Mat. 16 - BUKO SIPUNENAN

Tai Parise samba tai Saduse masitiddou kerek

¹ Lepa oi tai Parise samba tai Saduse masisibo Jesus. Tiddourangan bule igalai ka matada kerek sibara ka sorga.

² Aleginangan nia Jesus, “Mabonan manua kasoibokat kuamuian, ‘Maeru manua.’

³ Mabonan manua simancep samba malugub, kuamuian, ‘Makatai manua.’ Matat manua nuagai kam masipatuptup, toggaiat tetere geti ta nuagai kam.

⁴ Reddenan sikatai samba sipaeelet nene masitiddou kerek. Ta tukakau kerek ka sia, toggaiat nabi Jona le tukakau.” Lepa kaddiuakenangan sia Jesus tui nia.

Siomanda tai Parise samba Saduse

⁵ Kele arasege sipasiului ka sila, agairangan kakalipogida masiambit roti.

⁶ Kuanangan ka matada Jesus, “Pagaba samba suksuk kam siomanda tai Parise samba tai Saduse.”

⁷ Patiborangan pasasambada, “Taiaambitta roti te ikukua nene.”

⁸ Iagai le poi Jesus sikuada kuanangan, “Patitibongan koi kam taiaambitmui roti? Apate gulai tonem bagamui!

⁹ Tapei pa nuagai kam? Ta nurerepdep kam silima roti ka lima ribu sirimanua samba piga ngagaraga anururuake kam legeinia?

¹⁰ Ele sipitu roti ka epat ribu sirimanua samba piga ngagaraga anururuake kam legeinia?

¹¹ Apate taiagaimui nia taipurorotinia sikuaku ka matamui. Suksuk kam siomanda tai Parise samba tai Saduse le.”

¹² Ia pei agairangan taipusisioman rotinia sikuat Jesus suksungenda, tapoi nganturatda tai Parise samba tai Saduse le.

Pasimunengan Petrus pagalaiat Jesus

¹³ Kele aisege Jesus ka Kaisarea Pilippi nounounangan sipasiuluinia, “Kasei le Togatsirimanua rakua nia sirimanua?”

¹⁴ Kuarangan, “Ai sipasikukua si Johannes Sipasirarau, sabagei masikua si Elia, sabagei masikua si Jeremia ele sara ka talagada tai nabi.”

¹⁵ Kuanangan ka matada Jesus, “Kam ka kam, kasei le aku nukua kam?”

¹⁶ Aleginangan nia si Simon Petrus, “Kristus le ekeu, Togat Taikamanua sipuririmanua.”

¹⁷ Aleginangan nia Jesus, “Mauktuk ekeu Simon togat Jona, ta sirimanua aipoiliat nia ka matam, Ukkuiku ka sorga le.

¹⁸ Kaku leu kukua ka matam: si Petrus le ekeu (bulak); ka uddut bulak nene le kuririoake paamianku samba kamateiat ta ioom ka tubunia.

¹⁹ Kuaake kekeu panguksik Purimataat Sorga. Apa le nuappara ka polak, tuaappara leu te ka sorga; apa le nurubba ka polak, tururubba leu te ka sorga.”

²⁰ Lepa paneineinangan sipasiuluinia Jesus, bui rapoiliat nia ka kasei pa Kristus le nia.

Pangasegekat Jesus siboiki pagalaiat pangoringannia samba pagalaiat masitut nia

²¹ Ka teteret nenda taddaakenangan Jesus masipoiliat ka sipasiuluinia, ta momoi ta iei ka Jerusalem masiorik maigi paoreat sibara ka tai baja, tai imam sabeu samba siagaisurat; lepa mateiake, ia geti suruake ka gogoi sikatelunia.

²² Lepa alanangan nia si Petrus apei sia aseakenangan nia pele ngangania, “Kepei iromake ekeu Taikamanua, Tuhan, bui ibara kekeu nene!”

²³ Beliuakenangan tubunia Jesus kuanangan ka matat Petrus, “Kenan katuitui Sanitu! Masisaila enunganku le ekeu; ka pinaatut sirimanua le numatututuru, ta ka Taikamanua.”

²⁴ Lepa kuanangan Jesus ka matada sipasiuluinia, “Senen sioba masitut aku, kau iputata tubunia, bairatnangan siliktengania, tutnangan aku.

²⁵ Aipoi sipasikikiliu engania, malilimai le engania; sitaipuletsei engania kalulut aku, ia te masikikiliu engania.

²⁶ Apa kauna nia sirimanua ke ibakkati sangalio polak, tapoi engania malilimai le? Ele apa momoi ikau sirimanua silit engania?

²⁷ Momoi le poi Togatsirimanua ka pulatsanan Ukkuinia sambada samalaikania. Sedda siliakenangan ka senen sirimanua siripot sigalaira.

²⁸ Kukua nia ka matamui: Ai piga pa ka talagamui se, tapei mamatei sia, araitcoan ioi Togatsirimanua ka puririmatania.”