Mrk. 7 - BUKO SIPUNENAN

Nganturatda taikebbukat

¹ Sangaminca amoi tai Parise samba piga pa siagaisurat sibara ka Jerusalem paruru ka matat Jesus.

² Itcorangan piga pa sipasiului Jesus tenan sia mukom simalolit kabei, tibonannia taipasibubui kabei boiki.

³ Ka tai Parise poi, kisedda leu et sangamberi tai Jahudi ta mukokom sia ke ta rabui boiki kabeira sipulelelek, ratut siripot nganturatda taikebbukat.

⁴ Samba apa pa sibara ka pasakiat, ta rakokom ke ta rabui boiki. Maigi pei le bagei suruket sinilora ka taikebbukat, kele pasibubui sere, pulokat samba pario.

⁵ Kalulut nene nounourangan Jesus tai Parise samba siagaisurat, “Ta kodda ratutut sipasiuluinu nganturatda taikebbukatta? Tenan le kodda sia mukom taipasibubui kabei?”

⁶ Kuanangan ka matada Jesus, “Aisesengan bai sinibalaakenen nabi Jesaya pagalaiat tubumui, kam sipatataju! Kele sinuratnakenennia, ‘Ka ngungunda le raumun aku bangsa nene, paatuatda geti areu kaku.

⁷ Siboboi le rapaninindogi aku, surukat sirimanua le poi ranganganturuake.’

⁸ Surukat Taikamanua nukaddiuake kam, nganturat sirimanua nutut kam.”

⁹ Kuanangan minca Jesus, “Nuagai kam masiputata Surukat Taikamanua bule nganturatmui le nugelaiake kam.

¹⁰ Aikua si Mose, ‘Suru ukkuinu samba inam,’ samba ‘Sipateleiji ukkui ele inania, buita tumateiake nia.”

¹¹ Tapoi kam masikua: Kasei sipasikukua ka ukkui ele inania, ‘Kei akenenku kekeu te nene, tapoi akukauan nia buluakenen ka Taikamanua,’

¹² oto anukerangan kam sia masirom ukkui ele inania.

¹³ Kisedda te nuputata kam tiboiet Taikamanua kalulut nututnake kam aratmui. Maigi pei le bagei kele nene nugalai kam.”

¹⁴ Lepa sogainangan minca sirimanua simigi Jesus, kuanangan ka matada, “Arep kam sangamberimui, lelekngake kam!

¹⁵ Ta sitububuluk ka bagat sirimanua, sibara ka uddut ilololitnake nia, sibebela ka bagat sirimanua le ilololitnake nia.” [

¹⁶ Kasei sibara talinga, kau iarepmake nia!]

¹⁷ Kele aikaddiuake sirimanua simigi Jesus, samba aituguru ka lalep, nounourangan nia sipasiuluinia pagalaiat katukolobat pasikat nenda.

¹⁸ Kuanangan ka matada Jesus, “Kam leu et tapei makolou ka bagamui? Tapei nuagai kam, ta sitububuluk ka bagat sirimanua, sibara ka uddut ilololitnake nia,

¹⁹ aipoi ta ka paatuatnia ituguguru, ka balugunia le, lepa bela minca.” Ka tiboietnia nene ipakoinong Jesus sangamberi komen momoi tukom.

²⁰ Kuanangan minca Jesus, “Sibebela ka bagat sirimanua ia te ilololitnake sirimanua.

²¹ Ka bagat sirimanua poi, ia te ka bagat paatuatnia ibabara paatuat sikatai, puuumun, pananangkou, pamamatei,

²² paeelet, alau baga, pujojoo, patajuat, pubotbonan, tutu baga, paasakat, ukkat tubu samba taiagai nganturu.

²³ Sangamberi katai nene ia te sibara ka baga, ia te ilololitnake sirimanua.”

Tonem bagat sinanalep tai Siro-Fenisia

²⁴ Lepa tui Jesus sedda ei nia ka laggaira tai Tirus. Guru nia ka sara lalep samba ta ioba raagai nia sirimanua kababarania sedda; tapoi ta amoi aipakele nia.

²⁵ Maruei le aiagai nia sara saina sibara toga sinanalep pinasaileu sanitu. Oinangan leu murappo ka matania.

²⁶ Sinanalep nene ia te tai Grika bangsa Siro-Fenisia. Tiddounangan ka Jesus bule iusiake sanitu ka tubut togania.

²⁷ Kuanangan ka matania Jesus, “Eddangannia ramaektek tatoga boiki, aipoi ta pasesese tuala katda tatoga ituribbaiake ka jojo.”

²⁸ Aleginangan nia sinanalep, “Aisesengan tedda Tuhan. Tapoi ai leu ikokom jojo sikuddu ka tei meja siraganan katda tatoga.”

²⁹ Kuanangan ka matania Jesus, “Kalulut tiboietnu nene, toiliakean ekeu, abelangan sanitu ka tubut togam.”

³⁰ Toili nia ka lalepnia, ailinangan aimemerep togania, abelangan sanitu ka tubunia.

Ialeake Jesus sara simatakkep taiagai manibo

³¹ Lepa kaddiuakenangan laggaira tai Tirus Jesus, sabau Sidon ei nia ka koat Galilea, ka talagat laggaira tai Dekapolis.

³² Sedda taroakerangan ka matania simatakkep taiagai manibo. Tiddourangan bule irapeake kabeinia Jesus ka tubut sirimanua nenda.

³³ Alanangan nia Jesus isaraake nia, usuakenangan singongainia ka talingan simatakkep, pulujinangan, rapenangan lilania.

³⁴ Lepa teilanangan manua Jesus, puhuihuinangan, kuanangan ka matania, “Efata!” tibonannia, “Bukaake ekeu!”

³⁵ Tubukanangan leu piunia, golok aigolok apparat lilania, panibonangan sipulelelek.

³⁶ Ia geti paneineinangan sia Jesus sangamberida sikuddu sedda bui rapaarep nia ka kasei pa. Tapoi ia pei ikera sia Jesus, ia pei imakope rapaarep nia.

³⁷ Tenan le kisei ka bagada sirimanua, kuarangan, “Sangamberinia le aipaeru. Simatakkep ikau maarep piu, taiagai manibo ikau raagai manibo.”