Mat. 27 - BUKO SIPUNENAN

Rataroake Jesus ka matat Pilatus

¹ Kele aimapato, purapatrangan tai imam sabeu samba tai bajara tai Jahudi, teuakerangan masimateiake Jesus.

² Ia geti kaberangan nia, ambitrangan nia rasegeake nia kai gubernur Pilatus.

Kamateiat Judas

³ Kele aiitco nia si Judas sipajo Jesus, ramamateiake le nia, oleinangan bagania, toiliakenangan bulagat sitelupulu perak ka tai imam sabeu samba tai bajara tai Jahudi.

⁴ Kuanangan, “Amajongan aku akusegeake sirimanua si ta jo.” Alegida le nia, “Apananmai te nenda, ekeuan le ipagaba nia!”

⁵ Gikgikngakenangan leu bulagat perak ka bagat Uman Taikamanua tui nia, ei nia masitiggot lolokkatnia.

⁶ Ia geti alarangan bulagat tai imam sabeu kuarangan, “Takeikei takau nia bulagat Uman Taikamanua, bulagat logau le poi.”

⁷ Kele aipakere bagada kaurangan nia masisaki Polak Tukang Pario kaunenda rateira taitoi.

⁸ Ia te lulunia aituoniake polak nenda “Polak Logau” teret kise.

⁹ Kisedda te ipuaili tiboiet sikuat nabi Jeremia, “Alarangan leu telupulu bulagat perak, ia te sakit sara sirimanua siripot siteuakenen ka tai Israel,

¹⁰ kaurangan nia sakit polak tukang pario, kele sitoneakenen Tuhan ka mataku.”

Jesus ka matat Pilatus

¹¹ Ia geti rio Jesus ka matat gubernur Pilatus, nounounangan nia si gubernur, “Ele, rimatada tai Jahudi leu ekeu?” Aleginangan nia Jesus, “Anukuangan.”

¹² Panganduatda tai imam sabeu samba tai bajara tai Jahudi geti, beri sara aialegi.

¹³ Ia geti kuanangan ka matania si Pilatus, “Ta nuaarep kopet iginia rajoake ekeu?”

¹⁴ Tapoi ta aialegi Jesus beri sangakuanan, pat kisei bagat gubernur.

Raukum matei Jesus

¹⁵ Amatukelengan kai gubernur senen Punen Paska ibelaake sara sipenjaraakenen siripot siobat bagada simigi.

¹⁶ Ka teteret nenda ai ka penjara sara simaarep katai sipuoni si Barabbas.

¹⁷ Kele aramaruru sirimanua simigi kuanangan ka matada si Pilatus, “Kasei siobamui kubelaake ka kam, si Barabbas ele Jesus kuanenda Kristus?”

¹⁸ Aiagaian poi lagat bagada le arasegeake Jesus ka tubunia.

¹⁹ Ka teteret aimuuddet si Pilatus ka uddenan pasiukuman oi tone sibara ka sinanalepnia masikua, “Bui nugalai apa pa ka tubut sirimanua simaroipo nene, maigi poi akuorik ka pangamutet soibo nene kalulut nia.”

²⁰ Tai imam sabeu samba tai bajara tai Jahudi geti ratubbui simigi bule si Barabbas ratiddou tubelaake, Jesus geti tumateiake le.

²¹ Kuanangan ka matada si gubernur, “Kasei ka sirua nene nuoba kam kubelaake ka kam?” Kuarangan, “Si Barabbas.”

²² Kuanangan ka matada si Pilatus, “Oto kipangan le kugagalai ka Jesus kuanenda Kristus?” Kuarangan sangamberida, “Siliktengaake le nia.”

²³ Kuanangan si Pilatus, “Aponia poi jo aigalai?” Pugereirangan simakope, “Siliktengaake le nia!”

²⁴ Kele aiitco si Pilatus siboboi le tiboietnia, memei le makokope pulalamaura, alanangan oinan buinangan kabeinia ka matada simigi kuanangan, “Ta iaaili aku jo ka logau sirimanua nene; kam le iaaili!”

²⁵ Alegirangan nia sangamberida, “Kaian le masioorik logaunia samba tatogamai!”

²⁶ Lepa belaakenangan si Barabbas ikau nia ka sia; Jesus geti ikau rabobo, lepa segeakenangan nia rasiliktengaake nia.

Rapaloloi Jesus tai saladdu

²⁷ Ia geti ambitrangan Jesus tai saladdut gubernur ka kantor gubernur, ruruakerangan leu saaleira ragoilik Jesus.

²⁸ Golokrangan leppeinia, leppeiakerangan leppei simabonan ka tubunia.

²⁹ Tikairangan rui kiritnia kaurangan nia ka utenia, kaurangan tutura ka kabeinia sikattoet, purekkukrangan ka matania masipaloloi nia kuarangan, “Salam, Rimatada tai Jahudi!”

³⁰ Lujirangan nia, alarangan tutura ka kabeinia boboakerangan nia ka utenia.

³¹ Lepa arapaloloi nia, golokrangan leppei simabonan, kaurangan minca leppeinia ka tubunia, ia geti ambitrangan nia itusiliktengaake.

Katusiliktengaat Jesus

³² Kele arabela ailirangan sara tai Kirene sipuoni si Simon. Kaurangan nia ibairat siliktengan Jesus.

