Mat. 22 - BUKO SIPUNENAN

Pasikat pagalaiat punen putalimogat

¹ Ia geti panibonangan minca ka matada Jesus ka bagat pasikat, kuanangan,

² “Purimataat Sorga makere le ka sara rimata sigalai punen putalimogat ka togania.

³ Ia geti koiniakenangan sapaguguletnia masisogai sia pinalelek ka punen putalimogat, tapoi ta raoba moi.

⁴ Koiniakenangan minca sapagugulet bagei kuanangan, ‘Kua kam ka matada tairauma: Amatarekngan te kan ka punen, jauiku samba tarimeuku simomoakenen akujajaan, amatarekngan sangamberinia; konan le kam ka punen putalimogat!’

⁵ Tapoi ta arapuletsei, amutuitui le sia, sara mei ka monenia, sara mei ka tokonia,

⁶ sabagei masilaba, masibesiki samba masimateiake sapaguguletnia.

⁷ Pugolunangan rimata, koiniakenangan saladdunia masisubuake sipamamatei samba masilabo laggaira.

⁸ Lepa kuanangan ka sapaguguletnia, ‘Punen putalimogat amatarekngan, tapoi tairauma pinalelekku ta mateu.

⁹ Oto kenan kam ka parubaat enungan, kasei le nusese kam, sogaimuian sia raoi ka punen putalimogat nene.’

¹⁰ Kele arabela sapagugulet ka enungan, ruruakerangan sangamberi sineseda, sijo samba simatopit; pat sun kudduat putalimogat tairauma sipupupunen.

¹¹ Kele aituguru rimata masiitco tairauma sipupupunen, itconangan sara sirimanua sitaipakei leppei pupunen.

¹² Kuanangan ka matania rimata, ‘Ale suruak, kipa te nutuguguru sene taipuleleppei leppei pupunen?’ Tenan le nia meng.

¹³ Kuanangan rimata ka sapaguguletnia, ‘Kabe kam rere samba kabeinia, ribbaiake kam nia ka simagepgep ka bebe, sedda te ipusosou samba iputatangat sotnia.’

¹⁴ Aipoi maigi tusogai, tapoi goiso le tupili.”

Pagalaiat masikau juran kai Kaisar

¹⁵ Lepa tui sia tai Parise ei sia murapat masipatiboji kipa ragagalai ioi rajoake Jesus ka tiboietnia.

¹⁶ Ia geti koiniakerangan sipasiuluira sambada sipasiului Herodes ka tubunia masikua, “Guru, akuagaian kai simaroipo le ekeu samba nunganturuake enungan Taikamanua sibulatnia samba ta nupuleletsei kasei pa, aipoi ta nurarasei sirimanua.

¹⁷ Oto kua ka matamai kipa paatuatnu: Pasesese leu tukau juran kai Kaisar ele taa?”

¹⁸ Iagai le poi Jesus katai paatuatda kuanangan, “Kam sipatataju! Nusisibo kodda kam masipajo aku?

¹⁹ Pakoinong kam ka mataku bulagat juran!” Kaurangan ka tubunia bulagat.

²⁰ Nounounangan sia Jesus, “Kasei tularat samba kasei oni nene?”

²¹ Kuarangan, “Kai Kaisar.” Lepa kuanangan ka matada Jesus, “Oto kau kam kai Kaisar bakkat Kaisar, ka Taikamanua bakkat Taikamanua.”

²² Kele araarep nene, makiseinangan ka bagada, kaddiuakerangan nia, tui sia.

Pagalaiat katusuruat simamatei

²³ Ka gogoi nenda tagetnakerangan Jesus tai Saduse sipasikukua ta anai katusuruat simamatei.

²⁴ Nounourangan nia kuarangan, “Guru, aikua si Mose, ke matei kasei pa si ta anai toga, buita italimouake silumangakenennia sarainania masibaraake tuppai tubut sarainania.

²⁵ Ai ka kai pitu sipusasaraina. Putalimounangan sikebbukat, lepa matei nia ta anai tuppai tubunia, alanangan sinanalep sikaddiuakenennia sarainania.

²⁶ Kisedda leu et sarainania sikarua samba sikatelu teret sikapitunia.

²⁷ Kalepakatnia matei leu ka sia sinanalep.

²⁸ Oto ka gogoi katusuruat, kasei ka sipitu masibabakkati sinanalep nenda? Sangamberidangan poi aipusinanalepmake nia?”

²⁹ Aleginangan nia Jesus, “Amaselengan kam lulut taiagaimui bagat Surat Sipunenan samba geget Taikamanua.

³⁰ Aipoi ka gogoi katusuruat taan mutatalimou samba taan tutatalimouake sia, kele samalaika ka manuangan le sia.

³¹ Pagalaiat katusuruat simamatei, tapei pa anubasa kam siniboi Taikamanua ka matamui sipasikukua,

³² ‘Aku te Taikamanuan Abraham, Taikamanuan Isak samba Taikamanuan Jakob?’ Ta Taikamanuanda simamatei, Taikamanuanda sipuririmanua le.”

³³ Kisei le ka bagada sirimanua simigi araarep ngantoman Jesus.

Surukat siabeu

³⁴ Kele araarep tai Parise pepetpetnakena ngungunda tai Saduse Jesus, parururangan ka sia.

³⁵ Sara ka talagada ia te siagaisurat masisibo nia, kuanangan,

³⁶ “Guru, surukat kipa siabeu ka bagat Surukat?”

³⁷ Kuanangan Jesus, “Pununtuki baga si Tuhan Taikamanuam ka sangalio bagam, ka sangalio ketsatnu samba ka sangalio paatuatnu.

³⁸ Nene te surukat siabeu samba siboiki.

³⁹ Sikarua simakere ka tubunia: Pununtuki baga aleinu sirimanua kele nuntut bagam ka tubum.

⁴⁰ Ka surukat sirua nene te mubongen sangamberi Surukat samba suratda tai nabi.”

Pagalaiat Kristus togat David

⁴¹ Ka teteret aiparururu tai Parise, nounounangan sia Jesus,

⁴² “Kipa nupaatu kam pagalaiat Kristus? Kasei toga nia?” Kuarangan, “Togat David.”

⁴³ Kuanangan ka matada Jesus, “Oto itutuhan kodda nia si David sipanibonia ka pinalulut Ketsat Taikamanua masikua,

⁴⁴ ‘Aikua si Tuhan ka matat Tuhanku: Uddetnake ekeu kai kattoetku, teret kukau saggaknu bailiu kalak rerem.’

⁴⁵ Oto ke ituhan nia si David, lepa itotoga kodda nia?”

⁴⁶ Ta anai sia amasialegi, beri sangakuanan. Barania ka gogoi nenda taan anai beri sara simaro baga masinounou nia minca.