Mat. 19 - BUKO SIPUNENAN

Pagalaiat pagalangan

¹ Kele ailepaake Jesus masitiboi sangamberi nene, kaddiuakenangan Galilea ei nia ka laggaira tai Judea ka silat Jordan.

² Maigi sirimanua situt nia, aleakengan leu sia sedda.

³ Ia geti oi tai Parise masisibo nia, kuarangan, “Momoi leu igalak sinanalepnia simanteunia ke ai apa pa paluluatnia?”

⁴ Aleginangan nia Jesus, “Tapei anubasa kam, taddanangan aibaraake sirimanua Taikamanua aibaraakean sia simanteu samba sinanalep?

⁵ Lepa kuanangan, ‘Ia te lulunia ikakaddiuake ukkui samba inania simanteu iloplopmake tubunia ka sinanalepnia, bailiunangan sia sangaakkula.’

⁶ Oto taan rua, sangaakkulaan le sia. Siloplopmakenen Taikamanua poi ta momoi ipasaraake nia sirimanua.”

⁷ Kuarangan ka matania tai Parise, “Oto aisurukatnake kodda si Mose masikau surat pagalangan, masigalak sinanalep?”

⁸ Kuanangan ka matada Jesus, “Kalulut kelat paatuatmui le aiobaake kam si Mose masigalak sinanalepmui. Tapoi ta kirenangan kisedda.

⁹ Kukua nia ka matamui: Kasei sigalak sinanalepnia ke ta kalulut paelenan, lepa putalimounangan ka sinanalep bagei, sipaeelet le nia.”

¹⁰ Kuarangan sipasiului ka matania, “Ke kisedda bai galainia simanteu ka sinanalep, maeru pei le bui tuputalimou.”

¹¹ Kuanangan ka matada Jesus, “Ta sangamberi masisisilo tiboiet nene, sarat sia sipanguruanin Taikamanua le.

¹² Ai sitaioi mutalimou kalulut tutunangan matania kisedda; ai sitaioi mutalimou kalulut sigalai; ai leu sitaiputatalimou teu bagania kalulut masituturi Purimataat Sorga. Kasei siooi masiseseake, kau iseseake nia.”

Isukatnake tatoga Jesus

¹³ Ia geti taroakerangan tatoga ka matat Jesus, bule irape samba itiddouake sia. Tapoi aragolu le sia sipasiuluinia.

¹⁴ Kuanangan ka matada Jesus, “Obaake kam tatoga raoi kaku, ba kekera kam sia; sirimanua kele nene le poi sibakkati Purimataat Sorga.”

¹⁵ Ia geti rapenangan sia Jesus, lepa tui nia sedda.

Silainge simakayo

¹⁶ Ai sara sirimanua amoi ka matat Jesus masikua, “Guru, aponia galajet simaeru galaiakenenku bule kubakkati purimanuaiat sitaitatata?”

¹⁷ Kuanangan ka matania Jesus, “Nunonounou kodda aku pagalaiat simaeru? Sarat Sara le simaeru. Ke noba tuguru ka purimanuaiat, reddet le surukat Taikamanua.”

¹⁸ Kuanangan, “Surukat kipa?” Aleginangan nia Jesus, “Bui nupamatei; bui nupaelet; bui nupanangkou; bui numunengake boko;

¹⁹ suru ukkuinu samba inam; pununtuki baga aleinu sirimanua kele tubum.”

²⁰ Kuanangan ka matania silainge, “Sangamberinia nene akureddetnan; apangan le simagulai kaku?”

²¹ Kuanangan ka matania Jesus, “Ke noba numasun eru, kenan sakiake sangamberi bibiletnu, kaunungan bulagatnia ka simageba, bara ibara pukayoatnu ka sorga; lepa oi ekeu masitut aku.”

²² Kele aiarep tiboiet nene silainge, tui nia reureu bagania, simakope kayo le poi nia.

²³ Kuanangan Jesus ka matada sipasiuluinia, “Kukua nia ka matamui, bulat mabesi ka simakayo tuguru ka Purimataat Sorga.

²⁴ Kukua nia minca ka matamui: Onta pei le malabbei tubuluk ka matat susuilak ka simakayo tuguru ka Purimataat Taikamanua.”

²⁵ Kele araarep nia sipasiului makeppunangan ka bagada kuarangan, “Oto kaseian le masisese puaragat?”

²⁶ Kinerenangan sia Jesus kuanangan, “Ka sirimanua bai nia ta momoi, tapoi ka Taikamanua geti sangamberinia le momoi.”

²⁷ Kuanangan si Petrus, “Akukaddiuakean tebai kai sangamberinia masitut ekeu; oto aponia babara ka kai silinia?”

²⁸ Kuanangan ka matada Jesus, “Kukua nia ka matamui: Ka pasibaraat polak sibau, ke muuddet Togatsirimanua ka uddenan pulatsanannia, kam sipasitutut aku muuuddet leu kam ka pulurua uddenan purimataat masiukum sipulurua muntogat Israel.

²⁹ Samba senen sikaddiuake lalep ele saraina ele samaniu ele ukkui ele ina ele tatoga ele monenia kalulut oningku, isisilo minca sangotu ngaoleat, samba iikepmake purimanuaiat sitaitatata.

³⁰ Tapoi maigi sia sipuboboiki ibabailiu sikateitei samba sikateitei ibabailiu sipuboboiki.”