Mik. 5 - BUKO SIPUNENAN

Palelengan Taikamanua pagalaiat sipuute sibara ka Betlehem

¹ Kuanangan si Tuhan, “Oi ekeu Betlehem Efrata, sara laggai sigoiso' ka Jehuda! Katubum Kususuruake te sara sipaneneinei Israel.”

² Oto, iobaake' le paamiannia si Tuhan raguruki sia taisaggakdra teret iteuake' sinanalep nenda ibailiunia ina sipasitu'tu'ake matania. Lepa' nenda sangamberidra sia sikuddu ka pasiribbaiat tupatabra sia minca' ka bangsadra.

³ Iageti galaiakenangannia samba jagonangan sia kabagat ron Tuhan, kabagat puaabeu onin Tuhan Taikamanuania; pukuddurangan leu simariuriu, kalulut kineneiget ibailiu le nia siabeu pat aili ka tu'tut polak,

⁴ samba bailiunangannia paabanan. Ke'bai tuguru Asyur ka laggaita samba ke'bai rapaperaki polakta, iageti ei sia masisaggangi sia pitu pasijago, samba balu sipasiuteake sirimanua.

⁵ Sia nenda rakalaake' le laggai Asyur pasamba lanjau samba laggai Nimrod pasamba lanjau situooppat; belaakerangan geti sita ka Asyur, ke' bai tugurunia ka laggaita samba masipaperaki laggaita.

⁶ Tai Israel sipulelegei bailiunangan sia tinobut simaleppet sibara kai Tuhan, masileppeni bangsa simigi, samba kele iurani siureman. Puaddairangan ka Taikamanua, samba ta kasirimanua.

⁷ Tai israel sipukukuddu ka talagatda sangamberi bangsa kele singa katalagat tarimeu ka leleu ele ka talagat mungkuat biribiri ka su'su' simaparou. Tugurunangan singa ka talagat mungkuat biribiri nenda paperakinangan sia samba pasabbanginangan sia! Beri sara sia siooi masibelaake biribiri nenda.

⁸ Israel masikalaake' saggaknia samba pakatainangan sia sangamberidra.

⁹ Kuanangan si Tuhan, “ka teteret nenda sapruakekungan sangamberi kuromui samba subuakekungan kereta pasaggaknu.

¹⁰ Tobbou laggaimui sibara kekre Kupakakatai le', samba sangamberi pujagoat mui Kuraragatnake le'.

¹¹ Jagot tubum Kutatataake le' samba sangamberi siagai mupatuptuman Kukaritnake.

¹² Pakataikungan leu et sangamberi tularat samba bukku arigi kalotoakenen keramatnu; taan nupaninindogi kam buluijiet sigalai kabeinu.

¹³ Bukkatnakekungan arigit katsailamui taikamanuan Asyur ka laggaimui, samba laggainu sibara kekre pakataikunganNia.

¹⁴ Ka bagat goluKu sabeu siliakekungan pukakatai ka sangamberi bangsa sitaimareddet ka tubuKu.”