Luk. 6 - BUKO SIPUNENAN

Sipasiului masiakpek bera ka gogoi Sabat

¹ Ka gogoi Sabat, amuenung Jesus ka talagat monen bera. Akpekrangan ottit bera sipasiuluinia, ngototrangan nia ka kabeira, komrangan nia.

² Kuarangan sabagei tai Parise, “Angoi nugalai kam simakeikei tugalai ka gogoi Sabat?”

³ Aleginangan nia Jesus, “Tapei anubasa kam sigalai David, sipulajenia sambada saaleinia?

⁴ Guru nia ka Uman Taikamanua, alanangan roti sibuluakenen ka Taikamanua, komnangan nia, samba ikau leu ka saaleinia. Siripokatnia takeikei rakom nia kasei pa, sarat imam le ikokom nia.”

⁵ Kuanangan minca ka matada Jesus, “Togatsirimanua ia te Tuhan gogoi Sabat.”

Ialeake Jesus simasakit kabei sangasila ka gogoi Sabat

⁶ Ka gogoi Sabat bagei, amei Jesus mungantoman ka uma parurukat. Sedda ai sara sirimanua simasakit kabei sikattoet.

⁷ Ngenaakerangan tubuda siagaisurat samba tai Parise baleu ialeake nia Jesus ka gogoi Sabat, bule ioi rajoake nia.

⁸ Tapoi iagai le paatuatda Jesus. Kuanangan ka matat simasakit kabei sangasila, “Rioake ekeu ka talaga!” Tusurunangan leu et, purionangan.

⁹ Kuanangan ka matada Jesus, “Kunounou pei kam: Apa simateu tugalai ka gogoi Sabat, masigalai simaeru, ele masigalai sikatai? Masirimanuaake sirimanua, ele masimateiake sirimanua?”

¹⁰ Kinerenangan sia sangamberida Jesus, kuanangan ka matat simasakit kabei, “Totoiake kabeinu!” Totoiakenangan nia, malenangan leu kabeinia.

¹¹ Magolunangan bagada simakope, patiborangan pasasambada, kipa ragagalai ka tubut Jesus.

Ipili Jesus pulurua tai apostel

¹² Ka teterenia nenda panataranangan Jesus ka leleu manindou. Panindounangan ka Taikamanua sangasoibonia nenda.

¹³ Kele aimapato, sogainangan sipasiuluinia, pilinangan sia pulurua, oniakenangan sia apostel:

¹⁴ Simon sioniakenennia leu Petrus, samba Andreas sarainania; Jakobus samba Johannes, Pilipus samba Bartolomeus,

¹⁵ Mateus samba Tomas, Jakobus togat Alpeus, samba Simon oniakenen tai Zelot,

¹⁶ Judas togat Jakobus, samba Judas Iskariot, sibailiu sipajo Jesus geti.

Igelaiake samba ialeake sirimanua Jesus

¹⁷ Lepa gorosot Jesus barania ka leleu sambada sipasiuluinia, purionangan ka polak simagaktuk. Maigi leu sedda sipasiuluinia sabagei sibara ka sangalio Judea, Jerusalem samba Tirus samba Sidon sikuddu ka bebet koat.

¹⁸ Ooira nene masiarep tiboiet Jesus, samba bule ialeake besira bagei; samba sia pinasaileu sanitu leu ialeake.

¹⁹ Sangamberi sirimanua rabesiake masirape Jesus, aipoi ai kerek sibebela ka tubunia, aleakenangan sia sangamberida.

Puuktungan samba reureu baga

²⁰ Ia geti mattainangan sipasiuluinia Jesus, kuanangan ka matada, “Mauktuk kam simageba, kam poi sibakkat Purimataat Taikamanua.

²¹ Mauktuk kam simalaje kineneiget, tueektekngake poi kam geti. Mauktuk kam sipusosou kineneiget; mugagaga poi kam geti.

²² Mauktuk kam ke rapulagaki kam baga sirimanua, samba rakekele kam samba rapaloloi kam samba rakua kam sikatai kalulut Togatsirimanua.

²³ Kau imaangka bagamui ka teteret nenda samba magora baga, abeu poi upamui geti ka sorga. Beri ka tai nabi siburu kisedda leu et aragalai taikebbukatda ka tubuda.

²⁴ Tapoi paan te ka kam simakayo, anusiloan poi kam pusuibiat bagamui.

²⁵ Paan te ka kam simaektek kineneiget, aipoi malalaje le kam geti. Paan te ka kam sipugagaga kineneiget, aipoi murereureu le kam baga samba musou geti.

²⁶ Paan te ka kam, ke sangamberi sirimanua masiumun kam, aipoi kisedda leu aragalai taikebbukatda ka tai nabi sipatataju siburu.”

