Mat. 25 - BUKO SIPUNENAN

Pasikat pulu taiokko

¹ “Ka teteret nenda Purimataat Sorga tupakereake ka pulu taiokko siambit alitoda raei paroro ka talimouakenen.

² Ka talagada ai lima sitaiagai paatuat, lima siagai paatuat.

³ Sitaiagai paatuat araambit alitoda, tapoi ta araambit tula baliget.

⁴ Siagai paatuat geti raambit alitoda, raambit leu tula baliget ka bulibuli.

⁵ Lulut ujunia ioi talimouakenen, matuddunangan matada, perep sia.

⁶ Ka tengamoian le maarepnangan gerei, ‘Aian te talimouakenen! Suru kam nuroroi kam nia!’

⁷ Suru sia taiokko sangamberida perurangan alitoda.

⁸ Kuarangan sitaiagai paatuat ka siagai paatuat, ‘Ake kam ka kai suan alitomai, pepean le alitomai.’

⁹ Alegirangan nia siagai paatuat, ‘Taa, baleu ta iaaili ka kai, ke kuake kai ka kam. Kenan le kam ka toko nusaki kam ka kam.’

¹⁰ Ai sia memei masisaki, oi talimouakenen, tugururangan taiokko silima simatarek tubu sambada talimouakenen ka putalimogat, lekkere itulekkere matatbaliu.

¹¹ Lepa bara sia taiokko silima nenda kuarangan, ‘Tuan, tuan, buka kai!’

¹² Alegina le nia, ‘Kukua nia ka matamui: Ta kuagai kam!’

¹³ Oto pumata le kam, ta poi nuagai kam gogoi ele jamnia.”

Pasikat pagalaiat talenta

¹⁴ “Aipoi Purimataat Sorga makere le galainia ka sara sirimanua sieei ka sara laggai ka sareunan, sisogai sapaguguletnia isegeake ka tubuda sangamberi bibiletnia.

¹⁵ Ka sisara ikau lima talenta, ka sisara rua, ka sisara minca sara, senenda siripot siooi rapasikeli; lepa tui nia.

¹⁶ Ia geti einangan leu sisilo lima talenta masipasakiake nia, sesenangan uktuknia lima talenta.

¹⁷ Kisedda leu et sisilo rua talenta, sesenangan uktuknia rua talenta.

¹⁸ Sisilo sara talenta geti masiugguk polak le aiei ilipputnake bulagat tuannia.

¹⁹ Uju uju toili tuanda sapagugulet, galainangan paaddeat ka sia.

²⁰ Oi sisilo lima talenta ambitnangan lima talenta uktuknia, pele ngangania, ‘Tuan, lima talenta anusegeake ka tubuku, akoi lima talenta minca akusese uktuknia.’

²¹ Kuanangan ka matania si tuan, ‘Ia pei te, pagugulet simaeru, simatopit. Amatopitnan poi ekeu ka puukuket sigoiso, segeakekungan leu kekeu puukuket sabeu. Guruake ekeu ka puangkakat bagat tuannu!’

²² Oi leu sisilo rua talenta, pele ngangania, ‘Tuan, rua talenta anusegeake ka tubuku, akoi rua talenta minca akusese uktuknia.’

²³ Kuanangan ka matania si tuan, ‘Ia pei te, pagugulet simaeru, simatopit. Amatopitnan poi ekeu ka puukuket sigoiso, segeakekungan leu kekeu puukuket sabeu. Guruake ekeu ka puangkakat bagat tuannu!’

²⁴ Lepa oi ka sia sisilo sara talenta, pele ngangania, ‘Tuan, akuagaian sirimanua simagege le ekeu, numonei le ta ka siurepnu, nururuake ta ka sikaramakenennu.

²⁵ Lotoku, ei aku kulipputnake talentam ka polak. Na, akoi anum.’

²⁶ Kuanangan tuannia ka matania, ‘Apate katai pagugulet nene, simabeili. Nuagai momoneiku ta ka siurepku samba rururuakeku ta ka sikaramakenenku?

²⁷ Oto siripokatnangan nukau bulagatku ka sipasitotogaake bulagat, bule toili aku silokungan nia samba togania.

²⁸ Oto ala kam talenta ka tubunia, kau kam nia ka sipupupulu talenta.

²⁹ Ka kasei poi ai, tukakau pei le ka sia ipulegei. Ka si ta anai geti, beringan sibabara ka tubunia tuaala pei le.

³⁰ Samba pagugulet sitakatukaunan nene ribbaiake le kam nia ka simagepgep ka bebe. Sedda te ipusosou samba iputatangat sotnia.’ ”

Ukuman ka gogoi sialu

³¹ “Ke moi geti Togatsirimanua ka pulatsanannia sambada samalaikania, uddeninangan uddenan pulatsanannia,

³² samba sangamberi taikapolak paruru ka matania. Pasaraakenangan sia kele sipuuku tarimeu masipasaraake biribiri ka kambing.

³³ Biribiri ikau kai kattoetnia, kambing geti kai katsiunia.

³⁴ Lepa kuanangan Rimata ka matada isit kai kattoetnia, ‘Konan kam, kam sinukatnakenen Ukkuiku, ikepmake kam purimataat sinarekngakenen ka kam ka pasibaraat polak pei le.

³⁵ Aipoi amalaje aku anupakom kam aku, amaoggou aku anuake kam loku; sitoi aku; anunappit kam aku;

³⁶ amabulutut aku anuleppeiji kam aku; amabesi aku anubalou kam aku; ai aku ka penjara anuloggou kam aku.’

³⁷ Ia geti alegirangan nia simaroipo baga, ‘Pigamoi Tuhan, akuitco kai ekeu malaje akupakom kai ekeu ele maoggou akuake kai lonu?

³⁸ Pigamoi akuitco kai ekeu sitoi, akunappit kai ekeu ele mabulutut, kuleppeiji kai ekeu?

³⁹ Pigamoi akuitco kai ekeu mabesi ele ka penjara, kubalou kai ekeu?’

⁴⁰ Aleginangan nia Rimata, ‘Kukua nia ka matamui: Kipa sigalaimui ka tubut sara sasarainangku taiaaddeakenen nene, kaku le anugalai kam nia.’

⁴¹ Lepa kuanangan ka matada isit kai katsiunia, ‘Katuitui kam ka mataku, kam situtetelei ka api sitaitatata sinarekngakenen ka Sanitu samba samalaikania.

⁴² Aipoi amalaje aku, ta anupakom kam aku; amaoggou aku, ta anuake kam loku;

⁴³ sitoi aku, ta anunappit kam aku; amabulutut aku, ta anuleppeiji kam aku; amabesi aku samba ai aku ka bagat penjara, ta anubalou kam aku.’

⁴⁴ Alegirangan leu nia ka sia, ‘Pigamoi Tuhan, akuitco kai ekeu malaje ele maoggou ele sitoi ele mabulutut ele mabesi ele ka bagat penjara, ta akupuuku kai ekeu?’

⁴⁵ Kuanangan te ialegi sia, ‘Kukua nia ka matamui: Kipa sitaigagalaietmui ka tubut sara taiaaddeakenen nene, kaku le ta anugalai kam nia.’

⁴⁶ Ia geti ei sia ka paoreat sitaitatata; sia simaroipo baga geti guru ka purimataat sitaitatata.”