Luk. 7 - BUKO SIPUNENAN

Pasialeat pagugulet kapiten saladdu

¹ Lepa aipanibo Jesus ka matada sirimanua simigi, ei nia ka Kapernaum.

² Ai sedda sara kapiten saladdu tai Roma, paguguletnia aimubebesi malegere matei; pagugulet nenda bulat kilibet bagania.

³ Kele aiarep pagalaiat Jesus, koiniakenangan tai bajara tai Jahudi raei masitiddou bule ioi masialeake paguguletnia.

⁴ Kele arasege ka matat Jesus, besiakerangan nia, kuarangan, “Mateu le nuromake nia,

⁵ manuntu poi bagania ka bangsata, samba uma parurukatmai airiokean.”

⁶ Ia geti tutnangan sia Jesus. Kele aramalegere ka lalep, koiniakenangan sasuruaknia kapiten saladdu masikua ka matat Jesus, “Baan leu sasaggoake tubum, ta mateu aku nutuguru ka lalepku.

⁷ Lulut taimateuku te ta tubuku amoi masitaget ekeu. Kua le sangakuanan, metnangan imale paguguletku.

⁸ Sirimanua paneineiet le poi aku, tapoi sipaneinei saladdu leu aku. Ke kukua ka sara saladdu, ‘Kenan!’ einangan leu et; ka sabagei, ‘Konan!’ oinangan leu et; samba ka paguguletku, ‘Galai nene!’ galainangan leu et nia.”

⁹ Kisei le ka bagania Jesus aiarep tiboiet nene. Pitsanangan teiteinia, kuanangan ka matada sirimanua simigi sipasitutut nia, “Kukua nia ka matamui: Beri ka tai Israel ta akusese kopet tonem baga kele nene.”

¹⁰ Kele aratoili ka lalep sia sikoiniakenen, itcorangan amalengan pagugulet nenda.

Isuruake Jesus silainge ka laggai Nain

¹¹ Kele aimapato, ei Jesus ka laggai Nain. Sipasiuluinia samba sirimanua simigi leu amei sia masipaalei nia.

¹² Kele aramalegere ka matatbaliu laggai, bela sirimanua sipasibabairat simamatei. Simamatei nenda, ia te silainge, toga sisasara ka sinanalep silumang. Maigi sia taikalaggaiat masipaaleiake ina nenda.

¹³ Kele aiitco ina nenda Jesus, makatenangan bagania ka tubunia, kuanangan, “Ba pusosou!”

¹⁴ Legereakenangan tubunia Jesus, rapenangan panggere, puarirangan sipasibabairat. Kuanangan Jesus, “Oi silainge, kukua nia ka matam, suruake ekeu!”

¹⁵ Tusurunangan leu et, tukku, taddaakenangan manibo. Lepa kaunangan nia Jesus ka inania.

¹⁶ Malotorangan sangamberida, umunakerangan Taikamanua, kuarangan, “Amoian nabi sabeu ka talagata, aibalouan bangsania Taikamanua!”

¹⁷ Ia geti mararatnangan katuareman Jesus ka sangalio Judea samba ka sangamberi laggai simalegere sedda.

Ikoiniake sipasiuluinia si Johannes Sipasirarau masinounou pagalaiat Tuhan Jesus

¹⁸ Kele arasegeake nia kai Johannes sipasiuluinia pagalaiat sangamberi sibabara,

¹⁹ sogainangan rua sipasiuluinia, koiniakenangan sia masinounou si Tuhan, “Ekeuan leu siooi, ele ai pei le sabagei ngenaakenenmai?”

²⁰ Kele arasege ka matat Jesus kuarangan, “Aikoiniake kai si Johannes Sipasirarau ka matam masinounou, ekeuan leu siooi, ele ai pei le sabagei ngenaakenenmai?”

²¹ Ka teterenia nenda, Jesus ai nia masiaaleake maigi sirimanua ka sangamberi besi samba oringen samba masiusiake sanitu samba simapeset ikau maitco minca matada.

²² Aleginangan nia Jesus kuanangan ka matada, “Kenan kam, segeake kam kai Johannes siitcomui samba siarepmui: Amaitcoan matada simapeset, amuenungan simasakit, amalengan simabogbong, amaarepman piura simatakkep, atusurungan simamatei samba Katuareman Simaeru atusegeakean ka simageba.

²³ Ia geti mauktuk te sitaimabele baga ka tubuku!”

²⁴ Kele aratuitui pakoiniet Johannes, taddakenangan Jesus masitiboi ka matada sirimanua simigi pagalaiat si Johannes, “Aponia nubebesiake kam nuitco kam anuei kam ka simatangeu? Masiitco popoupou pinauilat rusa?

²⁵ Masiitco apa te nueei kam? Masiitco sirimanua sipuleleppei simaramo? Sirimanua sipuleleppei simalainge samba simakayo geti, ai le sia ka lalepda tai rimata.