Nuntut baga ka tai saggak

²⁷ “Tapoi kukua nia ka matamui kam sipasiaarep tiboietku: Pukateki kam baga saggakmui, galai kam simaeru ka tubuda simalaga baga ka tubumui;

²⁸ sukatnake kam sia sipateleiji kam; tiddouake kam sia sipaloloi kam.

²⁹ Ke ralippat bailatnu sangasila, kau leu bailatnu sangasila. Samba ke raala bai sobbem, kaunungan leu et iala leppeinu.

³⁰ Ke ratiddou apa pa ka tubum, kau nukau nia; samba ke raala bibiletnu, bui nutiddou nia minca.

³¹ Kipa siobamui ragalai sirimanua ka tubumui, kisedda leu te nugagalai kam ka tubuda.

³² Ke sarat simakate baga ka tubumui nupukateki kam baga, amatopitnan pa kam? Beri sirimanua sijo rapukakateki baga simakate baga ka tubuda.

³³ Aipoi ke sarat ka tubuda sigalai simaeru ka tubumui nugalai kam simaeru, amatopitnan pa kam? Beri sirimanua sijo kisedda leu ragagalai.

³⁴ Ke nubaleake kam apa pa sarat ka tubuda simaro bagamui itoiliake nia minca, amatopitnan pa kam? Beri sirimanua sijo rababaleake leu ka pasasambada sijo, bule rasilo minca samba iginia.

³⁵ Kam geti, pukateki le kam baga saggakmui samba galai kam simaeru ka tubuda. Baleake kam ka sitaioi masitoiliake silinia, abeunangan upamui samba bailiunangan kam tatogat Taikamanua Sipulubeunan. Aipoi maeru le bagania ka tubuda sitaiagai musura baga samba leu ka tubuda sijo.

³⁶ Oto kau ibailiu kam simaeru baga, kele Ukkuimui simaeru baga.”

Pagalaiat masiukum

³⁷ “Bui nupasiukum kam, bui iukum kam Taikamanua. Bui nujoake kam sirimanua, bui ijoake kam Taikamanua. Appeake kam seleda sabagei, bule iappeake leu selemui Taikamanua.

³⁸ Kau kam ka sabagei, bule iake ka kam Taikamanua; sara kirekat simaeru, siopetnakenen, singanyak samba simapotsou te nusisilo kam. Aipoi kirekat sikireakenenmui ka sabagei, ia leu te ikikireake ka kam Taikamanua.”

³⁹ Lepa kuanangan ka matada Jesus sara pasikat, “Momoi pa simapeset masipalulu pasasambada simapeset? Ta pa bebele sia ruada ka guluggu?

⁴⁰ Ta anai sipasiului sisaliu beunan gurunia. Atukappulungan geti ipasigelai, makerenangan kai gurunia.

⁴¹ Angoi sinoile ka matat sarainam nuitco, tapoi arigi ka matam geti ta iagai tubum?

⁴² Kipa te iooi nukua ka matat sarainam, ‘Kuala boiki sinoile ka matam,’ arigi sabeu ka matam geti ta nuitco? Ale sipatataju! Arigi ka matam boiki belaake, ia pei toila nuala sinoile ka matat sarainam.”

Loina samba buania

⁴³ “Loina simaeru, ta ibubuaake bua sikatai, kisedda leu et loina sikatai, ta ibubuaake bua simaeru.

⁴⁴ Aipoi senen loina ka buania le ituaagai. Buat sileu ta tuaala nia ka rui, ele buat anggur ka laggigi.

⁴⁵ Sirimanua simaeru masibelaake simaeru sibara ka paatuatnia simaeru, samba sirimanua sikatai masibelaake sikatai sibara ka paatuatnia sikatai. Aipoi sitububura ka paatuatnia, ia te ititiboake ngungunia.”

Rua ngamata bongan

⁴⁶ “Angoi nusogai kam aku, ‘Tuhan, Tuhan,’ tapoi sikuaku ka matamui ta nugagalai kam?

⁴⁷ Senen siooi ka tubuku samba siarep tiboietku samba sigalaiake nia – kukua nia ka matamui kaipa tupakereake nia –,

⁴⁸ makere le nia ka sara sirimanua sirioake lalep; gaigainangan polak keru, galakngakenangan bongan ka uddut bulak. Kele aibara eba ikuilu lalep nenda, ta ipagegeugeu, ka uddut bulak poi aiturioake.

⁴⁹ Tapoi sipasiaarep tiboietku samba sitaigalaiake nia, makere le nia ka sara sirimanua sirioake lalep ka uddut polak si ta bongan. Kele ikuilu nia eba, beri uju imabukkat, bulat abeu dholounia.”