Luk. 4 - BUKO SIPUNENAN

Katusiboat Jesus

¹ Kele aituitui Jesus barania ka oinan Jordan sun le ka tubunia Ketsat Sipunenan. Paambitnangan nia Ketsat Sipunenan ka simatangeu.

² Epat pulu ngagogoi aikuddu sedda samba isibo nia Sanitu. Burunia nenda beri pukokom nia, kalepakatnia malajenangan.

³ Kuanangan ka matania Sanitu, “Ke Togat Taikamanua ekeu, kua le ibailiu roti bukku nene.”

⁴ Aleginangan nia Jesus, “Atusuratnakean, ‘Ta sarat kan iririmanuaake sirimanua.’ ”

⁵ Lepa ambitnangan Jesus Sanitu ka leleu simabuak, paitconangan ka matania sinulut sangamberi purimataat polak nene.

⁶ Kuanangan ka matat Jesus Sanitu, “Sangamberi gege samba pulatsanan nene kuaake kekeu. Aipoi sangamberinia atusegeakean ka tubuku, teukungan le kukau nia ka kasei pa siobaku.

⁷ Oto ke noba murappo ka mataku nupanindogi aku, bakkatinungan sangamberinia nene.”

⁸ Aleginangan nia Jesus, “Atusuratnakean, ‘Tuhan Taikamanuam le panindogietnu, sarat nia le reddenennu!’ ”

⁹ Lepa ambitnangan Jesus Sanitu ka Jerusalem, rioakenangan nia ka teitei Uman Taikamanua, kuanangan ka matania, “Ke Togat Taikamanua ekeu, ribbaiake tubum ka polak.

¹⁰ Atusuratnakean poi, ‘Ikokoiniake te malaikania Taikamanua rapasikeli ekeu

¹¹ samba ratoddai ekeu ka kabeira, bui itusoksok rerem ka bukku.’ ”

¹² Aleginangan nia Jesus, “Aikua Surat Sipunenan, ‘Bui nusibo Tuhan Taikamanuam.’ ”

¹³ Kele ailepaake sangamberi pasisiboatnia Sanitu, kaddiuakenangan Jesus teret iaili tetere simaeru.

Itaddaake galajetnia Jesus ka Galilea

¹⁴ Ia geti soksoknangan Jesus ka Galilea ka geget Ketsat Sipunenan. Mararatnangan katuaremannia ka sangalio laggai nenda.

¹⁵ Pungantomannangan ka uma parurukat, umunrangan nia sangamberida.

Rakekele Jesus ka Natsaret

¹⁶ Lepa ei Jesus ka Natsaret laggai puuragatnia. Ka gogoi Sabat, kele simareirei ei nia ka uma parurukat, purionangan ibasa Surat Sipunenan.

¹⁷ Kaurangan ka tubunia bukot nabi Jesaya. Kele aibuka buko, sesenangan ruang sipasikukua kisee,

¹⁸ “Ketsat Tuhan aian ka tubuku, kalulut aitulaji aku masipaarep Katuareman Simaeru ka sia simageba. Aikoiniake aku masisegeake kabelaiat ka sia siluplupmakenen samba pasiitco ka sia simapeset; masibelaake sia pinaore

¹⁹ samba masipaarep rurat pununtuat bagat Tuhan.”

²⁰ Lepa aipurut buko kaunangan nia ka pagugulet, puuddetnangan. Kinererangan nia sangamberida sikuddu ka uma parurukat.

²¹ Kuanangan ka matada Jesus, “Gogoi nene te aipuaili siniboi Surat Sipunenan nene ka teteret nuarep kam nia.”

²² Sangamberida masiseseake nia samba makisei ka bagada tiboiet simaeru siniboinia. Kuarangan, “Ta togat Josep sinene?”

