Mat. 28 - BUKO SIPUNENAN

Katusuruat Jesus

¹ Kappulu gogoi Sabat, ka patokat gogoi siboiki menggui nenda, ei si Maria Magdalena samba si Maria sara masibalou ratei.

² Sinulut bara ngeungeu polak sabeu, atugorosotnan poi sara malaikat Tuhan barania ka sorga, guilunangan bukku matatbaliu ratei, tukku nia ka uddutnia.

³ Kean le bila matania, leppeinia mabulau ke kapu.

⁴ Lotora ka tubunia sipasijajago pugeretnangan tubuda, kean le simamatei sia.

⁵ Kuanangan malaika ka matada tainanalep, “Ba maloloto kam! Kuagai ainugagaba kam Jesus siniliktengaakenen.

⁶ Taan anai nia sene, atusurungan nia kele sikuania. Konan nuitco kam kudduat katugalangannia.

⁷ Olaake kam mei ka sipasiuluinia nusegeake kam katususurunia ka simamatei. Nia le muboboiki ka kam ka Galilea; sedda geti itcomuian nia. Repdep kam, akukuangan te ka matamui.”

⁸ Ia geti olaakerangan mutuitui ka ratei ka loto pagalu angkat baga sabeu, apabalau le sia rasegeake nia ka sipasiului Jesus.

⁹ Tulut paseseakenangan sia Jesus kuanangan, “Salam ka kam.” Rengei sia lakkaiakerangan rerenia, purapporangan ka matania.

¹⁰ Lepa kuanangan ka matada Jesus, “Ba maloloto kam, kenan le kam nusegeake kam nia ka sasarainangku raei ka Galilea; sedda geti itcorangan aku.”

Pangasegekatda sipasijajago

¹¹ Ai sia memei tainanalep, ei leu et piga pa tai saladdu sipasijajago ratei ka kota masisegeake ka tai imam sabeu sangamberi sibabara.

¹² Parururangan tai imam sabeu sambada tai bajara tai Jahudi. Ka keret bagada kaurangan bulagat simigi ka tai saladdu,

¹³ kuarangan, “Kua le kam: Ai kai memerep sinoibo, oi sipasiuluinia masitakkou nia.

¹⁴ Ke iarep geti si gubernur, ai leu kupusumi kai nia, bui imageja bagamui.”

¹⁵ Silorangan bulagat tai saladdu galairangan leu kele singanturuakenen ka matada. Mararatnangan tiboiet nene ka tai Jahudi teret kineneiget.

Ipatoila tubunia Jesus ka sipasiuluinia samba ipatone sia masipaarep Katuareman Simaeru

¹⁶ Oto sia sipasiului sipulusara ei sia ka Galilea, ka leleu kele sikuat Jesus ka matada.

¹⁷ Kele araitco Jesus purapporangan ka matania, tapoi ai sabagei simakarat baga.

¹⁸ Ia geti rengei Jesus kuanangan ka matada, “Atuakean kaku sangamberi gege ka sorga samba ka polak.

¹⁹ Oto kenan kam ka sangamberi bangsa nubailiuake kam sia sipasiului aku. Rau kam sia ka onin Ukkui, Toga samba Ketsat Sipunenan.

²⁰ Pangantoman kam sia masireddet sangamberi sitoneakenenku ka matamui. Repdep kam, ai le kupaalei kam senen gogoi teret kalepakat polak.”