “Apangan burunia aibara nene ka tubunia?” Aleginangan nia ukkuinia, “Ka pusulekatnia pei le.

²² Mareirei ibeleake nia sanitu ka api samba ka oinan ibesiake imateiake nia. Tapoi bara bai siagainu, kau imakate bagam nuromake kai.”

²³ Kuanangan ka matania Jesus, “Bara bai siagainu, nukua? Ka simatonem baga sangamberinia le momoi!”

²⁴ Pugereinangan leu ukkui toga, “Matonem bagaku. Romake aku simagulai tonem baga nene!”

²⁵ Kele aiitco rapaguru sirimanua simigi Jesus, asenangan sanitu kuanangan, “Ekeu ketsat taiagai manibo simatakkep, belaake ekeu ka tubut toga nene, buian nuguruki nia minca!”

²⁶ Pugereinangan sanitu, pangitngitnangan tubut toga, belanangan leu et. Kean le simamateian le toga nenda, pat kuarangan sirimanua simigi, “Ailangoan nia!”

²⁷ Alanangan kabeinia Jesus isuruake nia, tusurunangan leu et.

²⁸ Kele aitoili Jesus ka lalep, nounourangan nia sipasiuluinia sarada, “Ta koi momoi ka kai kuusiake kai sanitu?”

²⁹ Kuanangan ka matada Jesus, “Sanitu kele nene ta iagai usi, ke ta ka bagat panindogat.”

Pangasegekat Jesus sikaruania pagalaiat pangoringannia

³⁰ Ia geti tuitui Jesus sambada sipasiuluinia sedda ei sia ka Galilea. Ta ioba Jesus raagai nia kasei pa kaipa aiei,

³¹ aipoi ai le ipangangantoman sipasiuluinia. Kuanangan ka matada, “Tusesegeakean le te Togatsirimanua ka kabeira sirimanua. Mateiakerangan nia, tapoi pasat telu ngagogoi lepa aramateiake nia, suru nia minca.”

³² Ta taagai katukolobat tiboiet Jesus nene sipasiuluinia, tapoi maloto sia masinounou ka tubunia.

Kasei le siabeu

³³ Ia geti sege sia ka Kapernaum. Kele arasege ka lalep, nounounangan sipasiuluinia Jesus, “Aponia anupaukeli kam ka enungan?”

³⁴ Tenan le sia meng; aipoi ka enungan arapaukeli kasei siabeu ka talagada.

³⁵ Puuddetnangan Jesus, sogainangan sipasiuluinia sipulurua kuanangan ka matada, “Kasei sioba ibailiu siboiki, buita ipukateitei tubunia samba bailiu pagugulet ka sangamberi.”

³⁶ Lepa alanangan sara toga sigoiso Jesus, riokenangan nia ka talagada. Lakkaiakenangan nia, kuanangan ka matada,

³⁷ “Kasei siala sara tatoga kele nene ka oningku, aku le aiala. Samba kasei siala aku, ta aku aiala, tapoi sipasikokoiniake aku le aiala.”

Kasei sitaisaggangi sita aleita le nia

³⁸ Kuanangan si Johannes ka matat Jesus, “Guru, ai akuitco kai sara sirimanua masiusiake sanitu ka onim. Keramaian nia aipoi ta aleita nia.”

³⁹ Kuanangan Jesus, “Ba kekera kam nia! Aipoi ta anai kasei pa sigalai kerek ka oningku, lepana le pakatainangan nganga ka tubuku.

⁴⁰ Aipoi kasei ta masisaggangi sita, aleita le nia.

⁴¹ Kukua nia ka matamui: Kasei sipalo kam sangapulokat oinan kalulut sipasiului Kristus kam, bulat ta masasaigo upania.”

Masikau sirimanua mujo

⁴² “Kasei sigalai pajoat ka sara taigoiso nene simatonem baga kaku bailiu nia mujo, makaeru pei le ka tubunia tusereake bukku panundukat ka lolokkatnia ituribbaiake nia ka koat.

⁴³ Ke ipajo bai ekeu kabeinu, tippu le nia. Maeru pei le sisara kabei ekeu tuguru ka purimanuaiat, ka sirua kabei ekeu tuguru ka narako, ka api sitaipepee. [

⁴⁴ Sedda leitinia ta mamatei, apinia ta pepee.]

⁴⁵ Samba ke ipajo bai ekeu rerem, tippu le nia. Maeru pei le sisara rere ekeu tuguru ka purimanuaiat, ka sirua rere ekeu turibbaiake ka narako. [

⁴⁶ Sedda leitinia ta mamatei, apinia ta pepee.]

⁴⁷ Samba ke ipajo bai ekeu matam, kiok le nia. Maeru pei le sisara mata ekeu tuguru ka Purimataat Taikamanua, ka sirua mata ekeu turibbaiake ka narako.

⁴⁸ Sedda leitinia ta mamatei, apinia ta pepee.

⁴⁹ Aipoi senen sirimanua buita tugarami nia api, kele buluakenen tugarami nia garam.

⁵⁰ Simaeru te garam; tapoi ke maleu bai garam, apangan le nukakau kam pasikalo nia? Oto kau ibailiu kam kele garam, samba kau paaban kam pasasambamui.”