Mrk. 16 - BUKO SIPUNENAN

Katusuruat Jesus

¹ Kele aitukappulu gogoi Sabat, ei si Maria Magdalena, Maria inan Jakobus samba si Salome masisaki pasinginsingin bule ratulaji Jesus.

² Mamancep pei le ka gogoi siboiki menggui nenda, kele aibela sulu, ei sia ka ratei.

³ Patiborangan pasasambada, “Kasei pa takakau masiguilu bukku matatbaliu ratei?”

⁴ Kele araloggouake ratei, itcorangan atuguiluan bukku; makope beu poi bukku nenda.

⁵ Buluk sia ka bagat ratei, itcorangan sara silainge sipuleleppei simabulau muuddet isit kai kattoet, tugegerangan.

⁶ Kuanangan silainge, “Ba maloloto kam! Kuagai, ainugagaba kam Jesus tai Natsaret siniliktengaakenen. Taan anai nia sene, atusurungan nia! Itco kam kudduat katugalangannia.

⁷ Tapoi kenan le kam nusegeake kam nia ka sipasiuluinia samba kai Petrus, ‘Nia le muboboiki ka kam mei ka Galilea; sedda geti itcomuian nia, kele sikuania ka matamui.’ ”

⁸ Bela sia ka ratei tui sia aimugegeret tubuda, tugege bagei. Beri apa pa aratiboi ka sabagei, kalulut lotora.

Ipatoila tubunia Jesus kai Maria Magdalena

⁹ Kele aitusuru Jesus simancep ka gogoi siboiki mengugi nenda, patoilanangan tubunia boiki kai Maria Magdalena. Siburu aiusiake Jesus pitu sanitu ka tubunia. Ei sia tainanalep rasegeake nia kai Petrus samba ka saaleinia sangamberi sinegeakenen ka matada, ta mananta arasegeake.

¹⁰ Einangan leu si Maria Magdalena masisegeake ka matada sipaaleiake Jesus siburu, sipurereureu baga samba sipusosou ka teteret nenda. Pasat nenda sipasiuluinangan le punu tubut Jesus amasisegeake barania ka kabelaiat sulu teret ka kabelekat sulu katuareman sipunenan samba simatom pagalaiat puaragat sitaitatata.]

¹¹ Kele araarep puririmanuan Jesus samba iitcona nia si Maria Magdalena, ta amatonem bagada.

Ipatoila tubunia Jesus ka sirua sipasiului

¹² Pasat nene patoilanangan tubunia Jesus ka matata rua sipasiuluinia ai sia memei ka laggai; tapoi aipabagei le tubunia.

¹³ Toili sia rasegeake nia ka saaleira sabagei, tapoi ka sia leu et ta matonem bagada.

Ipatoila tubunia Jesus ka sipasiuluinia sipulusara

¹⁴ Kalepakatnia, patoilanangan tubunia Jesus ka sipasiuluinia sipulusara ai sia mukokom. Golunangan sia kalulut gulai tonem bagada samba kelat paatuatda, taimatonem bagada ka sipasiitco nia lepa aitusuru ka simamatei.

¹⁵ Kuanangan ka matada, “Kenan kam ka sangalio polak, ngantomanake kam Katuareman Simaeru ka sangamberi sirimanua.

¹⁶ Simatonem baga samba siturarau, ia te maaarau; sitaimatonem baga geti tuuukumake le.

¹⁷ Toggaiat sipaalei sia simatonem baga ia te: Rausiake sanitu ka oningku; ratiboake nganga sibau taiaagaietda.

¹⁸ Ke rarape ulou ele ralo gaut pasimatei, ta ilalango sia. Rape rarapeake kabeira ka sirimanua simabesi, male ramale.”

Katusakaiat Jesus ka sorga

¹⁹ Lepa aipanibo ka matada Tuhan Jesus, tuakkatnangan ka sorga, puuddetnangan isit kai kattoet Taikamanua.

²⁰ Eirangan leu sipasiuluinia masipaarep Katuareman Simaeru ka senen laggai. Romakenangan sia si Tuhan, ronakenangan ngantomanda kalulut kerek sipaalei sia. [