Mik. 4 - BUKO SIPUNENAN

Si Tuhan masiparenta polak ka bagat aban

¹ Ka gogoi sibabara, tinambu kudduat uman Tuhan, muririo simabuak sisaliu sangamberi leleu samba tinambu. Sangamberi paamian masiailiake sedda.

² Sangamberidra masikua, meikam sita ka leleu Tuhan, ka uman Taikamanuan Israel! Igelaiake katubutta, aponia galaiaakenenta, tatut kam enunganNia, aipoi tiboiet Tuhan momoi sibara ka Jerusalem; ainia ka Sion panibonangan ka tubutdra sapaamianNia.

³ Lepaakenangan si Tuhan pakaroat, katalagatdra sapaamianNia, ka talagat tobbou laggai simagege, kasareunan samba ka leggere. Panindourangan lanjau bailiu papakru samba sosoat bailiu sasabi. Sabangsa taan masisasaggangi sia, taan rapatatarek tubutdra pasaggak.

⁴ Senen sirimania murimanua ka bagat aman, samba aban katalagat monen anggur samba kamonen sileunia; taanai siapalotoki sia, nenda ta palelengan Tuhan Sipulugege.

⁵ Senen-senen bangsa ka polak, manindou samba masireddet taikamanuania. Tapoi sita geti kau tareddet kam Tuhan Taikamanua, samba manindou ka tubunia teteret buruburu.

Katoiliadra tai Israel baradda ka kudduat katuribbaiat

⁶ Kuanangan si Tuhan; “Ai te teterenia kururuake sia siukumKu iate sia sipangongorik ka pasibbaiat.

⁷ Ai lulukngan sia samba mareunan sia kapulaggaiadra. Tapoi sia sipulelegei nenda, kutaddaake le sara reddenan sibau. Bailiunangan sia sara bangsa sabeu samba simaron. Parentaakekungan sia ka susut Sion teret buruburu.”

⁸ Ekeu Jerusalem kudduat Taikamanua masijago paamianNia kele sipasijajago ijago biribirinia, toiliake ekeu minca ibailiu inan laggai purimataat kele siburu.

⁹ Angoi makope nupusou? Angoi nupangorik kele tainanalep sipususule? Tapa kalulut tatania Rimatam samba sipangantoman kam atataan?

¹⁰ Kam sipulaggai ka Jerusalem, betukam tubumui samba pangorik kele tainanalep sipususule! Ai poi, kineneiget bui tanikaddiuake kam lagggai samba kudduat mui ka susu. Bui ta mei kam ka Babel, tapoi sedda belaakenangan kam si Tuhan ka saggakmui.

¹¹ Maigi sabangsa suparuru masisaggangi ekeu, ale Jerusalem! Kuadrangan, “Jerusalem bui tatupakatai! Kuitco le kai laggai nenda ibailiunia siragatat!”

¹² Tapoi sabangsa nenda taraagai aponia pinaatut Tuhan. Taraagai rururuakena sia si Tuhan, bule iukum sia. Makere le kele gandum siruruakenen bule itulabo.

¹³ Kuanangan si Tuhan, “Kam sipugagalai ka Jerusalem, konan kam samba paperaki kam saggakmui! Kubailiuake le kam maro kele jaui sipubaban laba samba sipususulet tembaga. Pakataimuian bangsa simigi samba pukaioadra saialara kapasirauragat. Panguruatakemuiannia katubukku, Tuhan sibakkat polak.”

¹⁴ Kam, sipugagalai ka Jerusalem tiddoukan simatone bule iropake kam si Tuhan! Airagogoilik sita! Saggak ai rasasaggangi siuteake Israel!