Mik. 1 - BUKO SIPUNENAN

Ute'

¹ Ka sara laggai sigoiso sipuoni Moresyet, sedda ai sara sipuoni si Mikha. Kateteret laggai Jehuda iuteake Rimata Jotam, Ahas samba Hezkia, si Mikha masisilo' paneneiat Tuhan pagalaiat Samaria samba Jerusalem.

Geri ka tai Samaria samba Jerusalem

² Arep ake' kam, ale sabangsa-bangsa! Lelekake kam, ale sipulalaggai ka sangalio polak! Tuhan sikuddu ka pata moinia, bailiu imunengake' masisagangi kam sangamberimui! Arepake' kam ipanibo barania ka UmaNia sipunenan' ka manua.

³ Gorosotnangan leu ka kudduatNia sipunenan samba mugejeknia ka uddut leleu ka polak.

⁴ Paleleu leleu katakepnia kele' ianau lilin ilabonia obengan polak siibuijat tuguru' ka simapeleu, kele' oinan ipuguruk ka uddut tinambu ka repe'.

⁵ Aibara sangamberinia nenda kalulut jo samba paagggaratda tai Israel ka tubut Taikamanua. Kasei pa' amasigalai ramajo tai Israel? Ta pa Samaria inan laggainia? Kasei pa' amasigalai bule' rapanindogi Sabulungan tai Jehuda? Tapa Jerusalem?

⁶ Nene te lulunia ikua si Tuhan, “Samaria Kubailiuakenia pasitabbui ka mone, samba kudduat pasiureman anggur. Siraganan laggai nene kuribbaiake' ka simapeleu, samba bongennia Kugaugau.

⁷ Tularat simakeppu saki pakatainangannia samba senen panguruat sikaura ka tubuda tainanalep sipugalai ka kuil tulaboake, samba sangamberi sabulunganda tusubuake'. Bibilet nenda iate buat pusarat katubut taikamanua sipasitutu'tuake. Sangamberinia nenda raambit taisaggak bule ibailiunia buluakenen pusurakat ka taikamananuanda.”

⁸ Kalulut nenda aku, si Mikha, mubesi' paatuat samba mubele baga. Kupuenung sita'leppei samba sita'tarangai masipakoinong kopet besinia paatuatku. Kupasiuggungi kele jojot leleu samba murou kele uma unta.

⁹ Aipoi besit Samaria tamoi tualeake', makere' le nia kele' Jehuda. Paoreat ai ailingan ka Jerusalem, gugurukat laggai kabaraiat bangsaku.

Taisaggak malegerengan sia ka Jerusalem

¹⁰ Bui nupaagaikamnia katubuda tai saggakta ka Gat pagalaiat; ukumanta bui tuobaake raitsokam musou. Ale sipulaggai ka Bet-Le-Afra, paguilu tubum ka abu sibailiu toggaiat ai takki pukakaronan!

¹¹ Kam ka laggai Safir, tutuiake ekeu kam sita' leppei ka bagat aila! Tai Zaanan ta' maeme sia bela ka laggaira. Gerei ka laggai Bet-Haezel masipakaoinong katubum sedda ta'an anai sikunemi sia.

¹² Paoreat sibara kai Tuhan asegean ka matat gugurukat Jerusalem! Kalulut nanda, tai Marot taan momoi rakaroni paroman.

¹³ Kam si pulaggai ka Lakhis, kau kam kuro ka kereta pasaggak Anuului poi kam jo sigalaira ka Israel bailuinangan leu et Jerusalem majo.

¹⁴ Kineiget, ale tai Jehuda mapepengan te laggai Moresyat-Gat. Rimata Israel taan araropake sia sibara ka laggai Akhzib.

¹⁵ Ale kam tai Maresya, si Tuhan masikaukam kakabeira tai saggak sioba masibakkati laggaimui. Sipuute ka Israel mulipput sia ka bagat ngaliu ka Adulam.

¹⁶ Ale kam tai Jehuda, sapu kam alaimui togaiat pulepeimui goni katatoga pununtukiet bagamui. Gulukkam utemui kele' uma' sipasikokom simabute' ai poi tatogamui raambit sia ka pasiribbaiat.