Mat. 14 - BUKO SIPUNENAN

Kamateiat Johannes Sipasirarau

¹ Ka teteret nenda maarepnangan katuareman Jesus kai Herodes rimata ka Galilea.

² Kuanangan ka matada sapaguguletnia, “Si Johannes Sipasirarau te nene, atusurungan nia ka simamatei, ia te imakekerek.”

³ Aiguguluakean poi si Herodes ralaba, rakabe samba rapenjaraake si Johannes lulut si Herodias kalaleman Pilipus sarainania.

⁴ Aikua poi ka matania si Johannes, “Ta pasese nuala si Herodias!”

⁵ Kei imamateiakean le nia, lotona le ka sirimanua simigi, arapunabingan poi si Johannes.

⁶ Tapoi ka pasirepdeman pututukat matat Herodes, puturunangan togat Herodias siokko ka talagada. Bulat ioba bagania si Herodes,

⁷ pat pusuppanangan masikau ka tubunia apa le itiddou.

⁸ Ainganturungan poi nia inania kuanangan siokko, “Ake kaku sene ka bagat mangko utet Johannes Sipasirarau.”

⁹ Mareureunangan bagania rimata; tapoi kalulut suppania, araarepman pei bagei tairauma, kuanangan rakau sinindounia.

¹⁰ Koiniakenangan rasaggiri lolokkat Johannes ka penjara,

¹¹ ambitrangan utenia ka bagat mangko kaurangan nia ka siokko, kaunangan nia ka sia ka inania.

¹² Lepa oi sipasiului Johannes Sipasirarau, alarangan tubunia rateiakerangan nia. Lepa ei sia masisegeake ka matat Jesus.

Ipakom lima ribu sirimanua Jesus

¹³ Kele aiarep nia Jesus putuituinangan sedda muabak mei ka simatangeu sarania. Areprangan nia sirimanua simigi, tutrangan nia musila barada ka laggaira.

¹⁴ Kele aitusakai itconangan sirimanua simigi, makatenangan bagania ka tubuda, aleakenangan simabesi ka talagada.

¹⁵ Kasoibokatnia, oi sipasiuluinia masikua ka matania, “Simatangeu le kudduat nene, amasoiboan bagei, kuangan le ka sirimanua simigi raei masisaki katda ka laggai.”

¹⁶ Kuanangan ka matada Jesus, “Taan leu memei sia, kam le ikakau katda.”

¹⁷ Kuarangan sipasiuluinia, “Ta iaaili, lima le roti samba rua iba.”

¹⁸ Kuanangan Jesus, “Ake kam sene.”

¹⁹ Lepa kuanangan ka sirimanua simigi rapuuddet ka turuturu. Alanangan roti silima samba iba sirua Jesus, teilanangan manua kuanangan sura ka Taikamanua, paabbonangan nia, kaunangan nia ka sipasiuluinia, sipasiului masiparubei ka sirimanua simigi.

²⁰ Pukomrangan leu sangamberida ektek. Lepa ruruakerangan legeira, sun pulu rua ngagaraga.

²¹ Igida sipukokom ai pa lima ribu taimanteu tapei tuadde tainanalep samba tatoga.

Jesus muenung ka uddut koat

²² Lepa nenda kuanangan Jesus ka sipasiuluinia ratujanang ka abak rapuboiki mutalipo ka sila, pangenan rapusabu sirimanua simigi.

²³ Kele arapusabu sirimanua simigi tatara nia ka leleu sarania manindou. Seddangan leu et nia sotsoibo sarania.

²⁴ Abak geti areuan nia ka kapi, aian ipateteipu nia onu, sasaket le poi rusa.

²⁵ Ia geti ka patokat, oi Jesus itagetnake sia muenung ka uddut koat.

²⁶ Kele araitco nia sipasiuluinia ipuenung ka uddut koat, tugegerangan kuarangan, “Kodda sanitu!” Pugereirangan lotora.

²⁷ Tapoi maruei le aiteka sia Jesus kuanangan, “Ta leu! Aku le, ba maloloto kam!”

²⁸ Kuanangan si Petrus, “Tuhan, ekeu bai nia, kua kuoi kaku muenung ka uddut koat kuailiake ekeu.”

²⁹ “Konanan,” ngangan Jesus. Gorosot si Petrus ka uddut koat puenungnangan itagetnake Jesus.

³⁰ Kele aiitco iake rusa, malotonangan, ai le goiso imalelelep, pugereinangan, “Tuhan, romake aku!”

³¹ Totoiakenangan kabeinia Jesus iala nia, kuanangan ka matania, “Apate gulai tonem bagam; apa te nukakalotoake.”

³² Lepa janang sia ka abak, puarinangan rusa.

³³ Sipasiului sikuddu ka abak, oi sia murappo ka matat Jesus kuarangan, “Bulatnia Togat Taikamanua le ekeu.”

Ialeake Jesus simabesi ka Genesaret

³⁴ Ia geti putaliporangan sege sia ka laggai Genesaret.

³⁵ Kele araagai nia sirimanua sikuddu sedda, paareprangan nia ka sangalio riringan nenda. Ia geti taroakerangan ka matania sangamberi simabesi.

³⁶ Tiddourangan bule iobaake rarape jaijait leppeinia. Sangamberida sipasirarape ale.