Mrk. 3 - BUKO SIPUNENAN

Ialeake Jesus simasakit kabei sangasila ka gogoi Sabat

¹ Pasat nene ei minca Jesus ka uma parurukat. Sedda ai sara sirimanua simasakit kabei sangasila.

² Ia geti ngenaakerangan tubuda, baleu ialeake nia ka gogoi Sabat, bule ioi rajoake nia.

³ Kuanangan Jesus ka matat simasakit kabei sangasila, “Rioake ekeu ka talaga.”

⁴ Nounounangan sia sangamberida, “Apa simateu tugalai ka gogoi Sabat, masigalai simaeru, ele masigalai sikatai? Masirimanuaake sirimanua, ele masimateiake sirimanua?” Tenan le sia meng.

⁵ Kinerenangan sia sangamberida golut bagania, tapoi mareureu leu bagania ka tubuda lulut kelat paatuatda. Lepa kuanangan ka sirimanua simasakit kabei, “Totoiake kabeinu!” Totoiakenangan nia, malenangan kabeinia.

⁶ Ia geti bela sia tai Parise, eirangan leu mukere baga ka sipasitutut si Herodes, masigaba enungan masimateiake Jesus.

Ialeake maigi sirimanua Jesus ka bebet koat

⁷ Lepa ei Jesus sambada sipasiuluinia ka koat Galilea. Maigi sirimanua sibara ka Galilea masitut nia. Sibara ka Judea leu,

⁸ sibara ka Jerusalem, sibara ka Idumea, sibara ka silat Jordan, samba ka laggaira tai Tirus samba Sidon maigi sia amoi masitagetnake Jesus, araarep poi sigalainia.

⁹ Kopet igida sirimanua, koiniakenangan sipasiuluinia Jesus ratarekngake ka sia sara abak, bui raokkip nia.

¹⁰ Maigingan poi simabesi aialeake, kineneiget sangamberida simabesi masiokkip nia rabesiake masirape nia.

¹¹ Samba sirimanua pinasaileu sanitu, itco raitco nia, purapporangan ka matania samba mugerei, “Togat Taikamanua le ekeu!”

¹² Tapoi ikera le sia simakope Jesus bui rakua kasei nia.

Ipili Jesus pulurua tai apostel

¹³ Ia geti panataranangan Jesus ka leleu. Sogainangan ka bebenia sirimanua siobania, oi sia ka tubunia.

¹⁴ Pilinangan sia pulurua, bule rapaalei nia samba ikoiniake sia masipaarep Katuareman Simaeru,

¹⁵ samba ikau ka sia gege masiusiake sanitu.

¹⁶ Oninda sipulura sipilinia ia te: Simon (sioniakenen Jesus Petrus),

¹⁷ Jakobus togat Sebedeus samba sarainania Johanes (ruada nene ioniake sia Jesus Boanerges tibonannia “togat leleggu”),

¹⁸ ia geti Andreas, Pilipus, Bartolomeus, Mateus, Tomas, Jakobus togat Alpeus, Tadeus, Simon tai Kana

¹⁹ samba Judas Iskariot sipajo Jesus.

Jesus samba Beelsebul

²⁰ Lepa toili Jesus ka lalep. Parururangan minca sirimanua, pat taioinangan rapukom.

²¹ Kele araarep nia saeppunia, ei sia masiala nia, arakua poi sirimanua airoroan nia.

²² Kuarangan siagaisurat siooi sibara ka Jerusalem, “Aipasaileuan nia si Beelsebul. Utera sanitu le amasikau gege ka sia masiusiake sanitu.”

²³ Sogainangan sia Jesus, kuanangan ka matada ka bagat pasikat, “Kipa te iooi sanitu masiusiake sanitu?

²⁴ Ke paaggara bai purimataat pasasambada, ta matotom purimataat nenda.

²⁵ Samba ke paaggara bai sangalalep pasasambada, ta matotom pulalalepda.

²⁶ Kisedda leu te ke paaggara samba pasaggak bai purimataat sanitu pasasambada, ta matotom purimataatnia, masusubu le, tangeu.

²⁷ Beri sara siooi masiguruki lalep sirimanua simagege masiraurau bibiletnia ke ta ikabe boiki simagege nenda, ia pei oi iparauragi bibiletnia.

²⁸ Kukua nia ka matamui: Sangamberi jot sirimanua samba paloloiatda momoi tuappeake.

²⁹ Tapoi kasei masipaloloi Ketsat Sipunenan, ta tuaappeake nia teret buruburu. Aipoi jo sitaitatata le aigalaiake.”

³⁰ Aikua nene Jesus, lulut kukuada aipasaileu nia sanitu.

Ina samba sasarainan Jesus

³¹ Lepa oi inan Jesus samba sasarainania. Rio sia ka gerat, koiniakerangan sipasisosogai nia.

³² Sirimanua simigi ai sia mukukuddu masigoilik nia. Kuarangan ka matania, “Ai inam samba sasarainam, ai sia ka gerat airangengena ekeu.”

³³ Aleginangan nia Jesus, “Kasei inangku samba kasei sasarainangku?”

³⁴ Kinerenangan sirimanua sigoilik nia kuanangan, “Itco kam, koi ne inangku samba sasarainangku!

³⁵ Kasei poi sigalai siobat Taikamanua, nia te sarainangku, maniuku samba inangku.”