Mrk. 11 - BUKO SIPUNENAN

Katugurukat Jesus ka Jerusalem

¹ Kele aramalegere ka Jerusalem, airaamiake Betpage samba Betania, ka leleu Tula, koiniakenangan rua sipasiuluinia Jesus,

² kuanangan ka matada, “Kenan kam ka laggai ipot matamui. Gurumui le ka laggai nenda, sesemuian sara togat kalidei ai kasesereat, taiuuddenietda pei le sirimanua. Rugutmuian nia, ambitmuian nia sene.

³ Ke ai bai sipasirerere kam apa lulunia nururugut kam kalidei nenda, kuamui le, ‘Ai kauna nia si Tuhan, ta mauju itoiliake nia minca se.’ ”

⁴ Eirangan leu et, seserangan togat kalidei ai kasesereat ka bebet matatbaliu ka gerat, rugutrangan nia.

⁵ Nounourangan sia sipuririo sedda, kuarangan ka matada, “Apananmui nururugut kam kalidei nenda?”

⁶ Kuarangan kele sikuat Jesus ka matada, obaakerangan leu et nia.

⁷ Taroakerangan kalidei ka matat Jesus, apoakerangan leppeira ka teitei kalidei, jananginangan nia Jesus.

⁸ Maigi sia siapoake leppeira ka enungan, sabagei masipasaragai ran loina ka enungan sinaggirida ka mone.

⁹ Sirimanua sipuboboiki samba sipasitutut mugerei, “Hosanna! Kau imatulu tubunia siooi ka onin Tuhan!

¹⁰ Kau imatulu Purimataat siooi – Purimataat taikebbukatta si David! Hosanna ka Taikamanua Sipulubeunan!”

¹¹ Segena le Jesus ka Jerusalem, guru nia ka Uman Taikamanua. Itconangan sangamberinia sedda, lepa tui nia iei ka Betania sambada sipasiuluinia sipulurua, amasoiboan poi.

Itelei sileu Jesus

¹² Mancep, kele aratuitui barada ka Betania, malajenangan Jesus.

¹³ Ia geti itconangan ka sareunan sangaloina sileu simaeru buttet. Tagetnakenangan nia masiitco baleu ai buania. Kele aisege ka bakkat sileu, beri aisese buania, sarat buluk le, tapei poi aiaili pubuaiat sileu.

¹⁴ Kuanangan ka loinat sileu, “Buian rakom buam beri sara sirimanua teret buruburu!” Airaarep sipasiuluinia sikuania.

Ipalina Uman Taikamanua Jesus

¹⁵ Sege sia ka Jerusalem, guru Jesus ka Uman Taikamanua. Taddaakenangan ikekele sirimanua sipasasaki ka bagania. Bailuakenangan mejada sipasisisili bulagat samba uddenanda sipasisasakiake ngorut.

¹⁶ Ta aiobaake beri sara sirimanua masiambit apa pa masisabau gerat Uman Taikamanua.

¹⁷ Pangantomannangan sia Jesus pele ngangania, “Ta atusuratnakean ka Surat Sipunenan, ‘Uma panindogat ka sangamberi bangsa le tuoniake umangku?’ Tapoi anubailiuake le kam nia ngaliura sipasiraraurau!”

¹⁸ Tiboiet nene araarep tai imam sabeu samba siagaisurat. Gabarangan paluluat itumateiake Jesus; maloto poi sia ka tubunia, aipoi sangamberi sirimanua makisei ka baga masiarep ngantomannia.

¹⁹ Kasoibokat, tui minca Jesus samba sipasiuluinia, kaddiuakerangan kota.

Nganturat sibabara ka loinat sileu simamattei

²⁰ Kele aratusabau simancep, itcorangan sileu amatteian pat aili ka ungatnia.

²¹ Repdep airepdep nia si Petrus, kuanangan ka matat Jesus, “Guru, itco pei sileu siteleinu amatteian.”

²² Kuanangan ka matada Jesus, “Kau imatonem bagamui ka Taikamanua!

²³ Kukua nia ka matamui: kasei pa sikua ka leleu nene, ‘Akkatnake ekeu, ribbaiake tubum ka koat!’ ta bai makarat bagania, tapoi matonem bagania ipuaili sikuania, ta isosoppi ipuaili.

²⁴ Ia te lulunia kukua ka matamui: Ke manindou kam nutiddou kam apa pa, samba matonem bagamui iaake Taikamanua sinindoumui, ta isosoppi nusilo kam nia.

²⁵ Samba ke manindou kam, tapoi ai ngungut bagamui ka tubut kasei pa, appeake kam boiki seleda, bule iappeake leu selemui Ukkuimui ka sorga. [

²⁶ Ta geti nuappeake kam, ta leu et iaappeake selemui Ukkuimui ka sorga.”]

Panounogat pagalaiat geget Jesus

²⁷ Lepa ei minca Jesus samba sipasiuluinia ka Jerusalem. Aimugegejek Jesus ka bagat Uman Taikamanua, oi ka matania tai imam sabeu, siagaisurat samba tai bajara tai Jahudi

²⁸ nounourangan nia, “Ka geget apa nugalai nene? Kasei amasiake gege kekeu masigalai nene?”

²⁹ Kuanangan ka matada Jesus, “Kunounou kam boiki sara panounogat. Ke nualegi kam, kuakungan leu ka matamui ka geget apa kugalai nene.

³⁰ Pasiraukat Johannes nenda, sibara ka Taikamanua ele sibara ka sirimanua? Alegi pei kam!”

³¹ Patiborangan pasasambada kuarangan, “Ke takua, ‘Sibara ka Taikamanua,’ kuanangan te ka matata, ‘Oto angoi ta matonem bagamui ka tubunia?’

³² Tapoi ke takua, ‘Sibara ka sirimanua,’ maloto sita ka sirimanua simigi, aipoi sangamberida arapunabingan si Johannes.”

³³ Kuarangan raalegi Jesus, “Ta kuagai kai.” Kuanangan ka matada Jesus, ‘Oto kaku leu ta kukukua ka matamui ka geget apa kugalai nene.”