Mrk. 10 - BUKO SIPUNENAN

Pagalaiat pagalangan

¹ Lepa tuitui Jesus sedda ei nia ka laggaira tai Judea samba ka silat oinan Jordan. Sedda leu oi sia sirimanua simigi paruru ka matania; samba kele simareirei pangantomannangan sia.

² Ia geti oi piga pa tai Parise masisibo Jesus. Nounourangan nia, “Momoi leu igalak sinanalepnia simanteunia?”

³ Aleginangan nia Jesus, “Kipa aikua ka kam si Mose?”

⁴ Kuarangan, “Iobaake le si Mose igalak sinanalepnia simanteunia, ke ikau surat pagalangan.”

⁵ Kuanangan ka matada Jesus, “Kalulut kelat paatuatmui le aisuratnake surukat nene ka kam si Mose.

⁶ Tapoi taddanangan aibaraake sirimanua Taikamanua aibaraakean sia simanteu samba sinanalep.

⁷ Ia te lulunia ikakaddiuake ukkui samba inania simanteu iloplopmake tubunia ka sinanalepnia,

⁸ bailiunangan sia sangaakkula. Oto taan rua, sangaakkulaan le sia.

⁹ Siloplopmakenen Taikamanua poi ta momoi ipasaraake nia sirimanua.”

¹⁰ Kele aratoili ka lalep, nounourangan nia minca sipasiuluinia pagalaiat nene.

¹¹ Kuanangan ka matada Jesus, “Kasei masigalak sinanalepnia, lepa putalimounangan ka sinanalep bagei, sipaeelet le nia ka sinanalepnia nenda.

¹² Kisedda leu et sinanalep sipasigagalak simanteunia, putalimounangan ka simanteu bagei, sipaeelet leu nia.”

Isukatnake tatoga Jesus

¹³ Ia geti taroakerangan tatoga ka matat Jesus bule irape sia. Tapoi aragolu le sia sipasiuluinia.

¹⁴ Itco aiitco nene Jesus, pugolunangan, kuanangan ka matada, “Obaake kam tatoga raoi kaku, ba kekera kam sia; sirimanua kele nene le poi sibakkati Purimataat Taikamanua.

¹⁵ Kukua nia ka matamui: Kasei pa ke ta kele tatoga ipasiala Purimataat Taikamanua, ta tuguguru nia ka bagania.”

¹⁶ Lepa lakkaiakenangan tatoga Jesus, kaunangan kabeinia ka utera sukatnakenangan sia.

Sirimanua simakayo

¹⁷ Kele aibela Jesus iriuriuake puenunganannia, oi sara sirimanua pabalau ka matania. Purapponangan ka matat Jesus inounou nia, “Guru simatopit, kipa kugagalai bule kuikepmake purimanuaiat sitaitatata?”

¹⁸ Kuanangan ka matania Jesus, “Nukukua kodda aku simatopit? Ta anai kasei pa simatopit, sarat Taikamanua le.

¹⁹ Surukat Taikamanua anuagaian, ‘Bui nupamatei; bui nupaelet; bui nupanangkou; bui numunengake boko; bui nupajo sirimanua; suru ukkuinu samba inam!’ ”

²⁰ Kuanangan simakayo, “Guru, sangamberinia nene akugalaiakean ka pusulekatku pei le.”

²¹ Kinerenangan nia Jesus, manuntunangan bagania, kuanangan ka matania, “Ai pei sara simagulai kekeu. Kenan sakiake sangamberi sibabara ka tubum, kaunungan bulagatnia ka simageba, bara ibara pukayoatnu ka sorga; lepa oi ekeu masitut aku.”

²² Kele aiarep tiboiet nene mabelenangan bagania, tui nia ka reureu baga, simakope kayo le poi nia.

²³ Kinerenangan sipasiuluinia Jesus kuanangan ka matada, “Apate besi ka simakayo tuguru ka Purimataat Taikamanua.”

²⁴ Kisei le ka bagada sipasiului araarep tiboiet Jesus nene. Tapoi kuanangan minca Jesus, “Ale tatogaku, bulat mabesi tuguru ka Purimataat Taikamanua.

²⁵ Onta pei le malabbei tubuluk ka matat susuilak ka simakayo tuguru ka Purimataat Taikamanua.”

²⁶ Makeppunangan ka bagada sipasiului kuarangan pasasambada, “Oto kaseian le masisesese puaragat?”

²⁷ Kinerenangan sia Jesus kuanangan, “Ka sirimanua bai nia ta momoi; tapoi ta kisedda ka Taikamanua. Aipoi ka Taikamanua sangamberinia le momoi.”

²⁸ Kuanangan si Petrus, “Akukaddiuakean tebai kai sangamberinia masitut ekeu.”