²³ Kuanangan ka matada Jesus, “Ta isosoppi nukua kam ka mataku pasikat nene, ‘Oi sikerei, aleake tubum. Sangamberi siarepmai sigalainu ka Kapernaum, galai leu et sene ka bakkat laggainu.’ ”

²⁴ Kuanangan minca Jesus, “Kukua nia ka matamui: Beri sara nabi rapuleletsei ka bakkat laggainia.

²⁵ Sibulatnia le sikuaku nene ka matamui: Ka teteret nabi Elia, situpatpatna manua telu ngarura enem ngalaggo ujunia pat bara pulajeat sabeu ka sangalio laggai, maigi sia sinanalep silumang ka tai Israel.

²⁶ Tapoi ta aikoiniake si Elia Taikamanua ka sia, sarat ka sinanalep silumang ka Sarepta ka tobbou Sidon le.

²⁷ Kisedda leu et ka teteret nabi Elisa, maigi simabogbong ka tai Israel, tapoi beri sara ka talagada aialeake, sarat si Naaman tai Siria le.”

²⁸ Kele araarep nia sangamberida sikuddu ka uma parurukat, magolunangan bagada.

²⁹ Suru sia tukkuluakerangan Jesus ibela ka laggai, ambitrangan nia ka leleu laggaira raribbaiake nia ka gilak leleu.

³⁰ Tapoi amutuitui le Jesus ka talagada, kaddiuakenangan sia.

Sirimanua pinasaileu sanitu

³¹ Lepa ei Jesus ka laggai Kapernaum ka Galilea. Pangantomannangan sia sedda ka gogoi Sabat.

³² Bulat makisei ka bagada ngantomannia, magege poi tiboietnia.

³³ Ka bagat uma parurukat nenda ai sara sirimanua pinasaileu sanitu. Pugereinangan,

³⁴ “Apa nuaala se, Jesus tai Natsaret? Moi ekeu masilangoake kai? Kuagai kasei ekeu: Sipunenan sibara ka Taikamanua le ekeu!”

³⁵ Asenangan nia Jesus, “Mengmengake ekeu, belaake ekeu ka tubunia!” Pangitngitnangan nia sanitu ka matada, bela nia ka tubunia, ta anai amabesi ka tubunia.

³⁶ Kisei le ka bagada sangamberi sirimanua, patiborangan pasasambada, “Apate kepput ka bagaku tiboiet nene. Ka gege samba ka kereknia iusiake sanitu, belanangan leu et.”

³⁷ Mararatnangan leu katuareman Jesus ka sangalio tobbou nenda.

Ialeake Jesus maigi sirimanua

³⁸ Bela aibela Jesus ka uma parurukat ei nia ka lalep Simon. Tapoi talikut Simon sinanalep ai nia muroroket, bulat makope roketnia. Segeakerangan nia ka Jesus bule iromake nia.

³⁹ Ei Jesus ka bebenia usiakenangan roketnia, tata roketnia; tusurunangan masipuuku sia.

⁴⁰ Kele aibele sulu, oi sia sangamberi sirimanua masitaroake simabesira ka matat Jesus siorik sene ngamata besi. Rapeakenangan kabeinia Jesus ka tubuda senenda ialeake sia.

⁴¹ Belarangan leu sanitu ka tubut maigi sirimanua, pugereirangan masikua, “Togat Taikamanua le ekeu!” Asenangan sia Jesus, ta aiobaake rapanibo, raagai poi Kristus le nia.

Jesus mungantoman ka uma parurukat ka laggai bagei

⁴² Kele aimapato, tui Jesus ei nia ka sara kudduat ka simatangeu. Gabarangan nia sirimanua simigi. Kele arasese nia kerarangan nia bui ikaddiuake sia.

⁴³ Kuanangan ka matada Jesus, “Ka laggai bagei leu buita kupaarep Katuareman Simaeru pagalaiat Purimataat Taikamanua, ia poi lulunia aitukoiniake aku.”

⁴⁴ Pungantomannangan Jesus ka bagat uma parurukat ka sangalio Judea.