Mrk. 8 - BUKO SIPUNENAN

Ipakom epat ribu sirimanua Jesus

¹ Pasat piga ngagogoi pa maruru minca sirimanua simigi. Kalulut ta anai katda, sogainangan sipasiuluinia Jesus, kuanangan ka matada,

² “Amanuntungan bagaku ka sirimanua simigi nene, telu ngagogoian poi araomake mukuddu ka tubuku, taan anai katda.

³ Kutuituiake bai sia taipukokom, matei sia laje ka enungan, aipoi ai ka talagada sibara ka sareunan.”

⁴ Alegirangan nia sipasiuluinia, “Kaipa te taaala kan ka simatangeu se masiektekngake sia nene?”

⁵ Nounounangan sia Jesus, “Ai piga roti ka kam?” Alegirangan nia, “Pitu.”

⁶ Kuanangan Jesus ka sirimanua simigi rapuuddet ka polak. Lepa alanangan roti sipitu, kuanangan sura ka Taikamanua, paabbonangan nia, kaunangan nia ka sipasiuluinia raparubei nia. Kaurangan leu et nia ka sirimanua simigi.

⁷ Ai leu goiso ka sia iba pagoisogoiso. Lepa aikua sura Jesus, kaunangan ka sipasiuluinia raparubei nia.

⁸ Pukomrangan pat ektek. Lepa ruruakerangan legeira, pitu ngagaraga.

⁹ Igida sipukokom ai pa epat ribu sia. Lepa kuanangan Jesus ratoili.

¹⁰ Tujanangnangan ka sia ka abak sambada sipasiuluinia, ei sia ka laggai Dalmanuta.

Tai Parise masitiddou kerek

¹¹ Ia geti oi piga pa tai Parise ka matat Jesus taddaakerangan paise ka tubunia. Tiddourangan igalai kerek sibara ka sorga, rasibo nia.

¹² Puhuihuinangan Jesus ka bagat Ketsatnia kuanangan, “Angoi rakiddi kerek reddenan nene? Kukua nia ka matamui: Ka sirimanua reddenan nene ta tukakau kerek.”

¹³ Kaddiuakenangan sia Jesus, janang nia ka abak mei mutalipo ka sila.

Siomanda tai Parise samba Herodes

¹⁴ Arakalipogi masiambit roti sipasiului Jesus, ai pei sara ka sia ka bagat abak.

¹⁵ Paneineinangan sia Jesus pele ngangania, “Pagaba kam, jago kam tubumui ka siomanda tai Parise samba siomanda tai Herodes.”

¹⁶ Patiborangan pasasambada, “Taiaambitta roti te ikukua nene.”

¹⁷ Iagai le poi Jesus sikuada kuanangan, “Patitibongan koi kam taiaambitmui roti? Tapei pa nuagai kam samba tapei makolou ka bagamui? Tapei iaabtip ka paatutuatmui?

¹⁸ Ai matamui, ta nuiitco kam; ai talingamui, ta nuaarep kam? Ta nurerepdep kam

¹⁹ sipaabboku lima roti ka lima ribu sirimanua? Piga ngagaraga legeinia anururuake kam?” Alegirangan nia, “Pulu rua ngagaraga.”

²⁰ “Samba sipitu roti ka epat ribu sirimanua, piga ngagaraga legeinia anururuake kam?” Alegirangan nia, “Pitu ngagaraga.”

²¹ Kuanangan Jesus, “Tapei makokolou ka bagamui?”

Ialeake simapeset ka Betsaida Jesus

²² Ia geti sege sia ka Betsaida. Taroakerangan ka matat Jesus sara simapeset, tiddourangan bule irape nia Jesus.

²³ Alanangan kabei simapeset Jesus, Palulunangan nia ibela ka gerat laggai. Lepa lujinangan matania, rapenangan nia, nounounangan nia, “Anuitcoan leu apa pa?”

²⁴ Mataakenangan matania kuanangan, “Oo, kuitco sirimanua ai sia mueenung, tapoi kele loina le tuitco sia.”

²⁵ Rapenangan minca matania Jesus. Kelebekngakenangan matania, maitconangan matania, toila iitco sangamberinia.

²⁶ Koiniakenangan nia Jesus itoili ka lalepnia, kuanangan, “Baan eei ka laggai.”

Pasimunengan Petrus pagalaiat Jesus

²⁷ Lepa ei Jesus sambada sipasiuluinia ka laggai pagoisogoiso ka Kaisarea Pilippi. Talagat pueenungda nounounangan sia Jesus, “Kasei le aku rakua nia sirimanua?”

²⁸ Alegirangan nia, “Ai sipasikukua si Johannes Sipasirarau, sabagei masikua si Elia, tapoi sabagei masikua sara ka talagada tai nabi.”

²⁹ Nounounangan sia Jesus, “Kam ka kam, kasei le aku nukua kam?” Aleginangan nia si Petrus, “Kristus le ekeu!”

³⁰ Lepa paneineinangan sia Jesus bui rapoiliat nia ka kasei pa pagalaiat tubunia.

Pangasegekat Jesus siboiki pagalaiat pangoringan samba kamateiatnia

³¹ Ia geti taddaakenangan Jesus masipangantoman sipasiuluinia, “Buita iorik maigi paoreat Togatsirimanua, rakekele nia tai baja, tai imam sabeu samba siagaisurat. Mateiakerangan nia, tapoi pasat telu ngagogoi suru nia minca.”

³² Ta aigigi aitiboi nia ka matada Jesus. Lepa alanangan nia si Petrus apei sia, aseakenangan nia.

³³ Teiteinangan si Petrus Jesus, mattainangan sipasiuluinia, golunangan si Petrus kuanangan, “Kenan katuitui Sanitu! Aipoi ta pinaatut Taikamanua nupaatu, pinaatut sirimanua le.”

³⁴ Ia geti sogainangan sirimanua simigi Jesus sambada sipasiuluinia kuanangan ka matada, “Senen sioba masitut aku, kau iputata tubunia, bairatnangan siliktengania, tutnangan aku.

³⁵ Aipoi sipasikikiliu engania, malilimai le engania; sitaipuletsei engania kalulut aku samba kalulut Katuareman Simaeru, ia te masikikiliu engania.

³⁶ Apa kauna nia sirimanua ke ibakkati sangalio polak, tapoi engania malimai le?

³⁷ Aponia poi momoi ikau sirimanua sakit engania?

³⁸ Kasei simaila masimunengake aku samba tiboietku ka reddenan sipaeelet samba sijo nene, Togatsirimanua leu mamaila masimunengake nia ka teteret ioi ka pulatsanan Ukkuinia sambada samalaikania.”