Mrk. 4 - BUKO SIPUNENAN

Pasikat sipangangaram

¹ Ia geti taddaakenangan minca Jesus mungantoman ka bebet koat Galilea. Makope igida sirimanua masipurut nia, pat tujanangnangan ka bagat abak. Putekbuknangan ka koat, sirimanua simigi geti ai sia muririo ka kapi.

² Maigi ngamata aingantomanake ka matada ka bagat pasikat. Kuanangan ka ngantomannia,

³ “Arepmake kam! Ai sara sirimanua sieei mangaram.

⁴ Aikakaramake, bele bagei ka enungan, oi uma patautakinangan nia.

⁵ Bagei bele ka polak simabukku ditaimakeppu polak. Maruei ipututu ta poi makeppu polaknia.

⁶ Tapoi kele aibela sulu, malajunangan, attei, lulut tatat ungatnia.

⁷ Bagei bele ka talagat rui. Pututunangan rui, teinangan nia, taipubuanangan.

⁸ Ai leu sibebele ka polak simaeru. Pututunangan, puuraunangan, pubuanangan, ai telu pulu, ai enem pulu, ai sangotu igit ngambenia.”

⁹ Lepa kuanangan Jesus, “Kasei sibara talinga, kau iarepmake nia.”

Lulunia ipupapasikat Jesus

¹⁰ Kele aipusara Jesus, oi sipasitututnia sambada sipasiului sipulurua masinounou nia pagalaiat katukolobat pasikat nenda.

¹¹ Kuanangan ka matada, “Ka kam atupaagaian keleat Purimataat Taikamanua; ka sia sikuddu ka bebe geti ka bagat pasikat le tusegeake sangamberinia,

¹² bule, ‘Kenanen aikikinere matada, tapoi ta raiitco, aiaarep piura, tapoi ta raaagai kolou, bui rabauake paatuatda, samba bui ituappeake joda.’ ”

Ikolouake Jesus pasikat sipangangaram

¹³ Kuanangan ka matada Jesus, “Ke ta makolou ka bagamui pasikat nene, kipa te imakokolou ka bagamui pasikat bagei?

¹⁴ Sipangangaram ia te sipakakara tiboiet Taikamanua.

¹⁵ Karamen sibebele ka bebet enungan, ia te pasikat sirimanua katukaraman tiboiet, arepda le nia, oinangan Sanitu, alanangan tiboiet sikaramakenen ka paatuatda.

¹⁶ Kisedda leu et sikaramakenen ka polak simabukku, ia te sirimanua sipasiaarep tiboiet, maruei raala nia ka angkat baga.

¹⁷ Tapoi ta muungat tiboiet ka paatuatda, tulu le aiomake goiso. Barana le gejat baga ele paoreat kalulud tiboiet, bilaan le imabebele bagada.

¹⁸ Sabagei makere sia kele karamen sikaramakenen ka talagat rui. Kisedda te sirimanua sipasiaarep tiboiet,

¹⁹ tapoi kalulut aiokkip samba aitei le tiboiet puukuket polak, pajoat pukayoat samba sene ngamata pubotbonan bagei, taipubuanangan.

²⁰ Sikaramakenen ka polak simaeru geti, ia te sipasiaarep samba sipasiaala tiboiet, pubuarangan: ai telu pulu ngaoleat, ai enem pulu ngaoleat, ai sangotu ngaoleat.”

Pasikat alito ka tei bulukbuk

²¹ Lepa kuanangan ka matada Jesus, “Ai pa sirimanua situnam alito, lepa luplupinangan nia bulukbuk, ele ikau ka tei pereman? Ta ka kudduat pualitoat le itukakau?

²² Aipoi ta anai simalipput taitoilaakenen, samba ta anai pakeleat taipopoilianen geti.

²³ Kasei sibara talinga, kau iarepmake nia!”

²⁴ Lepa kuanangan ka matada, “Lelekngake kam siarepmui! Kirekat sikireakenenmui ka sirimanua, ia leu te ikikireake Taikamanua ka kam, samba itutuppai pei le ka kam.

²⁵ Ka kasei poi ai, tukakau pei le, ka si ta anai geti, beringan sibabara ka tubunia tuaala pei le.”

Pasikat karamen siputututu

²⁶ Kuanangan Jesus, “Purimataat Taikamanua tupakereake nia ka sara sirimanua sikaramake karamen ka polak.

²⁷ Soibo perep nia, tago suru nia; aimuririuriu ipupon samba ipuurau karamen. Tapoi kipa pagalaiatnia, ta iagai sipangangaram.

²⁸ Tubut polak le ibabaraake buania: boiki loinania, lepa ottinia, kelepakatnia bua simasun baga ka ottinia.

²⁹ Kele aimara buania, taddaakerangan masigetai, aiailingan poi tetere pasimoneiat.”

Pasikat luikut ube

³⁰ Kuanangan Jesus, “Kipa tupakereake Purimataat Taikamanua? Ele pasikat apa tukakau masipakereake nia?

³¹ Makere le nia ka sara luikut ube sikaramakenen ka polak. Bulat simakope goiso le nia ka sangamberi karamen ka polak nene.

³² Tapoi kele aitukaramake pututunangan, bailiu niangan le abeu ka paguleigulei bagei. Belanangan rannia sabeu, pat oi uma murumun ka sikunemannia.”

³³ Samba maigi pasikat bagei kele nene isegeake tiboiet ka matada, siripot siooi raagai kolou.

³⁴ Ta amanibo nia ka matada taipupapasikat. Tapoi ka sipasiuluinia geti, ka teteret saradangan le kolouakenangan sangamberinia ka matada.

Ilebakngake koat Jesus

³⁵ Ka gogoi nenda leu et kasoibokat, kuanangan ka matada sipasiuluinia Jesus, “Sita kam mutalipo ka sila.”

³⁶ Kaddiuakerangan sirimanua simigi, janang sipasiului ka bagat abak – Jesus ka sia aian nia ka bagat abak – tui sia sambada. Tapoi ai leu bagei abak paabakngakenenda.

³⁷ Ia geti akenangan rusa simapiret, oinangan leu koat ka bagat abak, ai le goiso isun.

³⁸ Jesus geti ai nia memerep ka muri, aitutuluni tulunan. Geugeurangan nia sipasiuluinia kuarangan, “Guru, ta nupuleletsei tamagoo?”

³⁹ Tusurunangan leu et, asenangan rusa, kuanangan ka koat, “Meng, lebakngake ekeu!” Puarinangan rusa, malebaknangan leu koat, nem lepa.

⁴⁰ Kuanangan ka matada sipasiuluinia, “Angoi kise lotomui? Kipa, tapei matonem bagamui?”

⁴¹ Malotorangan simakope, kuarangan pasasambada, “Kasei le pa sirimanua nene, rusa samba koatnan le kodda irereddet ngangania!”