Mat. 15 - BUKO SIPUNENAN

Surukat Taikamanua samba aratda taikebbukat

¹ Lepa oi piga pa tai Parise samba siagaisurat sibara ka Jerusalem ka matat Jesus masikua,

² “Angoi rapasabau aratda taikebbukatta sipasiuluinu? Taipasibubui kabei poi sia rapukom.”

³ Aleginangan nia Jesus, “Angoi nupasabau kam ka kam Surukat Taikamanua kalulut aratmui?

⁴ Aikua poi Taikamanua, ‘Suru ukkuinu samba inam,’ samba ‘Sipateleiji ukkui ele inania, buita tumateiake nia.’

⁵ Tapoi kam masikua: Kasei sikua ka ukkui ele ka inania, ‘Kei akenenku kekeu te nene, tapoi akukauan nia buluakenen ka Taikamanua,’

⁶ taan leu isusuru ukkui ele inania. Oto anuputataan kam tiboiet Taikamanua kalulut aratmui.

⁷ Kam sipatataju! Aisesengan tebai sinibalaakenen Jesaya pagalaiat kam,

⁸ ‘Ka ngungunda le raumun aku bangsa nene, paatuatda geti areu kaku.

⁹ Siboboi le rapaninindogi aku, surukat sirimanua le poi ranganganturuake.’ ”

¹⁰ Ia geti sogainangan sirimanua simigi Jesus kuanangan ka matada, “Arep kam, lelekngake kam!

¹¹ Ta sitububuluk ka ngungu ilololitnake sirimanua, sibebela ka nganga le, ia te ilololitnake sirimanua.”

¹² Lepa oi sipasiuluinia masikua ka matania, “Nuagai leu pubebelet bagada tai Parise kalulut tiboietnu?”

¹³ Aleginangan nia Jesus, “Senen siureman taiuremen Ukkuiku ka sorga, tububurau le.

¹⁴ Ba puuku kam sia. Paneinei sipeset le sia, masipalulu simapeset; oto ke sipeset ipalulu simapeset, bebele sia ruada ka guluggu.”

¹⁵ Kuanangan si Petrus, “Kolouake ka kai pasikat nene.”

¹⁶ Aleginangan nia Jesus, “Kam leu tapei makolou ka bagamui?

¹⁷ Ta nuagai kam, sangamberi sitububuluk ka ngungu, ei le ka balugu, lepa bela minca?

¹⁸ Tapoi sibebela ka nganga, sibara ka paatuat te, nenda le ilololitnake sirimanua.

¹⁹ Ka paatuat le poi ibabara paatuat sikatai, pamamatei, paeelet, puuumun, pananangkou, paboboko samba asa.

²⁰ Nene te silolitnake sirimanua. Mukom taipasibubui kabei geti ta ilololitnake sirimanua.”

Tonem bagat sinanalep tai Kanaan

²¹ Lepa tui Jesus sedda ei nia ka laggaira tai Tirus samba Sidon.

²² Ia geti oi sara sinanalep tai Kanaan sibara ka laggai nenda masiailiake Jesus pusoganangan, “Tuhan Togat David, kau imanuntu bagam kaku! Togaku siokko aipasasaileu nia sanitu, besi lepa tubunia.”

²³ Tapoi beri alegina nia Jesus. Lepa oi sipasiuluinia masitiddou ka matania, “Kauan bai ituitui, sarat pugegereian le nia ka teiteita.”

²⁴ Alegina le nia Jesus, “Sarat ka biribiri simalilimai ka uman Israel le aitukoiniake aku.”

²⁵ Tapoi oi nia sinanalep purapponangan ka matat Jesus kuanangan, “Romake aku Tuhan.”

²⁶ Aleginangan nia Jesus, “Ta pasese tuala katda tatoga ituribbaiake ka jojo.”

²⁷ Kuanangan sinanalep, “Aisesengan tedda Tuhan, tapoi ai leu ikokom jojo porat kan sibebele ka tei mejat tuannia.”

²⁸ Lepa kuanangan Jesus ialegi nia, “Ina, bulat abeu tonem bagam, babarangan kekeu siripot kiddietnu.” Ka jam nenda leu et ale togania.

Ialeake maigi sirimanua Jesus

²⁹ Tuitui aituitui Jesus sedda, riringinangan bebet koat Galilea tatara ka leleu pukuddunangan sedda.

³⁰ Oirangan leu sirimanua simigi masitaroake ka matania simasakit, simajegeu, simapeset, taiagai manibo samba pabageibagei, galakngakerangan sia ka bebet reret Jesus, aleakenangan sia.

³¹ Kisei le ka bagada sirimanua simigi masiitco rapanibo taiagai manibo, ramale simajegeu, rapuenung simasakit, ramaitco mata simapeset; umunakerangan leu Taikamanuan Israel.

Ipakom epat ribu sirimanua Jesus

³² Lepa sogainangan sipasiuluinia Jesus kuanangan, “Amanuntungan bagaku ka sirimanua simigi nene, telu ngagogoian poi araomake mukuddu se ka tubuku, taan anai katda. Ta koba ratuitui taipukokom, mamatei sia laje ka enungan.”

³³ Kuarangan ka matania sipasiuluinia, “Kaipa taaala kan ka simatangeu se masiektekngake igida kele nene?”

³⁴ Kuanangan ka matada Jesus, “Ai piga roti ka kam?” Alegirangan, “Ai pitu samba piga pa iba sigoiso.”

³⁵ Kuanangan Jesus ka sirimanua simigi rapuuddet ka polak.

³⁶ Alanangan roti sipitu samba iba, kuanangan sura ka Taikamanua, paabbonangan nia kaunangan nia ka sipasiuluinia, sipasiului masiparubei ka sirimanua simigi.

³⁷ Pukomrangan leu sangamberida ektek. Lepa ruruakerangan legeira, sun pitu ngagaraga.

³⁸ Igida sipukokom ai epat ribu taimanteu, ta atuadde tainanalep samba tatoga.

³⁹ Lepa aratuitui sirimanua simigi, janang Jesus ka abak iei ka Magadan.