³³ Ia geti sege sia ka sara kudduat sipuoni Golgota, tibonannia; Leleu Lakkupat.

³⁴ Kaurangan lonia anggur sigalu lappegu. Kele ainanam nia ta ioba ilo nia.

³⁵ Lepa arasiliktengaake nia, parubeirangan bibilet tubunia sipauktukngakenen.

³⁶ Ia geti kuddu sia sedda rajago nia.

³⁷ Ka pata ipot utenia raottotnake surat paluluat aituukum nia, “Nene te Jesus Rimatada tai Jahudi.”

³⁸ Lepa siliktengaakerangan leu et rua sipasimamatei ka bebet Jesus, sara kai kattoet, sara kai katsiunia.

³⁹ Sia situsasabau sedda masipaloloi nia, pagilikrangan utera,

⁴⁰ kuarangan, “Ekeu sioba masiragatnake Uman Taikamanua samba masirioake nia ka bagat telu ngagogoi; belaake tubum, ke Togat Taikamanua bai ekeu, gorosotnake ekeu ka siliktenga!”

⁴¹ Kisedda leu et tai imam sabeu, siagaisurat samba tai bajara tai Jahudi ragegei Jesus, kuarangan,

⁴² “Sabagei airimanuaake, tubunia geti ta momoi irimanuaake! Rimatada tai Jahudi poi nia, kauan igorosotnake tubunia ka siliktenga, imatonem bagamai ka tubunia.

⁴³ Matonem poi bagania ka Taikamanua kau ibelaake nia Taikamanua ke ioba nia Taikamanua. Aikua poi, ‘Togat Taikamanua le aku.’ ”

⁴⁴ Beri sipamamatei alei Jesus tusiliktengaake leu masipaloloi Jesus.

Kamateiat Jesus

⁴⁵ Ia geti magepgepnangan sangalio polak barania ka bobo pulu rua teret bobo telu.

⁴⁶ Bobo telu kasoibokat pugereinangan Jesus, “Eli, Eli, lama sabakhtani?” tibonannia, “Taikamanuangku, Taikamanuangku, nukakaddiuake kodda aku?”

⁴⁷ Kele araarep nia sipuririo sedda kuarangan, “Aisosogai si Elia.”

⁴⁸ Pabalaunangan sara ka talagada masiala romot, somakenangan nia ka anggur simalaga, kokkokngakenangan nia ka labbaet kaunangan ilo nia Jesus.

⁴⁹ Tapoi sabagei masikua, “Bola boiki, taitcoake kam nia, baleu moi si Elia iromake nia.”

⁵⁰ Pugereinangan minca sabeu nganga Jesus, sege isegeake engania.

⁵¹ Ia geti mabiritnangan komang kekere ka Uman Taikamanua barania ka pata aili ka epe bailiu rua. Mangeungeunangan polak, papokpoknangan bulak,

⁵² tubukanangan parateiratei, samba maigi sirimanua sipunenan simamatei atusuru.

⁵³ Kaddiuakerangan ratei; ia geti kele aitusuru Jesus, ei sia ka laggai sipunenan masipatoila tubu ka simigi.

⁵⁴ Kele araitco ngeungeu polak samba sangamberi sibabara kapiten saladdu samba saladdunia sipasijajago Jesus malotorangan simakope kuarangan, “Bulat Togat Taikamanua leu bai sinene.”

⁵⁵ Maigi leu sedda tainanalep sipasiitco ka simareunan, sipasitutut Jesus barania ka Galilea masipuuku nia.

⁵⁶ Ka talagada ai si Maria Magdalena, si Maria inan Jakobus samba si Josep, samba inanda tatogat Sebedeus.

Pasirateiat Jesus

⁵⁷ Kasoibokatnia oi sara simakayo tai Arimatea, sipuoni si Josep, sipasiului Jesus leu nia.

⁵⁸ Ei nia kai Pilatus masitiddou tubut Jesus. Kuanangan si Pilatus rakau tubut Jesus ka sia.

⁵⁹ Alanangan tubut Jesus si Josep tabutnangan nia komang juto simalina.

⁶⁰ Galakngakenangan nia ka ratei sibau sikailunia bulak kaunennia rateinia. Lepa guilunangan sara bukku sabeu matatbaliu ratei, tui nia.

⁶¹ Si Maria Magdalena geti samba si Maria sara ai sia mukukuddu sedda ipot ratei.

Sipasijajago ratei

⁶² Pato, pasat gogoi panarengan, parururangan tai imam sabeu samba tai Parise ka matat Pilatus

⁶³ kuarangan, “Kurerepdep pei le kai tuan, tiboiet sipasipepe ai pei le nia muririmanua, kise aikua, ‘Pasat telu ngagogoi suru aku.’

⁶⁴ Oto kua le rajago ratei teret gogoi sikatelunia, babara momoi sipasiuluinia ratakkou nia, lepa kuarangan ka simigi, ‘Atusurungan nia ka simamatei.’ Bailiu patajuat sikateitei pei le makatai bele pei ka siboiki.”

⁶⁵ Kuanangan ka matada si Pilatus, “Koi sipasijajago, kenan jagongan kam teret siagaimui.”

⁶⁶ Eirangan leu et raparon ratei, rakau toggaiat ka bukku takket ratei samba ragalak sipasijajago sedda.