Mat. 20 - BUKO SIPUNENAN

Pasikat pagalaiat sipugagalai ka monen anggur

¹ “Purimataat Sorga makere le ka sara tuan sieei mamancep pei le masigaba upaiet sipugagalai ka monen anggurnia.

² Kele aipakere bagada sangagogoi sangaropia upada, koiniakenangan sia mugalai ka monen anggurnia.

³ Ka bobo siba simancep bela nia itconangan sabagei sipuririo si ta galai ka pasakiat.

⁴ Kuanangan ka matada, ‘Kam leu et, kenan kam mugalai ka monen anggurku, ai leu kuake upamui siripokatnia.’

⁵ Eirangan leu et. Bobo pulu rua tugge samba bobo telu kasoibokat bela nia minca, kisedda leu et aigalai.

⁶ Kele aibela ka legeret bobo lima, sesenangan sabagei sipuririo si ta galai kuanangan ka matada, ‘Sarat puririoan le koi kam sangagogoian si ta galai?’

⁷ Kuarangan ka matania, ‘Ta anai siupaji kai.’ Kuanangan ka matada, ‘Oto kam leu et, kenan kam mugalai ka monen anggurku.’

⁸ Kasoibokat, kuanangan si tuan sibakkat monen anggur ka mandurnia, ‘Sogai sia sipugagalai, kaunungan upada, barania ka siooi sikateitei aili ka siooi siboiki.’

⁹ Kele araoi sipugagalai ka bobo lima silorangan pasasangaropia sia.

¹⁰ Lepa oi sipugagalai barania simancep, ka bagadangan le maiigi rasisilo. Oto pasasangaropia leu et arasilo.

¹¹ Kele arasilo nia, pungungukirangan si tuan.

¹² Kuarangan, ‘Sia siooi sikateitei sangajam le ujunia arapugalai, tapoi anupakereake le sia ka kai simamomomo tubu samba siorik rakat sulu sangagogoi!’

¹³ Kuanangan si tuan ka matat sara sipugagalai, ‘Ale suruak, ta kupajojo ekeu; ta apakerean bagata pasasangaropia sangagogoi?

¹⁴ Alaan upam, tui ekeu. Teu bagaku le ke kukau ka sikateitei nene kele igit siakeku kekeu.

¹⁵ Ta pa momoi kugalai siobaku ka bakkatku? Ele maoro matam kalulut anggaiku?’

¹⁶ Kisedda te sikateitei ibabailiu sipuboboiki samba sipuboboiki ibabailiu sikateitei.”

Pangasegekat Jesus sikatelunia pagalaiat kamateiatnia

¹⁷ Kei manatara Jesus ka Jerusalem, sogainangan sipasiuluinia sipulurua sarada, kuanangan ka matada ka enungan,

¹⁸ “Aian tebai sita mananatara ka Jerusalem, seddangan te itusesegeake Togatsirimanua ka tai imam sabeu samba siagaisurat raukum nia ukuman matei.

¹⁹ Samba rasegeake nia ka sipuarat sabulungan bule rapaloloi, rabobo samba rasiliktengaake nia. Tapoi ka gogoi sikatelunia suru nia minca.”

Panindogat inan Jakobus samba Johannes

²⁰ Lepa oi inanda tatogat Sebedeus sambada tatogania murappo ka matat Jesus masisegeake tiddogetda.

²¹ Kuanangan ka matania Jesus, “Aponia kiddietnu?” Aleginangan nia, “Bule nukua, ruada togaku nene muuddet sara kai kattoetnu sara kai katsiunu ka purimataatnu.”

²² Kuanangan ka matada Jesus, “Ta nuagai kam tiddogetmui. Momoi pa nulo kam ka pulokat pangoringan loketku?” Kuarangan ka matania, “Momoi.”

²³ Kuanangan Jesus, “Nulolo tedda kam ka pulokat pangoringan loketku. Tapoi muuddet kai kattoet samba kai katsiuku, ta aku tuteteu. Aipoi sipuuddet sedda sarat sia pinatarek Ukkuiku le.”

²⁴ Kele araarep nia sipasiului sipulu, mangoingoinangan bagada ka sirua sipusasaraina.

²⁵ Sogainangan sia Jesus kuanangan ka matada, “Nuagai kam, saute ka polak masipaneinei bangsada le sia, samba sia siabeu, mugege le ka tubuda.

²⁶ Ka kam geti bui kisedda. Ke ai ka talagamui sioba mubeunan kau le ibailiu nia sipuuku kam.

²⁷ Samba ke ai ka talagamui sioba muute, kau le ibailiu nia paguguletmui.

²⁸ Keleu Togatsirimanua ta mubeunan aioi, tapoi mupagugulet le samba masikau engania panebui simigi.”

Pasialeat rua simapeset

²⁹ Kele aibela Jesus sambada sipasiuluinia ka Jeriko, tutrangan nia sirimanua simigi.

³⁰ Ai rua simapeset sipukukuddu ka bebet enungan. Kele araarep katusasabau Jesus pugereirangan, “Tuhan, Togat David, kau imakate bagam ka kai!”

³¹ Aserangan sia sirimanua simigi rapumengmeng. Tapoi memei le makokope rapugerei, “Tuhan, Togat David, kau imakate bagam ka kai!”

³² Ia geti tokko Jesus, sogainangan sia kuanangan, “Aponia noba kam kugalai ka tubumui?”

³³ Kuarangan ka matania, “Bule itubuka matamai Tuhan!”

³⁴ Makatenangan bagat Jesus ka tubuda, rapenangan matada, maitconangan leu matada. Lepa tutrangan nia.