Mat. 10 - BUKO SIPUNENAN

Tai apostel sipulurua

¹ Ia geti sogainangan sipasiuluinia sipulurua Jesus raoi ka matania, kaunangan ka sia gege masiusiake sanitu, masialeake sene ngamata besi samba mala.

² Oninda tai apostel sipulurua ia te: Siboiki si Simon sipuoni si Petrus samba sarainania si Andreas, si Jakobus samba sarainania si Johannes tatogat Sebedeus;

³ si Pilipus samba si Bartolomeus; si Tomas samba si Mateus sipuuku cukai; si Jakobus togat Alpeus, samba si Tadeus,

⁴ si Simon tai Kana, samba si Judas Iskariot, ia te sipajo Jesus.

Pakoiniat samba patonekat Jesus ka tai apostel

⁵ Sia sipulurua nene te ikoiniake Jesus samba itoneake ka matada, “Bui nuei kam ka laggaira sipuarat sabulungan ele ka laggaira tai Samaria;

⁶ ka biribiri simalilimai ka uman Israel le nueei kam.

⁷ Ei kam paarep kam: Amalegerengan Purimataat Sorga.

⁸ Aleake kam simabesi; suruake kam simamatei; aleake kam simabogbong samba usiake kam sanitu. Panguruat le anusilo kam nia, panguruat leu nukau kam nia.

⁹ Bui nuambit kam mas ele perak ele tembaga ka lompemui;

¹⁰ ele balut ele rua leppei ele kasu ele tutura; pakomen le poi sipugagalai.

¹¹ Guru kam ka laggai sabeu ele sigoiso, lelekngake kam, kasei simateu kasegekatmui; seddangan te kam teret nutuitui kam.

¹² Guru kam ka lalepda, roroi kam sia.

¹³ Rasilo bai kam ka lalep nenda, ottotnangan salammui ka tubuda. Ke ta geti, toili minca salammui ka tubumui.

¹⁴ Ta bai raala kam ele ta raarepi tiboietmui, tui kam, kaddiuakemuian lalep ele laggai nenda, sosoakemuian abu ka reemui.

¹⁵ Kukua nia ka matamui: Ka gogoi pasiukuman, ukuman laggai Sodom samba Gomora pei le malabbei ka ukuman laggai nenda.”

Paoreat ka gogoi sibabara

¹⁶ “Kele biribiri ka talagat arimau le tebai kukoiniake kam, oto kau imasiku paatuatmui kele ulou samba ta mapajoat kele ngorut.

¹⁷ Suksuk kam tubumui, rasesegeake poi kam ka rapat sabeu samba rapalilisoji kam ka bagat uma parurukatda.

¹⁸ Ka matada sapamarenta samba tai rimata leu rapagigirit kam kalulut aku, pasimunengmui aku ka matada samba ka sipuarat sabulungan.

¹⁹ Oto bara bara rasegeake kam, bui imakarat bagamui kipa ele apa kuanenmuim tuaake le poi ka kam kuanenmui ka jam nenda.

²⁰ Ta poi kam maninibo, Ketsat Ukkuimui sikuddu ka tubumui le maninibo.

²¹ Babara te saraina masisegeake sarainania itumateiake; kisedda leu ukkui ka tatogania, tatoga leu mugegege ka saeppu bule ramateiake sia.

²² Rapulalagaki te kam baga sirimanua kalulut oningku; tapoi sipasioomake teret kalepakatnia, maarau nia.

²³ Oto bara bai rapaorei kam ka laggai sara, tui kam ka laggai bagei. Kukua nia ka matamui: Tapei tusasalu nugejengi kam laggai Israel, amoian Togatsirimanua.

²⁴ Ta anai sipasiului sisaliu gurunia, ele pagugulet sisaliu tuannia.

²⁵ Metnangan ka sipasiului ke makerean nia ka gurunia, kisedda leu pagugulet ka tuannia.”

Taikamanua le kalotoake kam

²⁶ “Oto ba kakalotoake kam sia, aipoi ta anai sinambo taitotoilaakenen, samba ta anai simalipput taimaagai geti.

²⁷ Siniboiku ka matamui ka gepgep, tiboi le kam nia ka pato; samba sikasatnakenenku ka piumui, paarep le kam nia ka teitei lalep.

²⁸ Ba kakalotoake kam sia simateiake tubu sitaioi masimateiake ketsat. Taikamanua simagege masimateiake ketsat samba tubu ka narako le kalotoake kam.

²⁹ Ta pa sangasen rasakiake rua ngamuneng nganya? Tapoi beri sara bebele ka polak, ke ta teu Ukkuimui.

³⁰ Beri alaimui aiaddengan.

³¹ Oto ba maloloto kam, kam pei le poi makeppu saki ka nganya simigi.”

Masimunengake Kristus ka matat sirimanua

³² “Kasei simunengake aku ka matat sirimanua, kumumunengake leu nia kaku ka matat Ukkuiku ka sorga.

³³ Tapoi kasei sipakele aku ka matat sirimanua, kupakekele leu nia kaku ka matat Ukkuiku ka sorga.”

Ta aban, lanjau le

³⁴ “Bui ka bagamui masiake aban ka polak akuoi; ta masiake aban akuoi, lanjau le.

³⁵ Masipasaraake sirimanua le akuoi, toga simanteu ka ukkuinia, toga sinanalep ka inania, sinanalep talikuet ka ina siputataliku.

³⁶ Bailiu senen sirimanua, sikuddu ka lalepnangan le saggaknia.

³⁷ Sipununtuki baga ukkui ele inania bele pei aku, ta mateu nia kaku.

³⁸ Sitaibairat siliktengania masitut aku, ta mateu nia kaku.

³⁹ Sipasikikiliu engania, malilimai le engania; sipalimai engania kalulut aku, ia te masikikiliu engania.”

Upa

⁴⁰ “Sipasiaala kam, aku le aiala; sipasiaala aku, sipasikokoiniake aku le aiala.

⁴¹ Sipasiaala nabi ka puooninia nabi, isisilo leu ka sia upat nabi. Sipasiaala simaroipo baga ka puooninia simaroipo baga, isisilo leu ka sia upat simaroipo baga.

⁴² Samba kasei sipalo sara ka talagat taiaaddeakenen nene ka puooninda sipasiuluiku kenanen sangapulokat oinan simaleppet, kukua nia ka matamui: Bulat ta masasaigo upania.”