Mat. 21 - BUKO SIPUNENAN

Katugurukat Jesus ka Jerusalem

¹ Kele aramalegere ka Jerusalem, aian sia ka Betpage ka leleu Tula, koiniakenangan rua sipasiuluinia Jesus,

² kuanangan ka matada, “Kenan kam ka laggai ipot matamui. Ia geti sesemuian sangamuneng kalidei ai kasesereat karuania toga; rugutmuian nia, ambitmuian nia se.

³ Ke ai bai sipasikukua apa pa ka matamui, kuamui le, ‘Ai kauna nia si Tuhan’; obaakenangan leu et nia.”

⁴ Aibara nene bule ipuaili siniboi nabi sipasikukua,

⁵ “Kua kam ka matat okko Sion, aian te momoi Rimatam, itagetnake ekeu, simaleppe baga te nia, sipukakalidei, togat kalidei sinanalep.”

⁶ Eirangan leu sipasiuluinia, galairangan siripot sitoneakenen Jesus ka matada.

⁷ Ambitrangan kalidei samba togania, apoakerangan leppeira ka teiteinia, jananginangan nia Jesus.

⁸ Sirimanua simigi masiapoake leppeira ka enungan, sabagei managgiri ran loina masipagalak ka enungan.

⁹ Sirimanua simigi sipuboboiki samba sipasitutut mugerei, “Hosanna ka Togat David! Kau imatulu tubunia siooi ka onin Tuhan! Hosanna ka pata!”

¹⁰ Kele aituguru ka Jerusalem, gaugau sangalio kota kuarangan, “Kasei oninia nene?”

¹¹ Alegirangan nia sirimanua simigi, “Ia te Nabi Jesus sibara ka Natsaret ka Galilea.”

Ipalina Uman Taikamanua Jesus

¹² Ia geti guru Jesus ka Uman Taikamanua, kekelenangan sangamberi sipasasaki ka bagat Uman Taikamanua. Bailuakenangan mejada sipasisisili bulagat samba uddenanda sipasisasakiake ngorut.

¹³ Kuanangan ka matada Jesus, “Atusuratnakean, ‘Uma panindogat le tuoniake umangku.’ Tapoi anukau le kam nia ngaliura sipasiraraurau!”

¹⁴ Ia geti oi ka matat Jesus simapeset samba simasakit ka Uman Taikamanua, aleakenangan sia.

¹⁵ Kele araitco nia tai imam sabeu samba siagaisurat kiseiet sigalai Jesus samba raarep gereira tatoga ka Uman Taikamanua masikua, “Hosanna ka Togat David!” magolunangan bagada.

¹⁶ Kuarangan ka matat Jesus, “Nuaarep leu sikuada nene?” Kuanangan ka matada Jesus, “Aikuaarep. Tapei pa anubasa kam, ‘Ka ngungunda taiguigui samba tatoga siputotottot anutarekngakean pasiumun sipulelelek?’ ”

¹⁷ Lepa kaddiuakenangan sia Jesus bela nia ka kota, ei nia ka Betania, pugogoinangan sedda.

Itelei sileu Jesus

¹⁸ Tapoi simancep kele aitoili minca Jesus ka kota, malajenangan.

¹⁹ Kele aiitco sangaloina sileu ka bebet enungan ei nia ka bakkatnia, tapoi ta anai aisese buania sarat buluk le. Kuanangan Jesus ka sileu, “Buian nupubua teret buruburu!” Malajunangan leu et.

²⁰ Kele araitco nia sipasiului makiseinangan ka bagada kuarangan, “Kipa te aimaruei aimalaju sileu nene?”

²¹ Kuanangan ka matada Jesus, “Kukua nia ka matamui, ke ai bai tonem bagamui samba ta anai karat bagamui, ta sarat kele sigalaiakenen ka sileu nene nugagalaiake kam, tapoi ke nukua bai kam ka leleu nene, ‘Akkatnake ekeu, ribbaiake tubum ka koat’ ta isosoppi ioi.

²² Samba apa le nutiddou kam ka tonem baga, nusisilo kam.”

Panounogat pagalaiat geget Jesus

²³ Lepa guru minca Jesus ka Uman Taikamanua. Ai nia mungangantoman, oi ka matania tai imam sabeu samba tai bajara tai Jahudi kuarangan, “Ka geget apa nugalai nene? Kasei amasiake gege nene kekeu?”

