Mik. 2 - BUKO SIPUNENAN

Uktuk tubutda sipasioorei si mageba

¹ Paan te kakam siisiake sikatai, kenanen ai kam memerep sinoibo, lepa galaiakerangannia simanceman aipoi aironda masigalaiakenia.

² Kemakiddi bagada masibakkati mone, rauraurangannia. Kemakiddi bagada masibakkati lalep, alaurangania. Bibilet samba lalep, taanai simaaman.

³ Ia geti kuangan si Tuhan, “Kuusiake' le pasisiobat ka tubumui bule bui ioi nubela kam. Kateteret taimaungtuk taan mueenung kam kabagat buak paatuat.

⁴ Uktuk tubum rapakei le sirimanua sibailui pasailukat, samba leu ragalai urai pureureugat baga. Aialaan si Tuhan laggaimai nene samba aikauannia ketubutda sipasiuukumkai.

⁵ Kelulut nenda, keaiailingan teterenia itutoiliake laggai nenda katubutda sabangsat Tuhan, berisara katalagamui sipasisilo rubeiatna.

⁶ Sirimanua mungantoman katubukku, kuanangan, “Bui nupungantoman katubumai. Bui nupungantoman pagalaiat sangamberinia nenda. Taipakakailakai.

⁷ Bui nupaatukam tai Israel aiteleian sia si Tuhan! taigagalaiake kele nenda si Tuhan. Maom le bagaNia. Tapa amanibonganNia kaerut baga katubutda sirimanua sipasigagalaiake simaroipo?”

⁸ “Aleginangannia siTuhan, kam te sipasisaggangi paamianku. Toili sia kapasaggangan rakaroni masanang le sia kalalepdra, tapoi anungena le kam sia sedda bule' nuraurau kam lalepdra.

⁹ Tainanalep katalagat paamianku tuituiakemuian sia ka lalep simanuntu bagadra, samba rauraumuian sia teret buruburu'. Bujai kukau katubut tatogadra.

¹⁰ Suruake' ekeu samba tuitui ekeu; sene' taanai amaaman. Jo samba paoreat aibaraake simakope ka kudduat nene.

¹¹ Nuoba' kam nabi sioba paboko samba pataju samba sioba masitoggaiji bule ibara anggur samba lo simapuinengen simalilimai.”

Palelengan pagalaiat katuaragat

¹² Kuanangan minca si Tuhan, “Kam tai israel sipulelegei! Kurururuake te kam samba Kusaraake kele biribiri sitotoili ka gelinia. Kele biribiri ka su'sut parou, kisedda leu et laggaimui sun minca sirimanua.

¹³ Buka'akekungan enungan samba ambitkungan kam bela ka pasiribbaiat. Pakataimuian gugurukat samba ei kam ka siobat bagamui. Aku, si Tuhan, iate Rimatamui samba sibelaake' kam.”