Mat. 18 - BUKO SIPUNENAN

Kasei le siabeu ka Purimataat Sorga

¹ Ka teteret nenda oi sipasiului ka matat Jesus kuarangan, “Kasei siabeu ka Purimataat Sorga?”

² Sogainangan sara toga sigoiso Jesus, rioakenangan nia ka talagada,

³ kuanangan, “Kukua nia ka matamui: Ke ta nuole kam bailiu kele tatoga, ta tuguguru kam ka Purimataat Sorga.

⁴ Oto kasei sipaepe tubuna kele toga nene, nia te siabeu ka Purimataat Sorga.

⁵ Samba kasei siala sara toga kele nene ka oningku, aku le aiala.”

Masikau sirimanua mujo

⁶ “Kasei sigalai pajoat ka sara taigoiso nene simatonem baga kaku bailiu nia mujo, makaeru pei le ka tubunia tusereake bukku panundukat ka lolokkatnia ituloulouake nia ka koat simakeru.

⁷ Paan te ka taikapolak kalulut pajoat. Pajoat geti kirenangan babara, tapoi paan te ka sia sibaraake pajoat.

⁸ Ke ipajo bai ekeu kabei ele rerem, tippu le gikgikngakenungan nia; maeru pei le sisara kabei ele sisara rere ekeu tuguru ka purimanuaiat, ka sirua kabei ele sirua rere ekeu tugikgikngake ka api narako.

⁹ Samba ke ipajo bai ekeu matam, kiok le gikgikngakenungan nia; maeru pei le sisara mata ekeu tuguru ka purimanuaiat ka sirua mata tugikgikngake ka api narako.”

Pasikat pagalaiat biribiri simalilimai

¹⁰ “Pagaba kam, bui nupaloloi kam sara ka sigoiso tiboi tubu nene. Aipoi kukua nia ka matamui: Samalaikada ka sorga mariuriu le sia ka matat Ukkuiku ka sorga. [

¹¹ Aipoi Togatsirimanua masiarauake simalilimai le aioi.]

¹² Kipa nupaatu kam? Ke ai ka sara sirimanua biribirinia sangotu ngamuneng, malimai bai sara, ta pa ikakaddiuake sisiba pulu siba ka leleu, iei masigaba simalilimai?

¹³ Kukua nia ka matamui: Ke aisesengan bai, bulat abeu angkat bagania ka sisangamuneng nene, bele pei ka sisiba pulu siba sitaimalilimai.

¹⁴ Kisedda leu te taiobana bagat Ukkuimui ka sorga imalimai sara ka sigoiso tiboi tubu nene.”

Masinganturu saraina

¹⁵ “Ke igalai jo ka tubum sarainam, kenan susui matania, tapoi ruamui le. Ke iarepi tiboietnu, anusesengan minca sarainam.

¹⁶ Ta geti iarepi tiboietnu, ambitnungan sara ele rua aleinu, bule sangamberi titiboat ai rua ele telu siarep nia.

¹⁷ Ta bai ireddet nganganda, segeakenungan nia ka matat paamian. Ke ta leu et iarepi nganturat paamian, addeakenungan nia kele sipuarat sabulungan ele kele sipuuku cukai.

¹⁸ Kukua nia ka matamui: Apa le nuappara kam ka polak, tuaappara leu te ka sorga, samba apa le nurubba kam ka polak, tururubba leu te ka sorga.

¹⁹ Kukua nia ka matamui: Ke ai rua ka kam simakere baga ka polak nene masitiddou apa pa, ta isosoppi ikau sinindoura Ukkuiku ka sorga.

²⁰ Kaipa poi maruru rua ele telu sirimanua kalulut oningku, ai aku sedda ka talagada.”

Pasikat pagalaiat pagugulet sitaimakate baga

²¹ Lepa oi si Petrus masikua, “Tuhan, teret piga ngaminca kuappeake jot sarainangku igalai bai jo ka tubuku? Metnangan pitu ngaminca?”

²² Kuanangan ka matania Jesus, “Ta kukua ka matam pitu ngaminca, tapoi teret pitu pulu ngaminca pitu ngaminca.

²³ Aipoi Purimataat Sorga makere le nia ka sara rimata sigalai pasiaddeat ka sapaguguletnia.

²⁴ Kele aitaddaake masiadde taroakerangan ka matania sipuutak pulu ribu talenta.

²⁵ Tapoi kalulut ta momoi ilettuake nia, kuanangan rimata itusakiake nia samba sinanalepnia samba tatogania samba sangamberi sibabara ka tubunia pasilettut utaknia.

²⁶ Ia geti purapponangan pagugulet manindou ka matania masikua, ‘Omake bagam kaku. Ai leu kulettuake sangamberinia utakku.’

²⁷ Makatenangan bagat rimata ka tubunia, posanangan utaknia, belaakenangan nia.

²⁸ Tapoi kele aibela pagugulet nenda sesenangan sara aleinia pagugulet sipuutak ka tubunia sangotu ropia. Labanangan nia petsutnangan lolokkatnia kuanangan, ‘Ake utaknu sangamberinia.’

²⁹ Purapponangan aleinia pagugulet manindou ka matania, ‘Omake bagam kaku. Ai leu kulettuake nia utakku.’

³⁰ Tapoi ta ioba, memei le nia masikau nia ka penjara teret ilettuake utaknia.

³¹ Kele araitco nene sapagugulet bagei, reureu le bagada, eirangan leu masisegeake nene ka matat rimata.

³² Sogainangan nia rimata kuanangan ka matania, ‘Bulat pagugulet sikatai le bai ekeu! Sangamberi utaknu akulepaakean kalulut paninindogim aku.

³³ Ta siripokatnangan nupukateki baga aleinu kele pukakatekiku ekeu baga?’

³⁴ Pugolunangan leu rimata, kaunangan nia ka penjara teret ilettuake sangamberi utaknia.

³⁵ Kisedda leu te igagalai ka tubumui Ukkuiku ka sorga, ke ta nuappeake kam joda saaleimui ka paatuatmui.”