²⁴ Aleginangan sia Jesus, “Kaku leu koba kunounou kam sara panounogat; ke nualegi kam, kuakungan leu ka matamui ka geget apa kugalai nene.

²⁵ Pasiraukat Johannes nenda, sibara kaipa? Sibara ka Taikamanua ele ka sirimanua?” Patuptuprangan pasasambada, “Ke takua, ‘Sibara ka Taikamanua,’ kuanangan te ka matata, ‘Oto angoi ta matonem bagamui ka tubunia?’

²⁶ Ke takua, ‘Sibara ka sirimanua,’ maloto sita ka sirimanua simigi, aipoi sangamberida arapunabingan si Johannes.”

²⁷ Kuarangan raalegi Jesus, “Ta kuagai kai.” Kuanangan leu ka matada Jesus, “Oto kaku leu ta kukukua ka matamui ka geget apa kugalai nene.”

Pasikat pagalaiat rua tatoga

²⁸ “Kipa nupaatu kam? Ai sara sirimanua rua togania simanteu. Ei nia ka sikebbukat, pele ngangania, ‘Sirou, kenan kineneiget mugalai ka monen anggur.’

²⁹ Aleginangan nia, ‘Kauan ukkui, tapoi ta amei nia.’

³⁰ Lepa ei nia ka sisule kisedda leu tiboietnia. Aleginangan nia, ‘Ta koba,’ lepa oleinangan bagania, ei nia.

³¹ Kasei ka sirua nene amasigalai siobat bagat ukkuira?” Kuarangan, “Sisule le.” Kuanangan ka matada Jesus, “Kukua nia ka matamui: Sipuuku cukai samba sipaeelet le muboboiki ka kam tuguru ka Purimataat Sorga.

³² Amoian poi ka kam si Johannes masipangantoman kam enungan puroipoat, tapoi ta anukatonemi kam nia. Sipuuku cukai samba sipaeelet le amasikatonemi nia. Kam geti, kenanen anuitcoan kam, ta aiolei paatuatmui, bule nukatonemi kam nia.”

Pasikat pagalaiat sipuuku monen anggur

³³ “Arep kam pasikat bagei. Ai sara tuan sibuka monen anggur. Iripnangan nia, ugguknangan kudduat pasipetsunan, rioakenangan sapou pujagoat. Lepa sewaakenangan nia ka sipumomone, ei nia musaralaggai.

³⁴ Kele aiaili teteret pasialakat bua, koiniakenangan sapaguguletnia ka sipuuku mone masisilo rubeiatnia.

³⁵ Ia geti labarangan pagugulet tuan sipuuku mone: sara rabobo, sara ramateiake, sara rabaijungi bukku.

³⁶ Ia geti koiniakenangan minca paguguletnia si tuan, saliu pei le igida siboiki, tapoi kisedda leu et aragalai ka tubuda.

³⁷ Kalepakatnia koiniakenangan togania si tuan ka tubuda, paatuatnia poi, ‘Metnangan rakagilaake togaku nene.’

³⁸ Tapoi kele araitco togania sipuuku mone, kuarangan pasasambada, ‘Ia te sipasiikep; sita kam tamateiake nia, tabakkati kam ikepmakenennia.’

³⁹ Labarangan nia, ribbaiakerangan nia ka bebet mone, mateiakerangan nia.

⁴⁰ Oto ke moi tuan sibakkat mone, kipa igagalai ka tubuda sipuuku mone?”

⁴¹ Kuarangan ka matania, “Ta iinou sia, mateiakenangan sia, mammatei pi; lepa kaunangan monen anggur ka sabagei, sioba masikau bua ka tubunia ka teterenia.”

⁴² Kuanangan ka matada Jesus, “Tapei anubasa kam ka Surat Sipunenan, ‘Bukku siribbaiakenenda tai tukang aibailiuan bukku bongan inan arigi. Si Tuhan le aibaraake nia; bulat makisei ka bagata iitco nia.’

⁴³ Ia te lulunia kukua ka matamui: Tuaala le ka tubumui Purimataat Taikamanua, itukau nia ka bangsa sibuaake buat Purimataat. [

⁴⁴ Samba kasei sibebele ka bukku nene ragat, samba kasei sisaksak bukku nene bubu.”]

⁴⁵ Kele araarep sangamberi pasikat Jesus nene tai imam samba tai Parise, agairangan sia le ititiboi.

⁴⁶ Gelerangan ralaba nia, tapoi maloto sia ka sirimanua simigi, arapunabingan poi nia.