Mik. 7 - BUKO SIPUNENAN

Katai paraboatdra tai Israel

¹ Pa'an te kekeu! Aku kele simalaje siooi masimonei buat kaju lepat ipubua. Ta' anai buat kaju ka loinania. Buat anggur samba sileu simaerunia asapprungan aitumonei.

² Sirimanua simaroipo amapepengan ka laggai sirimanua, sirimanua simatopit ka Taikamanua ta'an akusese sia minca. Senen sirimanua masingena tetere kamateiat senenda masigalai sesera ka saaleira.

³ Sangamberidda maagai masigalai jo. Saute samba tai sipasiukum masitiddou bulagat simalolit sikebbukat laggai masigalaiake siobat bagania kisedda te rapukere baga simakere.

⁴ Bulat simakope roipo sibara ka talagaddra kele parou sita'anai katukaunan. Aiailingan teterenia Taikamanua masiukum pamianNia kele' siparepdepnia ka tai nabi-nabiNia. Kineneiget aian pugaugaupat ka talagatdra.

⁵ Bui imatonem bagam ka pabebeakenennu lalep, bui nupuaddai ka saalei. Pagaba tiboietnu kenanen sipasiarep iate sinanalepnu.

⁶ Aipoi ka sara tetere kele nene, pasaggak le sia ka bagat lalep: toga simanteu masipaloloi ukkuinia, toga sinanalep masisaggangi inania samba taliku sinanalep pagolu ka ina talikunia.

⁷ Tapoi tukaroni kai Tuhan: Ka sut tonem bagatta tangenaake Taikamanua. Iarepi panindogatta samba ipaarau sita.

Tuhan masipaarau

⁸ Ta' anai enungan bagei ka saggakta muangka baga kalulut kakakataita. Aipoi kenanen bai bele sita tusuru le sita minca. Kineiget ai sita ka gepgep tapoi itoroiji le sita si Tuhan.

⁹ Amajongan sita kai Tuhan, kalulut nenda agaitangan goluNia kineneiget. Tapoi tamauju minca ropmakenangan sita samba akenangan ka sita puroipoat. Abbitnangan sita ka pato: taagai kam senenta Nia sipaarau sita

¹⁰ Siboiki saggakta masipaloloi sita sam, ba rakua “Kaipangan Tuhan Taikamanuam nenda?” Tapoi kineiget raitco aponia sigalai Tuhan ka tubudda samba bailiu maaila sia. Munengaketangan aramakala tai saggak samba tupaperaki sia kele loti ka enungan.

¹¹ Ale Jerusalem! aiailingan teterenia nugalai minca irip laggainu. Ka gogoi nenda kupkumen laggai tupalio.

¹² Sangamberi sirirmanua toili minca ka tubum sibara ka senen kudduat – sibara ka Asyur ka isit kabelaiat sulu, sibara ka Misir isit ka bare, sibara ka oinan Efrata, sibara ka silat koat samba sibara ka leleu ka sareunan.

¹³ Tapoi polak ibailiu magarak kalulut jodra sipulalaggai.

Panindogat masitiddou pukatekat baga Tuhan katubutda tai Israel

¹⁴ Oi Tuhan, jago le pamianNu, paamian sipilim. Ai sia mukuddu ka se'se' simatangeu kabagat polak simagabru. Eddangan ibara komendra ka mone Basan samba Gilgat, kele ka teteret siburu.

¹⁵ Galaiake pukerengan kakai, oi Tuhan, bule sigalaiNu siburu kateteret anuabbit kai bela ka laggai Misir. Bangsa sipasiitco nene bailiu maila kalulut raagai sangamberi ron tubudda tak anai paluluatnia. Sappru le patuadda, pat taiioinangan rapatibo ele rapasiarep.

¹⁶ Eddangan raiitconia sangamberi bangsa samba ramaila kalulut sangamberi puroronra; eddangania rapetpet ngungunra pasamba kabei, samba talinganra ibailiu matakkep.

¹⁷ Puguruirangan ka polak kele ulou kaloto samba kageret tubu bela sia ka pujagoatda, lepa oi sia katubum, oi Tuhan Taikamanuamai.

¹⁸ Ta' anai Taikamanua kele Ekeu, Oi Tuhan, sipasiappeake jot paamian sipilim sipulelegei. Ta' kasanganantania nupugolu; bailoknia mangka le bagam masipakoinong nuntut bagam sita tetere nenda.

¹⁹ Nupununtuki le kai baga minca samba nuappeake kai. Jomai nupaperaki samba nuribbaiake ka saisai koat!

²⁰ Ka tubutda sapamianNu, muntogat Abraham samba Jakob nupakoinong putopinanNu, samba nuntut bagam sitaitatakki nenda kele sipalelekNu ka tubut taikebbukatmai siburu.