Mat. 3 - BUKO SIPUNENAN

Johannes Sipasirarau

¹ Ka teterenia nenda oi si Johannes Sipasirarau mungantoman ka simatangeu Judea,

² kuanangan, “Bauake kam paatuatmui, amalegerengan poi Purimataat Sorga!”

³ Nia te nene ikukua nabi Jesaya sikuania kise, “Ai nganga sipusosoga ka simatangeu, ‘Tarekngake kam enungan Tuhan; roipoake kam pusilaiatnia.’ ”

⁴ Leppei Johannes geti bulut onta le, akkik tengania kulit, komennia sin samba suat mani.

⁵ Belarangan tai Jerusalem samba sangamberi tai Judea samba sikuddu ka riringan Jordan ratagetnake nia.

⁶ Seseakerangan joda, raunangan sia si Johannes ka oinan Jordan.

⁷ Tapoi kele aiitco maigi tai Parise samba tai Saduse amoi masitiddou turau, kuanangan ka matada, “Kam saulou, kasei amasikua ka matamui momoi nukatsiliake kam tubumui ka golut Taikamanua sibabara geti?

⁸ Patoila kam buat katubabau paatuatmui.

⁹ Bui te nukua kam ka paatuatmui, ‘Si Abraham le ukkuimai.’ Kukua nia ka matamui: Momoi le ibaraake tatogat Abraham Taikamanua ka bukku nene!

¹⁰ Atutarekngakean baliok ka pailakkik loina; senen loina taibuaake bua simaeru, tutatadde le, gik ka api.

¹¹ Aku kaku oinan le kukakau masirau kam toggaiat katubabau paatuatmui; siooi kuruk teiteiku geti rauakenennia ka kam Ketsat Sipunenan samba api le, nia pei le poi abeu kaku, beri masiambit tarangainia ta mateu aku.

¹² Sasatsat aian ka kabeinia; satsatnangan bera pat lina. Berania iruruake ka kudduat pangoirikat, pora geti ilaboake ka api sitaipepee.”

Katuraukat Jesus

¹³ Ka teterenia nenda oi Jesus ka oinan Jordan barania ka Galilea, bule irau nia si Johannes.

¹⁴ Tapoi aikeraake le si Johannes, kuanangan, “Aku le mateu nurau, kaku kodda nuoi?”

¹⁵ Aleginangan nia Jesus, “Eddangannia boiki. Kisedda poi mateu ka sita masisutnake sangamberi siobat Taikamanua.” Reddetnangan nia si Johannes.

¹⁶ Lepa aiturau Jesus tusakainangan ka pata; tubukanangan manua, itconangan tugorosot Ketsat Taikamanua kele tubut ngorut tuleu ka tubunia.

¹⁷ Maarepnangan nganga sibara ka sorga masikua, “Nene te Togaku, kilibet bagaku, obaket bagaku te nia.”