Mat. 2 - BUKO SIPUNENAN

Tai kerei sibara ka kabelaiat sulu

¹ Kele aipututu matat Jesus ka Betlehem ka tobbou Judea ka teteret rimata Herodes, oi ka Jerusalem tai kerei sibara ka kabelaiat sulu

² kuarangan, “Kaipa nia rimatada tai Jahudi sibau mututu mata? Akuitco poi kai panyanyatnia ka kabelaiat sulu, ia te akuoi kai murappo ka matania.”

³ Kele aiarep nia rimata Herodes tugegenangan samba sangamberi tai Jerusalem.

⁴ Ruruakenangan leu sangamberi tai imam sabeu samba siagaisurat bangsa Jahudi, isenangan sia kaipa pututukat matat Kristus.

⁵ Kuarangan ka matania, “Ka Betlehem ka tobbou Judea, kise poi aisuratnake si nabi,

⁶ ‘Ekeu Betlehem, ka tobbou Juda, ta te sigoiso ekeu ka talagada tai rimata ka Juda; kekeu le poi ibabara sara rimata sipaneinei bangsaku Israel.’ ”

⁷ Lepa sogainangan tai kerei si Herodes pinakele, lelekngakenangan ka sia pigamoi aimatoila panyanyat nenda.

⁸ Koiniakenangan sia ka Betlehem pele ngangania, “Kenan kam lelekngake kam sipulelelek pagalaiat sikolik, anusesengan geti kam nia, segeakemuian nia ka mataku, bule mei aku kaku murappo ka matania.”

⁹ Lepana le araarep ngangan rimata tui sia. Panyanyat leu siitcora ka kabelaiat sulu musumbulat ka sia teret ka ipot kudduat sikolik.

¹⁰ Angka lepa bagada araitco panyanyat nenda.

¹¹ Tugururangan ka lalep, itcorangan sikolik samba si Maria inania; purekkukrangan murappo ka matania. Bukarangan salipara, kaurangan panguruatda ka tubunia ia te mas, kumanyang samba mur.

¹² Aipatonean poi sia Taikamanua ka pangamutet bui rasoksok minca kai Herodes, ka enungan bageian le araenung ratoili ka laggaira.

Putuituiat ka Misir

¹³ Kurukda tai kerei, oi malaikat Tuhan kai Josep ka bagat pangamutet sipasikukua ka matania, “Suru, ambit sikolik samba inania, katuitui kam mei ka laggai Misir, sedda le nukukuddu kam teret kuaku nia; aibebesiake poi si Herodes masigaba Toga imateiake nia.”

¹⁴ Ia geti suru si Josep, ambitnangan sikolik samba inania soibo nenda leu et tui sia raei ka Misir.

¹⁵ Pukuddurangan sedda teret matei si Herodes. Aibara nene, bule ipuaili siniboi Tuhan sinegeakenen nabi sipasikukua, “Ka laggai Misir le akusogai Togaku.”

Pasimateiat tatoga ka Betlehem

¹⁶ Kele aiagai nia si Herodes patatajuda nia tai kerei, pugolunangan simakope. Lepa koiniakenangan ramateiake sangamberi tatoga ka laggai Betlehem samba ka sangalionia sirua ngarura beunanda teret ka sigoiso, siripot ujut ailelekngake nia ka tai kerei.

¹⁷ Kisedda te ipuaili siniboi nabi Jeremia,

¹⁸ “Amaarepman ka laggai Rama sou samba geri sabeu; aisosoibi poi tatogania si Rahel, ta iagai suibi, atataan poi sia.”

Katoiliat ka Misir

¹⁹ Kele aimatei si Herodes, lotsit malaikat Tuhan kai Josep ka bagat pangamutet ka Misir

²⁰ kuanangan, “Suru, ala sikolik samba inania, nutoili kam ka laggai Israel, amateian poi sia sibesiake masimateiake sikolik.”

²¹ Tusurunangan si Josep, ambitnangan sikolik samba inania ratoili ka laggai Israel.

²² Kele aiarep si Josep, si Arkhelaus le rimata ka Judea silit ukkuinia si Herodes, malotonangan mei sedda. Aipatonean poi nia Taikamanua ka pangamutet, ka Galileangan le aiei.

²³ Sege sedda, pukuddunangan ka sara laggai sipuoni Natsaret. Kisedda te ipuaili siniboira tai nabi, ituoniake nia, “Tai Natsaret.”