Mat. 8 - BUKO SIPUNENAN

Ialeake simabogbong Jesus

¹ Kele aitugorosot Jesus barania ka leleu, tutrangan nia sirimanua simigi.

² Ia geti oi sara simabogbong murappo ka matania kuanangan, “Noba bai nia Tuan, ta isosoppi nualeake aku.”

³ Totoiakenangan kabeinia Jesus irape nia kuanangan, “Kuoba, kauan numale!” Malenangan leu et bogbongnia.

⁴ Kuanangan ka matania Jesus, “Pagaba, bui nupoiliat nia ka kasei pa; kenan le nupaitco tubum kai imam, lepa buluakenungan buluakenen sitoneakenen Mose, katuaggaiat ka sia.”

Pasialeat pagugulet kapiten saladdu

⁵ Kele aituguru Jesus ka Kapernaum, oi kapiten saladdu manindou ka matania, kuanangan,

⁶ “Tuan, paguguletku ai nia memerep ka lalep lulut sakitnia, makope besinia.”

⁷ Kuanangan ka matania Jesus, “Ai leu kuoi kualeake nia.”

⁸ Aleginangan nia kapiten saladdu, “Ta mateu aku Tuan, nutuguru ka lalepku; kua le sangakuanan, ta isosoppi imale paguguletku.

⁹ Aipoi sirimanua paneineiet le aku, kaku leu ai saladdu paneineietku. Ke kukua ka sara, ‘Kenan!’ einangan leu et; samba ka sabagei, ‘Konan!’ oinangan leu et; ka paguguletku, ‘Galai nene!’ galainangan leu et nia.”

¹⁰ Kisei le ka bagania Jesus aiarep tiboiet nene. Kuanangan ka matada sipasitutut nia, “Beri ka tai Israel ta akusese kopet tonem baga kele nene.

¹¹ Kukua nia ka matamui: Maigi te siooi sibara ka kabelaiat sulu samba ka kabelekat sulu mukom ka Purimataat Sorga sambada si Abraham, si Isak samba si Jakob.

¹² Tatogat purimataat geti turiribbaiake le ka simagepgep ka bebe; sedda te rapusosou samba iputatangat sotda.”

¹³ Lepa kuanangan Jesus ka matat kapiten saladdu, “Katoilingan, babarangan kekeu siripot tonem bagam.” Ka jam nenda leu et ale paguguletnia.

Pasialeat talikut Petrus sinanalep samba sabagei

¹⁴ Kele aituguru Jesus ka lalep Petrus, itconangan aimemerep talikut Petrus sinanalep lulut roketnia.

¹⁵ Rapenangan kabeinia Jesus, tata roketnia. Tusurunangan masipuuku Jesus.

¹⁶ Kasoibokat, taroakerangan ka matat Jesus maigi pinasaileu sanitu; usiakenangan leu sanitu ka geget tiboietnia, samba ialeake sangamberi simabesi.

¹⁷ Aibara nene, bule ipuaili tiboiet sinegeakenen nabi Jesaya sipasikukua, “Nia le amasibairat oringenta samba masiorik besita.”

Pagalaiat masitut Jesus

¹⁸ Kele aiitco Jesus sirimanua simigi sigoilik nia, kuanangan raputalipo ka sila.

¹⁹ Lepa oi sara siagaisurat kuanangan ka matania, “Kutut ekeu Guru, kaipa kaipa nuei!”

²⁰ Kuanangan ka matania Jesus, “Lamusek ai ugunia, uma ai rumunnia, Togatsirimanua geti ta anai katubujungan utenia.”

²¹ Ai leu sara ka talagat sipasiuluinia masikua ka matania, “Tuhan, obaake boiki kuei masirateiake ukkuiku.”

²² Kuana le ka matania Jesus, “Tutnan aku, eddania simamatei masirateiake simamateira.”

Ilebakngake koat Jesus

²³ Lepa janang Jesus ka abak, sipasiuluinia leu masitut nia.

²⁴ Tulut akenangan rusa simapiret ka koat, pat sebuinangan abakda onu; Jesus geti ai le nia memerep.

²⁵ Ia geti geugeurangan nia sipasiuluinia kuarangan, “Tuhan, romake, mamatei sita!”

²⁶ Kuanangan ka matada, “Angoi, maloloto kodda kam, kam simagulai tonem baga?” Suru nia, asenangan rusa samba koat malebaknangan, nem lepa.

²⁷ Tenan le kisei ka bagada sirimanua, kuarangan, “Apa le pa sirimanua nene, rusa samba koatnan le kodda irereddet ngangania!”

Ialeake rua pinasaileu sanitu Jesus ka Gadara

²⁸ Kele aisege Jesus ka sila ka laggaira tai Gadara, oi rua pinasaileu sanitu sibara ka ratei masipaseseake nia. Bulat kalotoakenen le sia, pat beri sara simaeme tusabau ka enungan nenda.

²⁹ Itcora le Jesus, pugereirangan masikua, “Apa nuaala se Togat Taikamanua? Masipaore kai enan ta iaaili teterenia?”

³⁰ Ka reunan goiso ai sangamungkuat sakkoilo, aimasigagaba kan.

³¹ Sanitu nenda masitiddou ka Jesus kuarangan, “Nuusiake geti kai, ka bagat sakkoilo nenda le kau kai.”

³² “Kenanan kam!” ngangan Jesus. Belarangan leu et, ei sia ka sakkoilo. Sangamberinia sakkoilo nenda barania ka tikkara teipu bujuu ka koat, louloulou.

³³ Tui sia sipasijajago sakkoilo, ei sia ka laggai; nunuakerangan sangamberi sibabara, samba leu pagalaiat pinasaileu sanitu.

³⁴ Belarangan sangalaggaiat masitagetnake Jesus. Kele araitco nia, tiddourangan ikaddiuake laggaira.