Mrk. 2 - BUKO SIPUNENAN

Pasialeat simasakit

¹ Pasat piga ngagogoi pa, oi minca Jesus ka Kapernaum. Maarepnangan ai nia ka lalep.

² Parururangan maigi sirimanua pat ta memet sia, beri ka matatbaliu ta anai kudduat. Tiboinangan leu Katuareman Simaeru ka matada.

³ Ia geti oi sipasitataroake simasakit ka matat Jesus, epat sia amasibairat.

⁴ Tapoi ta amoi araambit nia ka matat Jesus igit sirimanua. Bukarangan tobat ipot kudduat Jesus; lepa arabuka tobat, gorosotnakerangan simasakit ai nia ka peremannia.

⁵ Kele aiitco tonem bagada Jesus, kuanangan ka matat simasakit, “Sirou, atuappeakean jom!”

⁶ Tapoi ai leu piga pa siagaisurat mukuddu sedda; paaturangan ka bagada,

⁷ “Apate emenia sirimanua nene masikua kele nene. Aipaloloian Taikamanua. Kasei te momoi masiappeake jo, sarat Taikamanua le?”

⁸ Aiagaian poi paatuatda Jesus, kuanangan ka matada, “Nupaatu kodda kam kise ka bagamui?

⁹ Kipa le malabbei tukua ka simasakit, ‘Atuappeakean jom’, ele ‘Suruake ekeu, ala peremannu nupuenung’?

¹⁰ Tapoi bule nuagai kam nia kababarat geget Togatsirimanua masiappeake jo ka polak nene.” Kuanangan ka matat simasakit,

¹¹ “Kukua nia ka matam, suruake ekeu, ala peremannu nutoili!”

¹² Ka matadangan leu sangamberida suru nia; akkat peremannia, tuituiakenangan nia. Makiseinangan ka bagada sangamberida, umunrangan Taikamanua, pele nganganda, “Ia pei akuitco kai kele nene!”

Isogai si Lepi Jesus

¹³ Pasat nene ei minca Jesus ka bebet koat Galilea. Oi raoi sirimanua simigi ratagetnake nia, pangantomannangan leu sia.

¹⁴ Kele aitusabau Jesus sedda, itconangan si Lepi togat Alpeus ai nia mukukuddu ka kantor cukai. Kuanangan ka matania Jesus, “Tut aku.” Tusurunangan leu si Lepi, tutnangan Jesus.

¹⁵ Ka teteret aimukokom Jesus ka lalep Lepi, oi sia maigi sipuuku cukai samba sijo masipakomake Jesus sambada sipasiuluinia, aipoi maigi sia sipasitutut nia.

¹⁶ Kele araitco nia siagaisurat ka rubeiat Parise pakokomakena Jesus sipuuku cukai samba sijo, kuarangan ka matat sipasiului Jesus, “Ipakokomake kodda sipuuku cukai samba sijo?”

¹⁷ Arepnangan nia Jesus, kuanangan ka matada, “Simaron tubu ta anai kaura dokter, sarat simaoringen le. Ta masisogai sirimanua simaroipo akuoi, masisogai sijo le.”

Pagalaiat mupuaso

¹⁸ Ka sangaminca sipasiului Johannes Sipasirarau samba tai Parise amupuaso sia. Ia geti oi piga pa sia ka matat Jesus nounourangan nia, “Sipasiului Johannes Sipasirarau samba sipasiuluira tai Parise mupuaso sia; sipasiuluinu geti ta kodda mupupuaso sia?”

¹⁹ Aleginangan nia Jesus, “Mupupuaso pa alei siputatalimou, ai pei le siputatalimou ka talagada? Ujut ai pei le siputatalimou ka talagada ta mupupuaso sia.

²⁰ Tapoi babara te gogoinia ituala siputatalimou ka talagada, sedda pei te rapupuaso.

²¹ Beri sara sitakkopmake komang sibau ka leppei siburu. Ibibiritnake le poi leppei siburu takkoman nenda, mabeunangan biritnia.

²² Kisedda leu et ta anai sipasikakau anggur sibau ka suppit kulit siburu, ipupukpukngake le poi suppit siburu anggur sibau, mapilinangan anggur, makatainangan suppitnia. Ka suppit sibau le itukakau anggur sibau.”

Sipasiului Jesus masiakpek bera ka gogoi Sabat

²³ Ai sangaminca amuenung Jesus ka talagat monen bera ka gogoi Sabat. Ai sia mueenung akpekrangan ottit bera sipasiuluinia.

²⁴ Kuarangan tai Parise ka matat Jesus, “Itco pei! Ragagalai kodda simakeikei tugalai ka gogoi Sabat?”

²⁵ Aleginangan nia Jesus, “Tapei anubasa kam sigalai David, sibarana gejat bagania samba aipulaje sambada saaleinia?

²⁶ Guru nia ka Uman Taikamanua ka teteret imam sabeu Abiatar, komnangan roti simakeikei, – keraet rakom nia kasei pa, sarat tai imam le – samba ikau pei bagei ka saaleinia.”

²⁷ Kuanangan minca Jesus, “Kalulut sirimanua le aitubaraake gogoi Sabat, ta kalulut gogoi Sabat aitubaraake sirimanua.

²⁸ Oto Togatsirimanua Tuhan gogoi Sabat leu te.”