Malk. 3 - BUKO SIPUNENAN

¹ Aleginangan Tuhan Sipulugege, “Kukoiniake le pakoinietKu bule ipatarek enunganKu. Iageti sinulut Aku, Tuhan gabaetmui, oi Aku geti ka UmangKu. PakoinienKu repdemenmui nenda, momoinia masisegeake palelenganKu.”

² Tapoi kasei momoi masiomake ka gogoi kaoijanan Tuhan samba ipatoila tubuNia? Aipoi makere le nia obengan siagai masipalina logam, samba kele sabun siagai manamtap bibilet.

³ MomoiNia bule ipasiukum, kele sirimanua sipasilina samba sipalatcat perak. Kele sara sirimanua siagai mugalai logam masipalatcat mas samba perak, kisedda te pakoiniet Tuhan ipalina tai imam, bule rapanguruatnake buluakenen ka enungan siobat bagat Tuhan.

⁴ Iageti kele ka teteret siburu, ioba bagania si Tuhan ka sangamberi buluakenen sipanguruatnakenen ka tubuNia sipanguruatnakendra paamian Jehuda samba Jerusalem.

⁵ Kuanangan Tuhan Sipulugege, “Momoi te Aku ka tubumui bule kupasiukum. Ta'an mauju ibailiu Aku sipasimumuneng ka sia sipugagaut, sirimanua sigalai paelenan, simunengake boko, sigalai patajuat kapasikakau upa ka sirimanua upaet, sipajo tai lumang, tai lusai, samba sirimanua siooiake, ka sia sangamberi sirimanua sitaisuru' Aku.

Panguruat sepersepuluhan

⁶ “Aku te' Tuhan, samba Aku ta' isisili. Kalulut nenda, kam, sapunuteteu Jakob, ta' tususubuake.

⁷ Kele taikebbukatmui siburu, sangamberimui masipasabau surukatKu samba ta mariuriu topitmui. Toiliake kam katubukKu, iageti toili leu Aku ka tubumui. Tapoi parere' peile kam, “Aponia bulat galaiakenenmai bule kutoili kai ka tubum?”

⁸ Kineiget parere' aku ka tubumui: Momoi pa' sirimanua masibokoi Taikamanua? Bulat ta'momoi. Tapoi nupabokoiji peile kam Aku. Nuparere' kam, “Angoi?” AlegietKu: ka bagat masilului sepersepuluhan samba masikau panguruat.

⁹ Sangamberi bangsa masipataju Aku, oto iorak le kam sangamberimui pateleijat.

¹⁰ Ambit kam sepersepuluhanmui sangamberinia ka UmangKu bule ibara komen simigi sedda. Sibo kam Aku, iageti itcomuian Kubukaake sangamberi matatbaliu maua samba kusunnake ka tubumui sangamberi simaeru.

¹¹ Ta' Kuoobaake leiti ipakatai puuktungan ka polakmui; sangamberi loinat anggurmui pubuanangan leu simigi.

¹² Oto kuarangan leu kam simasanang sangamberi bangsa, kalulut laggaimui bailiu kudduat simaeru itulaggaiji.

Taikamanua masipalelekngake pununtuat baga

¹³ Kuanangan si Tuhan, “Sangamberi tiboietmui bulatnia masipaloloi Aku.” “Tapoi parere' peile kam, “Aponia sikuamai pagalaiat Ekeu?”

¹⁴ Kuamuiannia, “Siboboi le tapaguguletnake tubu kai Taikamanua. Aponia katukaunannia tagalaiaake siripot galaiakenenenta ka tubut Tuhan Sipulugege, ele masipakoinong ka tubuNia olei bagatta kasangamberi sele sigalaita”

¹⁵ Ataitcoan kam pusanangandra sangamberi sirimanua simabuak patuat. Sirimanua sikatai ta sarat ituppai erut puririmanuandra, tapoi ke' rasibo puoom bagat Taikamanua ragalaiake sikatai, bebela leu et sia.”

¹⁶ Lepa sangamberi sirimanua simaloto ka tubut Tuhan patibo pasasambadra. Arepinangan samba lelekngakenangan si Tuhan apa sikuatdra. Sangamberi sirimanua sisuru' samba simaloto' katubuNia, tusurat oninia kabagat sara buko suranen sikuddu kamataNia.

¹⁷ Kuanangan Tuhan Sipulugege, “Ibailiu le geti sia paamianKu. Ka gogoi sitarekngakenenKu, bailiunangan sia bakkat pununtukietKu baga. Pununtukikungan sia baga, kele sara ukkui ipununtuki baga toga simareddet ka tubunia.

¹⁸ Itcorangan te geti minca sapaamianKu pabaggeijat ka talagat uktukdra sirimanua simatopit samba sirimanua sikatai, ka talagat sirimanua sipaguguletnake ka tubuKu samba sitapaguguletnake tubu ka tubuKu.”