Mrk. 1 - BUKO SIPUNENAN

Ngantoman Johannes Sipasirarau

¹ Ia te nene panandaat Katuareman Simaeru pagalaiat Jesus Kristus, Togat Taikamanua.

² Kele sinuratnakenen nabi Jesaya, “ ‘Koi ne pakoinietku,’ ngangan Taikamanua; ‘kukoiniake nia muboiki kekeu, masipapa enungannu.’ ”

³ Ai nganga sipusosoga ka simatangeu, ‘Tarekngake kam enungan Tuhan; roipoake kam pusilaiatnia.’ ”

⁴ Kisedda te aioi si Johannes Sipasirarau ka simatangeu masingantomanake pasiraukat pasibau paatuat, katuappekat jo.

⁵ Oirangan leu sangamberi sipulaggai ka Judea samba tai Jerusalem masitagetnake nia. Seseakerangan joda, raunangan sia si Johannes ka oinan Jordan.

⁶ Leppei Johannes geti bulut onta le, akkik tengania kulit, sin samba suan mani le komennia.

⁷ Pungantomannangan pele ngangania, “Kurukku momoi te sisaliu pei le biunanku; beri tulukkuk masirugut talit tarangainia ta mateu aku.

⁸ Aku kaku kurau kam oinan le, ka sia geti rauakenennia ka kam Ketsat Sipunenan le.”

Katuraukat Jesus

⁹ Ka teterenia nenda oi Jesus barania ka Natsaret ka Galilea, raunangan nia si Johannes ka oinan Jordan.

¹⁰ Sakaina le barania ka oinan, itconangan tubuka manua samba Ketsat Taikamanua kele tubut ngorut mei ka tubunia.

¹¹ Maarepnangan nganga sibara ka sorga masikua, “Ekeu te Togaku, kilibet bagaku, obaket bagaku te ekeu.”

Katusiboat Jesus

¹² Lepana le nenda ambitnangan Jesus Ketsat ka simatangeu.

¹³ Pukuddunangan sedda epat pulu ngagogoi, isibo nia Sanitu. Ai nia sedda ka talagat tarimeu simasakbak, tapoi ai samalaika masipuuku nia.

Isogai sipasiuluinia siboiki Jesus

¹⁴ Pasat arapenjaraake si Johannes, ei Jesus ka Galilea masipaarep Katuareman Simaeru sibara ka Taikamanua,

¹⁵ kuanangan, “Aiailingan teterenia, amalegerengan Purimataat Taikamanua. Bauake kam paatuatmui, samba kau imatonem bagamui ka Katuareman Simaeru!”

¹⁶ Aimueenung Jesus ka bebet koat Galilea, itconangan si Simon samba sarainania si Andreas ai sia mujajarik ka koat, sipasiiba poi sia.

¹⁷ Kuanangan ka matada Jesus, “Konan kam tut kam aku, kubailiuake kam sipasijajalo sirimanua.”

¹⁸ Kaddiuakerangan leu jarikda, tutrangan Jesus.

¹⁹ Enung nia goiso, itconangan minca si Jakobus samba sarainania si Johannes tatogat Sebedeus, ai sia ka abak, airapeperu jarikda.

²⁰ Sogainangan leu et sia Jesus. Kaddiuakerangan leu ukkuira si Sebedeus ka bagat abak samba sirimanua upaiet, tutrangan Jesus.

Sirimanua pinasaileu sanitu

²¹ Ia geti sege sia ka laggai Kapernaum. Ka gogoi Sabat ei Jesus ka uma parurukat mungantoman.

²² Makiseinangan ka bagada raarep ngantomannia, kele sirimanua sibara gege le poi ipungantoman, ta kele siagaisurat.

²³ Ka teterenia nenda ai sara sirimanua pinasaileu sanitu ka bagat uma parurukat pugereinangan,

²⁴ “Apa nuaala se, Jesus tai Natsaret? Moi ekeu masilangoake kai? Kuagai kasei ekeu: Sipunenan sibara ka Taikamanua le ekeu!”

²⁵ Asenangan nia Jesus, “Mengmengake ekeu, belaake ekeu ka tubunia!”

²⁶ Pangitngitnangan sirimanua nenda sanitu, pugereinangan, bela nia ka tubunia.

²⁷ Makiseinangan ka bagada sangamberi sirimanua, paiserangan leu pasasambada, “Aponia nene? Ngantoman sibau! Magege nia masiusiake ketsat sanitu, ketsat sanitu leu rareddet ngangania!”

²⁸ Mararatnangan leu katuareman Jesus ka sangalio laggai Galilea.

Ialeake Jesus maigi sirimanua

²⁹ Kele arabela ka uma parurukat, ei Jesus sambada si Jakobus si Johannes ka lalep Simon samba Andreas.

³⁰ Talikut Simon sinanalep ai nia ka pereman muroroket. Segena le Jesus ka lalep, segeakerangan ka matania pagalaiat nia.

³¹ Ei Jesus alanangan kabei talikut Simon, suruakenangan nia. Tata roketnia, puukunangan sia.

³² Kasoibokat, abelean sulu, taroakerangan ka matat Jesus sangamberi simabesi samba pinasaileu sanitu.

³³ Sangalaggaiatda nenda ruru ka bebet matatbaliu.

³⁴ Aleakenangan maigi siorik sene ngamata besi, samba iusiake maigi sanitu. Ta aiobaake Jesus rapanibo sanitu, raagai poi nia.

Jesus mungantoman ka Galilea

³⁵ Simancep, magepgep pei le, suru Jesus bela nia kal lalep, ei nia ka kudduat simatangeu manindou.

³⁶ Kukuruakenangan nia si Simon sambada saaleinia.

³⁷ Kele arasese nia kuarangan ka matania, “Sangamberi sirimanua masigaba ekeu.”

³⁸ Kuanangan ka matada Jesus, “Sita kam ka laggai bagei simalegere se, bule mungantoman leu aku sedda, ia poi lulunia akuoi.”

³⁹ Gejenginangan Jesus sangalio Galilea, pungantomannangan ka uma parurukatda samba masiusiake sanitu.

Ialeake Jesus sara simabogbong

⁴⁰ Ia geti oi sara simabogbong ka matat Jesus, purapponangan manindou, pele ngangania, “Noba bai nia, ta isosoppi nualeake aku.”

⁴¹ Makatenangan bagat Jesus, totoiakenangan kabeinia irape nia, kuanangan ka matania, “Kuoba, kauan numale!”

⁴² Tata itata bogbongnia, malinanangan tubunia.

⁴³ Lepa koiniakenangan nia Jesus ituitui, paneineinangan nia simakope,

⁴⁴ kuanangan ka matania, “Pagaba, bui nupoiliat nia ka kasei pa. Tapoi kenan le nupaitco tubum kai imam; ia geti buluakenungan buluakenen siripot sikuat Mose, masipakoinong ka matada kamamalem.”

⁴⁵ Tapoi ka sia geti kele aituitui paarepnangan nia kaipa kaipa. Bulat maigi aitiboi, pat taioinangan ipuenung Jesus ka laggai ka simatoila. Ka kudduat simatangeuan le aikuddu; tapoi ia leu ne oira masitagetnake nia sibara ka senen laggai.