²⁶ Oto masiitco apa le nueei kam? Masiitco nabi? Bulatnia, tapoi kukua nia ka matamui, saliu pei le nabi.

²⁷ Nia te nene sikuania ka Surat Sipunenan, ‘Kukokoiniake te pakoinietku muboiki kekeu, masitarekngake enungannu.’

²⁸ Kukua nia ka matamui: Ka talagat sirimanua sinutuakenenda tainanalep, ta anai sisaliu beunan Johannes Sipasirarau. Tapoi kenanen kisedda, sigoisonia ka bagat Purimataat Sorga, nia pei le abeu kai Johannes Sipasirarau.”

²⁹ Sangamberi sirimanua simigi samba sipuuku cukai sipasiaarep tiboiet Jesus, raseseake puroipoat Taikamanua, sia poi nene siturarau ka pasiraukat Johannes.

³⁰ Tai Parise samba siagaisurat geti, ta raoba masisilo siteuakenen Taikamanua ka tubuda, aipoi ta raoba irau sia si Johannes.

³¹ Kuanangan minca Jesus, “Kaipa pa kupapasikatnake sia sirimanua reddenan nene? Kaipa pa kupakekereake sia?

³² Makere le sia kele tatoga sikuddu ka pasakiat sipusosoga ka saaleira masikua, ‘Akuteubaan kai kam, ta amuturu kam; amugeringan kai, ta amusou kam!’

³³ Oi poi si Johannes Sipasirarau, taikom roti samba tailo anggur, kuamuian, ‘Ai sanitu ka tubunia.’

³⁴ Lepa oi Togatsirimanua, mukom nia samba mulo, kuamuian, ‘Itco pei kam, sirimanua simaereu kokom samba simalo anggur, suruakda sipuuku cukai samba sijo!’

³⁵ Tapoi sikut paatuat Taikamanua geti ka tubut sirimanua sipasisisilo nia le imakokoinong.”

Sinanalep sijo masitulaji Jesus ka lalep Simon

³⁶ Ai sara tai Parise sisogai Jesus mukom ka lalepnia. Tugurunangan Jesus ka lalep Parise, puuddetnangan mukom.

³⁷ Ka laggai nenda ai leu sara sinanalep simakope jo. Kele aiarep ai Jesus mukokom ka lalep Parise, ei nia ambitnangan sara bulibuli alabastar sibara tula simasingin.

³⁸ Purionangan ka teitei ka bebet rerenia, pusounangan; ai nia musosou suaakenangan reret Jesus elunia. Lepa posanangan nia alainia, sigguknangan nia, tulajinangan nia tula simasingin.

³⁹ Kele aiitco nene si Parise sipasisosogai Jesus mukom, kuanangan ka paatuatnia, “Ke nabi bai nia, ta isosoppi iagai kasei sinanalep sipasirarape nia nene, samba iagai sinanalep sijo le nia.”

⁴⁰ Kuanangan Jesus ka matat Simon, “Simon, ai kuanenku ka matam.” Aleginangan nia si Simon, “Kuangan Guru.”

⁴¹ Kuanangan Jesus, “Ai rua sirimanua sipuuutak ka sara sirimanua sipasibabaleake bulagat. Sara muutak lima ngotu perak, sisara geti lima pulu perak le.

⁴² Kalulut ta anai kaunenda masitoiliake, lepaakenangan utakda ruada. Kasei le ka sia makope mununtu baga ka tubut sipasibabaleake bulagat nenda?”

⁴³ Aleginangan nia si Simon kuanangan, “Kupaatu silepaakenen utak simigi le.” Kuanangan ka matania Jesus, “Aisesengan sipaatum.”

⁴⁴ Lepa mattainangan sinanalep Jesus, kuanangan ka matat Simon, “Nuiitco leu sinanalep nene? Guru aku ka lalepnu, ta anuake oinan bubui rereku; ka sia geti elunia le aikau masibui rereku, samba alainia le aikau pasiposa nia.

⁴⁵ Ekeu ta anusigguk aku; ka sia geti gurukungan ka lalepnu nene, ta aiariake isigguk rereku.

⁴⁶ Ekeu ta anutulaji uteku; ka sia geti tula simasingin le aikau masitulaji rereku.

⁴⁷ Kukua nia ka matam: Jonia simaigi atuappeakean, kalulut abeu poi nuntut bagania. Tapoi kasei jo goiso tuappeake, goiso leu nuntut bagania.”

⁴⁸ Lepa kuanangan ka matat sinanalep, “Atuappeakean jom.”

⁴⁹ Ia geti taddaakerangan sia sipakomake Jesus masipaatu ka paatuatda, “Kasei te sirimanua nene iooi iappeake jo?”

⁵⁰ Kuanangan Jesus ka matat sinanalep, “Aiarauakean ekeu tonem bagam, toiliakean ekeu ka angkat baga!”