Mat. 17 - BUKO SIPUNENAN

Pulatsanan Jesus ka leleu

¹ Pasat enem ngagogoi ambitnangan Jesus si Petrus, si Jakobus samba sarainania si Johannes manatara ka leleu simabuak sarada.

² Ia geti silinangan tubunia Jesus ka matada, toro matania kele sulu, bulau leppeinia kele pato.

³ Ia geti itcorangan si Mose samba si Elia masipatiboake Jesus.

⁴ Kuanangan si Petrus ka matat Jesus, “Pate eru takuddu se Tuhan. Ke noba bai nia, galaikungan telu sapou: sara kekeu, sara kai Mose, sara kai Elia.”

⁵ Ai pei le maninibo si Petrus, kuneminangan sia tanairusa simatoro, maarepnangan leu nganga sibara ka tanairusa masikua, “Nene te Togaku, kilibet bagaku, obaket bagaku, reddet kam ngangania!”

⁶ Kele araarep nia sipasiului rappo sia ka polak kopet lotora.

⁷ Ia geti oi Jesus rapenangan sia kuanangan, “Suru kam, ba maloloto kam!”

⁸ Kele arateilaake matada, ta anai araitco kasei pa sarat Jesus le.

⁹ Ai sia tugogorosot barada ka leleu paneineinangan sia Jesus, “Bui nupoiliat kam nia ka kasei pa siitcomui nene ke tapei tusuru Togatsirimanua ka simamatei.”

¹⁰ Lepa nounourangan nia sipasiuluinia, “Kipa ne rakukua siagaisurat buita moi boiki si Elia?”

¹¹ Aleginangan nia Jesus, “Kirenangan momoi si Elia masipaeru sangamberinia.

¹² Tapoi kukua nia ka matamui, amoian nia si Elia, tapoi ta araagai nia; siobat bagada le aragalai ka tubunia. Kisedda leu te ragagalaiake ka Togatsirimanua.”

¹³ Ia pei kolou ka bagada sipasiuluinia, si Johannes Sipasirarau le sikuania ka matada.

Ialeake Jesus sara toga pinasaileu sanitu

¹⁴ Kele arasege ka sirimanua simigi, oi sara sirimanua murekkuk ka matat Jesus

¹⁵ masikua, “Tuhan, kau imakate bagam ka togaku! Maroro nia, besi lepa tubunia. Mareirei ibele ka api, ai bagei ka oinan.

¹⁶ Akuambitnan nia ka sipasiuluinu, tapoi ta amoi araaleake nia.”

¹⁷ Aleginangan nia Jesus, “Bulat reddenan sitaimatonem baga samba simapepe patuat le bai kam! Apangan le burunia kupaalei kam? Apangan le burunia kupuomi kam baga? Ake kam nia sene!”

¹⁸ Asenangan sanitu Jesus, belanangan leu et, malenangan toga ka jam nenda leu et.

¹⁹ Lepa oi sipasiului Jesus ka matania sarada masinounou nia, “Ta koi momoi ka kai kuusiake kai sanitu?”

²⁰ Aleginangan nia Jesus, “Lulut gulai tonem bagamui. Aipoi kukua nia ka matamui: Ai bai tonem bagamui beu luikut ube momoi nukua kam ka leleu nene, ‘Ritsiake ekeu sedda!’ turitsinangan leu et. Oto ta anai sitaioi nugalai kam. [

²¹ Tapoi sanitu kele nene, sarat panindogat samba puaso le momoi ituituiake nia.”]

Pangasegekat Jesus sikaruania pagalaiat pangoringannia

²² Ia geti ai sia marururu sambada sipasiuluinia ka Galilea kuanangan ka matada Jesus, “Tusesegeakean le te Togatsirimanua ka kabeira sirimanua.

²³ Mateiakerangan nia, tapoi ka gogoi sikatelunia tusuruake nia minca.” Mareureunangan bagada sipasiuluinia.

Jesus masikau juran Uman Taikamanua

²⁴ Kele aisege Jesus sambada sipasiuluinia ka Kapernaum, oi sipuuku juran kai Petrus masinounou, “Kipa ta ikakau juran Uman Taikamanua Gurumui?”

²⁵ Kuanangan si Petrus, “Ikakau.” Kele aisege si Petrus ka lalep boikiakenangan Jesus masikua, “Simon, kipa paatuatnu, kasei masikakau cukai samba juran ka tai rimata ka polak? Sarakyatda ele siooiake?”

²⁶ Aleginangan nia si Petrus, “Siooiake le.” Kuanangan ka matania Jesus, “Kisedda bai nia, oto sarakyat taan leu rakakau juran.

²⁷ Tapoi buian imabele bagada, kenan ka koat nukabili iba. Alanungan iba sikabilim siboiki, ngangaakenungan ngungunia, ai sedda bulagat sangaropia. Ia te nuaala nukau nia ka sia juranta ruata.”