Mrk. 6 - BUKO SIPUNENAN

Rakekele Jesus ka Natsaret

¹ Ia geti tui Jesus sedda, toili nia ka laggai puuragatnia; sipasiuluinia leu masitut nia.

² Ka gogoi Sabat taddaakenangan mungantoman ka uma parurukat. Maigi sirimanua sedda. Kele araarep nia sirimanua simigi, makiseinangan ka bagada sangamberida kuarangan, “Kaipa te aisese sangamberinia nene? Kasoppinan apa te atukau ka tubunia? Kipa te iooi igalai kerek kele nene?

³ Ta tukang loina le nia, togat Maria, samba sarainan Jakobus, Joses, Judas samba Simon? Ta ai sia se samaniunia?” Mabelenangan bagada ka tubunia.

⁴ Kuanangan ka matada Jesus, “Kaipa kaipa rasusuru le nabi, sarat ka bakkat laggai le samba saeppu ta masisusuru.”

⁵ Ta anai apa pa aigalai kerek sedda, sarat ka piga le pa simabesi airapeake kabeinia ialeake sia.

^6a Bulat makisei ka bagania Jesus taimatonem bagada.

Ikoiniake sipasiuluinia sipulurua Jesus

^6b Pasat nene ei Jesus ka laggai ka riringan nenda masipangantoman sirimanua.

⁷ Sogainangan sipasiuluinia sipulurua, koiniakenangan sia parurua. Kaunangan ka tubuda gege masiusiake sanitu,

⁸ samba ipatone sia bui raambit apa pa ka enungan sarat tutura lepa. Bui tuambit kan, ele balut, ele bulagat ka bagat lompe.

⁹ Tarangai geti momoi tupakei, tapoi bui tupakei rua ngalakke leppei.

¹⁰ Ikua leu ka matada Jesus, “Ke arasiloan kam ka sara lalep, seddangan te nukukuddu kam teret tuituimui ka laggai nenda.

¹¹ Tapoi ke ai bai laggai sitaioba masisilo kam ele sitaioba masiarepi tiboietmui, kaddiuakemuian laggai nenda, sosoakemuian abu ka reremui ibailiu nia repdemenda.”

¹² Lepa ei sia masipaarep bule sangamberi sirimanua masibauake paatuatda.

¹³ Usiakerangan maigi sanitu samba ratulaji maigi simabesi samba raaleake sia.

Kamateiat Johannes Sipasirarau

¹⁴ Katuareman pagalaiat Jesus iarep leu rimata Herodes, aipoi amaarepman oninia. Samba ai sipasikukua, “Atusurungan si Johannes Sipasirarau ka simamatei, ia te lulunia imakekerek.”

¹⁵ Sabagei masikua, “Si Elia le nia.” Ai sipasikukua, “Nabi le nia kele sara tai nabi siburu.”

¹⁶ Kele aiarep nia si Herodes kuanangan, “Si Johannes le sinaggiriku lolokkat, amurimanuangan nia minca.”

¹⁷ Aikoiniake poi ralaba si Johannes si Herodes, rakabe nia samba rakau nia ka bagat penjara. Lulunia ia te kalulut si Herodias sinanalep sarainania si Pilipus aiala poi nia si Herodes bailiu sinanalepnia.

¹⁸ Aikua poi ka matat Herodes si Johannes, “Ta pasese nuala sinanalep sarainam!”

¹⁹ Malaganangan bagania si Herodes kai Johannes, gelenangan imateiake nia, tapoi ta momoi;

²⁰ maloto poi si Herodes kai Johannes kalulut iagai poi simatopit samba sipunenan le si Johannes. Pasikelinangan nia bui ramateiake si Johannes. Ioba masiarep tiboiet Johannes, kenanen senen iarep nia makeppu ka bagania masiarep nia.

²¹ Kalepakatnia bara tetere simaeru kai Herodias, ia te ka gogoi pasirepdeman pututukat matat Herodes aigalai punen masirauma sangamberi sautet pamarenta, utera tai saladdu samba siabeu tiboi tubu ka Galilea.

²² Ka teteret nenda guru togat Herodias sinanalep, puturunangan masiangkaake bagat rimata samba tairaumania. Kuanangan ka matat siokko rimata, “Tiddou le ka tubuku apa siobanu, kuaake kekeu!”

²³ Pusuppanangan pei si Herodes ipalelek tiboietnia ka matania, “Apa le nutiddou, kuaake kekeu, kenanen iretalaga purimataatku!”

²⁴ Ia geti bela nia, nounounangan inania, “Aponia kutitiddou?” Aleginangan inania, “Utet Johannes Sipasirarau!”

²⁵ Olaakenangan siokko mei ka rimata, tiddounangan, “Siobaku, nuake kisene utet Johannes Sipasirarau ka bagat mangko!”

²⁶ Mareureunangan bagat rimata. Tapoi kalulut sippania, araarepman pei bagei tairauma, taan iagai iolei nia.

