Mik. 3 - BUKO SIPUNENAN

Si Mikha masisaggangi sautet Israel

¹ Arepmake kam, ale sipuute' ka Israel! Siripokatnia nuaagai kam aponia simaroipo,

² tapoi malaga le bagamui ka simaeru samba muangka baga le kam ka sikatai. Pabiritmuian kulitdra sa paamianKu samba akkula ka tolatdra.

³ Sappruakemuaian paamianKu kulitdra pabiritmuiannia samba pakataimuian tolatdra. Pagutgutimuian sia, kele nugutgut kam akkula itukau ka koali.

⁴ Ai leu teterenia nupugereikam masitiddou paroman kai Tuhan, tapoi ta aialegi kam. Taan iarepi panindogatmui, kalulut anugalaian kam sikatai.

⁵ Arapajongan sapaamianku tai nabi, sia siagai sipuaaili simeru katubutdra sipasikakau bulagat, masisaggangi samba masipaepe sirimanua sitaipasikakau. Kise te aipanibo si Tuhan katubutdra tai nabi,

⁶ “Kam tai nabi, teterem amalegerengan; bebele'an le sulu. Taan babara katubum pasiitco simakolou siisiakenenKu. Taan momoi nupasitoggaiji apa pa.”

⁷ Sirimanua siagai sipuaaili ka gogoi sibabara bara ailatdra kalulut ta' amuaili kele sikuatda. Maailadrangan sangamberidda, kalulut taaialegi sia Taikamanua.

⁸ Tapoi pagalaiat putubuatku nene, aiuruake'an ketsat samba gegeNia si Tuhan. Katubukku iake' puaagai pagalaiat katuroipoat samba leu et gege masipoiliat jo katubutdra tai Israel.

⁹ Arepake' kam tiboietku nene, ale kam sautet Israel sipulagaki baga simaroipo samba sipasiaake katuroipoat.

¹⁰ Paerunungan Jerusalem, laggai Taikamanua siripokat pamamatei samba taimaroipo.

¹¹ Sautet laggai masiparentaake bule' ibara bulagat kaenungan sitaimaroipo samba tai imam masigalaiake' surukat Tuhan bule ibara upa, samba tai Nabi masitiddou enungan sibara ka Taikamanua, bule ibara bulagatdra. Iageti sangamberidra masipaatu si Tuhan ainia karubeiatdra. Kuadrangan, “Si Tuhan ainia katalagatta; taiorak sita paoreat.”

¹² Lulut pukakatainu nenda, Sion tupakru kele mone, Jerusalem tubailiuake pasitabbui siragatat samba tinambut lalep Tuhan bailiu mase'se'.