Malk. 1 - BUKO SIPUNENAN

¹ Nene te patonekat Tuhan sege'akenen Maleakhi ka tai Israel.

Nuntut bagat Tuhan ka tai Israel

² Kuanangan Taikamanua ka paamianNia Israel, “Manuntu bagakKu katubumui.” Tapoi alegirangannia, “Kipa galainia numanuntu baga katubumai?” Aleginangannia si Tuhan, “Ta pa si Esau kebbut Jakob? tapoi manuntu le bagaKu kai Jakob,

³ kai Esau geti malaga' le' bagakKu katubunia. Leleu kudduat Esau akupakataian samba polaknia akukauan ka tarimeu simasabbak ka kudduat simatangeu.

⁴ Ke paninikat Esau, tai Edom masikua, “Pulaggaiatmai arapakataian, tapoi kupaeru' le kai minca laggaimai.” Kuanangan minca' Taikamanua, “Momoi rapaeru' minca' laggaira, tapoi ai teterenia kupakatainia minca'. Oniakerangan, “Tobbou laggai sikatai' samba “Bangsa siorak golut Tuhan teret buruburu.”

⁵ Itcorangan geti tai Israel ka gogoi sibabara samba kuarangan leu, “Bulat Sipulugege le si Tuhan, kupkumenNia sisaliu polakda tai Israel!”

Golut Tuhan ka tai imam

⁶ Kuanangan Tuhan Sipulubeunan katubutda tai Imam, “Sara toga bui' ta isuru' ukkuinia, samba sara pagugulet bui' ta isuru' tuannia. Aku nene iate Ukkuimui, angoi ta nusuru' kam Aku? Aku nene tuanmui, angoi tak maloto' kam katubukKu? Nupaloloi' kam Aku, tapoi nurerere' peile kam, kipa galainia kupaloloi' kai Ekeu?

⁷ Nuake' kam buluaakenen komen sitai mateu tubuluake' ka kudduat pasibuluatKu. Lepa nurerere' peile' kam, kipangan le' galaina kupaloloi' kai Ekeu? Anupalolit kudduat pasibulatKu.

⁸ Ke' nuake' kam buluaakenen tarimeu simapeset, simabesi' ele' si masakit katubukku, ta'pa galajet sitaipasese nene? sibo pei kam nukau kam tarimeu kele nene kai Gubernur! ioba' leu pa' isilonia? Maangka leu pa bagania samba igagagalai leu pa simaeru ka tubumui?”

⁹ Kineneiget kam tai imam, sibo pei kam nutiddou kam ka Taikamanua, bule' ipukateki sita' baga! Tapoi iarepi leu pa panindogatmui, aipoi amakolouan ekeu le bakkat sangamberi puseleat.

¹⁰ Kuanangan leu minca Tuhan Sipulugege “Maeru peile' kupatpatnake' matatbaliu lalepKu, aipoi siboboi le' nuobek ake kam obengan ka kudduat pasibuluat, ta koba' kam samba ta kusisilo buluakenenmui.

¹¹ Rasuru' le Aku tai bangsa ka sangaliot polak. Ka senen kudduat ralabo' le pusinginan kalulut rasuru oningKu samba raake buluaakenen simaeru, kalulut suru'ra tai bangsa ka tubukKu.

¹² Tapoi kam geti, nupaloloi' le' kam aku kalulut nukakau le' kam kudduat pasibuluat ta'anai katukolobatnia samba nubuluake kam komen keraetmui.

¹³ Nukua poi kam: “Bulatnia aingauan sita sangamberinia nene!” samba leu nupaloloi kam Aku. Nuambit kam tarimeu sinangkou, simasakit samba simabesi' nubuluake' kam ka tubuKu. Kusisilo' pa' buluat kele' nene?

¹⁴ Kutelei le' sipaboboko, sipasiake' buluat ka tubuKu tarimeu sitaimateu, ke' ai ka talagat tarimeunia simateu buluakenen silepa' kokoiake' buluakenen ka tubuKu! Kalulut Aku te Rimata Sabeu, samba rasuru' le' aku sangamberi tai bangsa.”