Mrk. 5 - BUKO SIPUNENAN

Ialeake pinasaileu sanitu Jesus

¹ Ia geti sege sia ka silat koat Galilea, ka laggaira tai Gerasa.

² Sakaina le Jesus barania ka abak, paseseakenangan nia sara pinasaileu sanitu sibara ka ratei.

³ Sirimanua nene ka ratei le ikukuddu, samba ta anai kasei pa siooi masikabe nia kenanen palenggui.

⁴ Mareireian rakabe samba rapalenggui nia, tapoi itatakkiake samba iraragatnake le palenggui. Beri sara siooi masiukkaake nia.

⁵ Sinago sinoibo, ka ratei samba ka leleu le ipugegejek, mugerei samba iboboake bukku ka tubunia.

⁶ Kele aiitco Jesus ka sareunan, pabalaunangan itagetnake nia, rappo nia ka matania,

⁷ pugereinangan sabeu nganga, “Apa nuaala se, Jesus Togat Taikamanua Sipulubeunan? Ka onin Taikamanua kutiddou ka tubum, bui nubesiki aku!”

⁸ Lulunia aikua nene, aikua poi Jesus ka matania, “Ketsat sanitu, belaake ekeu ka sirimanua nene!”

⁹ Lepa nounounangan nia Jesus, “Kasei onim?” Aleginangan nia, “Oningku ‘Legion’ – maigi poi kai!”

¹⁰ Ia geti tiddourangan simakope bui iusiake sia Jesus ka laggaira nenda.

¹¹ Ka legeret kudduat nenda ai sangamata sakkoilo sipukokom ka gilak leleu.

¹² Tiddourangan ka Jesus kuarangan, “Obaake kuei kai kusopsopmake kai tubumai ka sakkoilo.”

¹³ Obaakenangan sia Jesus. Belarangan leu sanitu ka tubut sirimanua nenda ei sia ka bagat sakkoilo. Ribbaiakerangan tubuda sakkoilo sisangamata nenda – ai pa rua ribu ngamuneng – barania ka tikkara teipu bujuu ka koat, louloulou.

¹⁴ Tui sia sipasijajago sakkoilo, ei sia masisegeake sibabara nene ka laggai samba ka sikuddu ka desa. Belarangan sangamberida masiitco sibabara.

¹⁵ Oi sia ka Jesus, itcorangan sirimanua pinasaileu sanitu sisangalegion nenda, aian nia mututukku, amuleppeian nia, aiagaian simaeru. Malotorangan sangamberida.

¹⁶ Sia sipasiitco sibabara nene masinunuake ka matada sirimanua pagalaiat sibabara ka pinasaileu sanitu samba ka sakkoilo nenda.

¹⁷ Tiddourangan leu bule ikaddiuake laggaira Jesus.

¹⁸ Kele aitujanang Jesus ka abak, tiddounangan pinasaileu sanitu bule itut nia.

¹⁹ Tapoi ta aiobaake nia Jesus. Kuana le ka matania, “Toiliakean ekeu ka saeppum, segeake ka matada beunan sigalai Tuhan ka tubum samba katet bagania ka tubum.”

²⁰ Ia geti ei nia ka sangalio laggai Dekapolis masipaarep sangamberi sigalai Jesus ka tubunia. Makiseinangan ka bagada sangamberi sipasiaarep.

Togat Jairus sinanalep samba sinanalep sipasirarape leppei Jesus

²¹ Kele aiputalipo minca Jesus ka sila, marururangan sirimanua simigi ka matania ka bebet koat.

²² Ia geti oi sara utet uma parurukat sikuddu sedda sipuoni si Jairus. Kele aiitco Jesus pabalaunangan murappo ka reret Jesus,

²³ tiddounangan simakope, “Mamateian le togaku sinanalep. Konan pei nurapeake kabeinu ka tubunia, bule imale togaku, ipurimanua!”

²⁴ Einangan leu Jesus ipaalei nia. Makope igida sirimanua situt nia, pat okkiprangan nia.

²⁵ Sedda ai leu sara sinanalep simabesi pujojaet pulu rua ngarurangan ujunia.

²⁶ Kenanen amaigingan tai kerei amasilaggek nia, samba aisappuruakean sangamberi sibabara ka tubunia, tapoi siboboi le, memei itutuppai le besinia.

²⁷ Kele aiarep pagalaiat Jesus, ei nia ka talagat sirimanua simigi ka teitei Jesus masirape leppeinia.

²⁸ Paatuatnia poi, “Kurape le leppeinia, mamalengan aku.”

²⁹ Rapena le leppei Jesus, ari pujojaetnia, againangan tubunia amalengan nia ka besinia.

³⁰ Againangan leu tubunia Jesus kabebelat kerek ka tubunia. Pitsangan ka teitei ka talagat sirimanua simigi kuanangan, “Kasei airape leppeiku?”

³¹ Kuarangan sipasiuluinia, “Anuitcoan raokkip ekeu sirimanua; nukukua pei le kasei airape aku?”

³² Kinerenangan sia pat salu iitco kasei sigalaiake nia.

³³ Aiagaian poi sinanalep sibabara ka tubunia, ei nia aimugegeret tubunia lotonia, purapponangan ka reret Jesus tiboinangan sangamberinia sipulelek.

³⁴ Kuanangan Jesus ka matat sinanalep, “Rogai, aiarauakean ekeu tonem bagam. Kenanan ka angkat baga, samba kau imale besinu!”

³⁵ Ai pei le ikukua nene Jesus, oi sia sibara ka lalep Jairus masikua ka matat Jairus, “Atataan togam, apanannu pei le nugegejaake bagat Guru!”

³⁶ Ta aipuuku Jesus sikuada, kuanangan ka matat Jairus, “Ba maloloto, tonemake le bagam!”

³⁷ Ta aiobaake Jesus ratut nia sabagei, sarat si Petrus le, si Jakobus samba si Johannes, sarainan Jakobus.

³⁸ Sege sia ka lalep utet uma parurukat, itconangan Jesus sedda sipulalamau, sipusosou samba sipugegeri gau lepa.

³⁹ Guru Jesus kuanangan ka matada, “Angoi mulamau kam samba mugeri? Ta amatei toga nene, ai le nia memerep.”

⁴⁰ Tapoi aragagati le nia. Kekelenangan sia sangamberida rabela. Ambitnangan ukkui samba inan toga samba telu sipasiuluinia, guru sia ka kudduat toga.

⁴¹ Alanangan kabei toga Jesus kuanangan, “Talita kum,” tibonannia, “Rogai, kukua ka matam suruake ekeu!”

⁴² Tusurunangan leu et toga, puenungnangan, pulu rua ngarurangan poi beunannia. Kisei lepa ka bagada sia sikuddu sedda.

⁴³ Tapoi ipaneinei le sia simakope Jesus bui raagai nia kasei pa. Lepa kuanangan rakau kannia.