²⁹ Kuanangan Jesus, “Kukua nia ka matamui: senen sikaddiuake lalepnia, ele sasarainania, ele samaniunia, ele inania, ele ukkuinia, ele tatogania, ele monenia kalulut aku samba kalulut Katuareman Simaeru,

³⁰ ka tetere kineneiget pei le isisilo sangotu ngaminca lalep, saraina, maniu, ina, tatoga, mone, kenanen ka bagat paoreat. Samba ka gogoi sialu ikepmakenangan purimanuaiat sitaitatata.

³¹ Tapoi maigi sipuboboiki ibabailiu sikateitei samba sikateitei ibabailiu sipuboboiki.”

Pangasegekat Jesus sikatelunia pagalaiat kamateiatnia

³² Ai sia mueenung raei ka Jerusalem, Jesus samba sipasiuluinia, boikiakenangan tubunia Jesus ka sipasiuluinia. Makiseinangan ka bagada sipasiuluinia samba sipasitutut ka teitei leu bailiu maloto. Ia geti sogainangan minca sipasiuluinia Jesus sarada segeakenangan ka matada sipuaaili geti ka tubunia.

³³ Kuanangan, “Aian tebai sita mananatara ka Jerusalem, seddangan te itusesegeake Togatsirimanua ka tai imam sabeu samba siagaisurat, raukum nia imatei samba rasegeake nia ka sipuarat sabulungan.

³⁴ Paloloirangan nia, lujirangan nia, boborangan nia samba mateiakerangan nia. Tapoi pasat telu ngagogoi suru nia minca.”

Panindogat Jakobus samba Johannes

³⁵ Lepa oi si Jakobus samba si Johannes tatogat Sebedeus ka matat Jesus kuarangan ka matania, “Guru, ai tiddogetmai akenenenu ka kai.”

³⁶ Kuanangan ka matada, “Aponia tiddogetmui akenenku ka kam?”

³⁷ Kuarangan ka matania, “Bule nukau kai muuddet sara kai kattoet, sara kai katsiunu ka pulatsanannu geti.”

³⁸ Kuanangan ka matada Jesus, “Ta nuagai kam tiddogetmui. Momoi pa nulo kam ka pulokat pangoringan loketku? Ele momoi pa turau kam pasiraukat rauakenen ka tubuku?”

³⁹ Alegirangan nia, “Momoi.” Kuanangan ka matada Jesus, “Nulolo tedda kam ka pulokat pangoringan loketku, samba turarau tedda kam pasiraukat rauakenen ka tubuku.

⁴⁰ Tapoi muuddet kai kattoet ele kai katsiuku, ta aku tuteteu. Aipoi sipuuddet sedda sarat sia pinatarek Taikamanua le.”

⁴¹ Kele araarep nia sipasiului sipulu, mangoingoinangan bagada kai Jakobus samba kai Johannes.

⁴² Ia geti sogainangan sia Jesus kuanangan ka matada, “Nuagai kam, saute ka polak, masipaneinei bangsada le sia, samba sia siabeu mugege le ka tubuda.

⁴³ Ka kam geti bui kisedda. Ke ai ka talagamui sioba muabeu, kau le ibailiu nia sipuuku kam.

⁴⁴ Samba ke ai ka talagamui sioba muute, kau le ibailiu nia paguguletmui.

⁴⁵ Aipoi beri Togatsirimanua ta mubeunan aioi, mupagugulet le samba masikau engania panebui simigi.”

Ialeake si Bartimeus simapeset Jesus

⁴⁶ Ia geti sege Jesus ka Jeriko. Kele aituitui Jesus samba sipasiuluinia samba sirimanua simigi ka Jeriko, ai sara simapeset sipuoni si Bartimeus, togat Timeus, ai nia mukukuddu ka bebet enungan manindou panguruat.

⁴⁷ Kele aiarep Jesus tai Natsaret le tusasabau pugereinangan, “Jesus, Togat David, kau imakate bagam kaku!”

⁴⁸ Aserangan nia sirimanua simigi ipumengmeng. Tapoi ia pei iabeuake ipugerei, “Togat David, kau imakate bagam kaku!”

⁴⁹ I geti tokko Jesus, kuanangan, “Sogai kam nia.” Sogairangan simapeset, kuarangan ka matania, “Bui imakarat bagam, suruake ekeu, aisogaian ekeu Jesus.”

⁵⁰ Ribbaiakenangan sobbenia simapeset, suru nia iei ka Jesus.

⁵¹ Kuanangan ka matania Jesus, “Aponia noba kugalai ka tubum?” Aleginangan nia simapeset, “Bule imaitco mataku, Guru.”

⁵² Kuanangan ka matania Jesus, “Kenanan, aiabauakean ekeu tonem bagam.” Maitconangan leu et matania, tutnangan Jesus ka puenunganannia.