Mat. 9 - BUKO SIPUNENAN

Pasialeat simasakit

¹ Ia geti janang Jesus ka abak, lepa putaliponangan sege ka laggainia.

² Lepa taroakerangan ka matania simasakit ai nia ka peremannia. Kele aiitco tonem bagada Jesus, kuanangan ka matat simasakit, “Ba makakarat baga sirou, atuappeakean jom.”

³ Ai piga pa siagaisurat masikua ka paatuatda, “Aipaloloian Taikamanua sinene!”

⁴ Aagaina Jesus pinaatuda kuanangan, “Angoi nupaatu kam sikatai ka paatuatmui?

⁵ Apa simalabbei tukua, ‘Atuappeakean jom’ ele ‘Suru, puenung?’

⁶ Tapoi bule nuagai kam nia kababarat geget Togatsirimanua ka polak nene masiappeake jo.” Lepa kuanangan ka matat simasakit, “Suru, ala peremannu, toili ka lalepnu!”

⁷ Tusurunangan leu, toili nia ka lalepnia.

⁸ Kele araitco nene sirimanua simigi, malotorangan, umunakerangan Taikamanua sipasikakau gege kele nene ka sirimanua.

Pasisogaiat Mateus

⁹ Aimututuitui Jesus sedda, itconangan sara sirimanua sipuoni si Mateus, ai nia mukukuddu ka kantor cukai. Kuanangan ka matania Jesus, “Tut aku!” Tusurunangan leu si Mateus, tutnangan Jesus.

¹⁰ Ai Jesus mukokom ka lalep Mateus, oi maigi sipuuku cukai samba sijo masipakomake Jesus sambada sipasiuluinia.

¹¹ Kele araitco nene tai Parise, kuarangan ka matada sipasiuluinia, “Ipakokomake kodda sipuuku cukai samba sijo gurumui?”

¹² Arep aiarep nia Jesus kuanangan, “Simaron tubu ta anai kaura dokter, sarat simaoringen le.

¹³ Lelekngake pei kam katukolobat tiboiet nene, ‘Katet baga le obaketku, ta buluakenen.’ Aipoi ta masisogai simaroipo akuoi, sijo le.”

Pagalaiat mupuaso

¹⁴ Lepa oi sipasiului Johannes Sipasirarau ka matat Jesus masinounou, “Kai samba tai Parise mupuaso; sipasiuluinu geti angoi ta mupuaso sia?”

¹⁵ Kuanangan ka matada Jesus, “Murereureu pa bagada saalei siputatalimou ainangan pei le siputatalimou ka talagada? Tapoi ai gogoinia ituala siputatalimou ka talagada; sedda pei te rapupuaso.

¹⁶ Beri sara sitakkopmake komang sibau ka leppei siburu. Ibibiritnake le poi leppei siburu takkoman nenda, mabeunangan biritnia.

¹⁷ Kisedda leu et ta anai sipasikakau anggur sibau ka suppit kulit siburu. Ipupukpukngake le poi, mapilinangan anggur, makatainangan suppit. Ka suppit sibau le itukakau anggur sibau bule ipasese ruania.”

Pasisuruat togat Jairus sinanalep samba pasialeat sinanalep simabesi pujojaet

¹⁸ Ai pei le ikukua nene ka matada Jesus, oi sara utet uma parurukat murappo ka matania kuanangan, “Atataan togaku sinanalep, tapoi konan le nurape nia ipurimanua.”

¹⁹ Tusurunangan leu Jesus tutnangan nia sambada sipasiuluinia.

²⁰ Ka teteret nenda leu et ai sara sinanalep sibara besi pujojaet pulu rua ngarurangan ujunia; ei nia ka teitei Jesus rapenangan jaijait leppeinia.

²¹ Paatuatnia poi, “Kurape le leppeinia, mamalengan aku.”

²² Pitsanangan teiteinia Jesus, itconangan nia kuanangan, “Ba makakarat baga rogai, aiarauakean ekeu tonem bagam.” Ka jam nenda leu et ale aimale sinanalep nenda.

²³ Kele aisege Jesus ka lalep utet uma parurukat samba aiitco sipupipiau samba sirimanua simigi sipugagaugau

²⁴ kuanangan, “Katuitui kam, ta amatei siokko nene, ai le nia memerep.” Gagatirangan nia sangamberida.

²⁵ Kele arabela sirimanua simigi, guru Jesus, alanangan kabei siokko, tusurunangan.

²⁶ Mararatnangan katuareman nene ka sangalio laggai nenda.

Pasialeat rua simapeset

²⁷ Tuitui aituitui Jesus sedda, tutrangan nia rua simapeset. Pugereirangan masikua, “Ale Togat David, kau imakate bagam ka kai!”

²⁸ Guruna le ka lalep, oi sia simapeset ralegeri nia. Kuanangan ka matada Jesus, “Matonem bagamui momoi kualeake kam?” Alegirangan, “Oo Tuhan.”

²⁹ Lepa rapenangan matada Jesus kuanangan, “Kauan numale kam, siripot tonem bagamui.”

³⁰ Maitconangan leu matada. Paneineinangan sia simakope Jesus kuanangan, “Pagaba kam, bui nupoiliat kam nia ka kasei pa.”

³¹ Tapoi kele arabela, arapaarep le pagalaiat Jesus ka sangalio laggai nenda.

Pasialeat sitaiagai manibo

³² Kele aratuitui sirua simapeset nenda, taroakerangan ka matat Jesus sara sitaiagai manibo pinasaileu sanitu.

³³ Usiakena le sanitu Jesus, againangan manibo sitaiagai manibo. Makiseinangan ka bagada sirimanua simigi kuarangan, “Burunia tapei atuitco kele nene ka tai Israel.”

³⁴ Kuada le ka sia tai Parise, “Ka geget utera sanitu le aioi iusiake sanitu.”

Katet bagat Tuhan Jesus ka sirimanua simigi

³⁵ Ia geti gejenginangan Jesus sangalio laggai sabeu samba sigoiso. Gelaiakenangan sia ka uma parurukatda, paarepnangan Katuareman Simaeru pagalaiat Purimataat Sorga samba ialeake sene ngamata besi samba mala.

³⁶ Itco aiitco sirimanua simigi Jesus, makatenangan bagania ka tubuda, tenan le poi sulei tubuda, limai, kele biribiri si ta anai sipasijajago.

³⁷ Kuanangan ka matada sipasiuluinia, “Malio getaiet, tapoi goiso le sipugagalai.

³⁸ Oto tiddou kam kai Tuan sibakkat mone, bule ikoiniake sipasigegetai buat monenia.”