²⁷ Koiniakenangan leu saladdunia masiala utet Johannes Sipasirarau. Einangan leu et saladdu ka penjara, saggirinangan lolokkat Johannes.

²⁸ Ambitnangan nia ka bagat mangko, kaunangan nia ka siokko, kaunangan nia ka sia ka inania.

²⁹ Kele araarep nia sipasiului Johannes, oi sia masiala tubut Johannes rateiakerangan nia.

Ipakom lima ribu sirimanua Jesus

³⁰ Lepa toili sia minca tai apostel parururangan ka matat Jesus, segeakerangan ka matania sangamberi sigalaira samba singantomanakenenda.

³¹ Kuanangan ka matada sipasiuluinia Jesus, “Sita kam ka kudduat simatangeu tasaraake tubuta samba muari goiso.” Maigi poi sirimanua siooi samba situtuitui, pat taan momoi rapukom.

³² Ia geti tui sia muabak mei ka kudduat simatangeu sarada.

³³ Tapoi maigi sirimanua sipasiitco sia aratuitui sedda samba raagai kaipa raeei. Ei sia sibara ka sangamberi laggai nenda, pabalaurangan musila raei sedda raboikiake tubuda.

³⁴ Kele aitusakai Jesus barania ka abak, itconangan sirimanua simigi, makatenangan bagania ka tubuda, kele biribiri poi sia si ta anai sipasijajago. Taddaakenangan masipangantoman sia pagalaiat maigi ngamata.

³⁵ Kele aitaddaake masoibo, oi sipasiului Jesus masikua ka matania, “Simatangeu le kudduat nene, amasoiboan bagei.

³⁶ Obaakean le sia ratuitui, raei ka laggai simalegere se masisaki katda.”

³⁷ Alegina le nia Jesus, “Kam le ipakokom sia.” Kuarangan sipasiuluinia, “Kaian le memei masisaki roti simemet rua ngotu ropia masipakom sia nene?” Kele araitco nia kuarangan, “Lima roti, rua iba.”

³⁸ Kuanangan ka matada Jesus, “Itco pei kam, ai pei piga roti ka kam?”

³⁹ Ia geti kuanangan rapuuddet ka turuturu pinabagguak.

⁴⁰ Puuddetrangan, ai sisangotu, ai silima pulu sangabagguak.

⁴¹ Alanangan roti silima samba iba sirua Jesus, teilanangan manua, kuanangan sura ka Taikamanua, lepa paabbonangan nia, kaunangan nia ka sipasiuluinia bule raparubei nia ka sirimanua simigi. Iba leu et sirua parubeinangan nia ka sangamberida.

⁴² Pukomrangan leu sangamberida ektek.

⁴³ Lepa ruruakerangan legeira roti samba iba sun pulu rua ngagaraga.

⁴⁴ Igida sipukokom roti ai lima ribu taimanteu.

Jesus muenung ka uddut koat

⁴⁵ Lepana le nenda kuanangan Jesus ka sipasiuluinia ratujanang ka abak rapuboiki mei ka sila, ka Betsaida, pangenan rapusabu sirimanua simigi.

⁴⁶ Lepa arapusabu sirimanua simigi, ei nia ka leleu manindou.

⁴⁷ Kele aimasoibo aian ka talagat koat abakda sipasiului Jesus, saranangan le Jesus ka kapi.

⁴⁸ Kele aiitco Jesus besit tubuda sipasiuluinia masilugai abak, sasaket le poi bagei rusa, ka bobo telu sinoibo ei nia itagetnake sia muenung ka uddut koat. Kei isasabauake sia Jesus.

⁴⁹ Kele araitco nia ipuenung ka uddut koat, ka bagada le poi sanitu, pugereirangan.

⁵⁰ Atugegean poi sia sangamberida araitco Jesus. Tapoi maruei le aiteka sia Jesus kuanangan, “Ta leu! Aku le. Ba maloloto kam!”

⁵¹ Tujanangnangan ka bagat abak iei ka tubuda, puarinangan leu rusa. Tenan le kisei ka bagada sipasiuluinia,

⁵² aipoi tapei makokolou ka bagada katukolobat silima roti, tapei ibubuka paatuatda.

Ialeake Jesus simabesi ka Genesaret

⁵³ Puabakrangan raei ka kapi, sege sia ka laggai Genesaret, tujolourangan sedda.

⁵⁴ Kele aratusakai barada ka abak, maruei araagai Jesus sirimanua.

⁵⁵ Pabalaurangan leu ka sangalio laggai nenda, ambitrangan simabesi ka peremanda rakau sia ka Jesus, kaipa raarep ikuddu Jesus.

⁵⁶ Kaipa le iei Jesus, ka laggai, ele ka kota ele ka desa, taroakerangan sangamberi simabesi ka pasakiat, tiddourangan bule iobaake rarape jaijait leppeinia. Sangamberida sipasirarape, ale.