Luk. 3 - BUKO SIPUNENAN

Ngantoman Johannes Sipasirarau

¹ Ka rura sikapululimania ipukaisar Kaisar Tiberius, si Pontius Pilatus mugubernur ka Judea, si Herodes murimata ka Galilea, samba si Pilipus sarainania murimata ka Iturea samba Trakhonitis, si Lisanias murimata ka Abilene,

² si Hannas samba si Kayafas imam sabeu; ka teteret nenda bara tiboiet Taikamanua kai Johannes togat Sakaria ka simatangeu.

³ Ia geti ei si Johannes ka senen laggai riringan Jordan pungantomannangan, “Bauake kam paatuatmui samba kau iturau kam, bule iappeake jomui Taikamanua.”

⁴ Kele sitususurat ka bukot nabi Jesaya, “Ai nganga sipusosoga ka simatangeu, ‘Tarekngake kam enungan Tuhan, roipoake kam pusilaiatnia.

⁵ Simapeleu tutabbui, leleu samba tinambu tugaktukngake. Simakoilut tuparoipo, samba enungan simabukkulu tugaktukngake.

⁶ Itcorangan leu sangamberi sirimanua puaragat sibara ka Taikamanua!’ ”

⁷ Kuanangan si Johannes ka matada sirimanua simigi siooi masitiddou irau sia, “Kam saulou, kasei amasikua ka matamui momoi nukatsiliake kam tubumui ka golut Taikamanua sibabara geti?

⁸ Patoila le kam buat katubabau paatuatmui. Bui te nukua kam ka paatuatmui, ‘Si Abraham le ukkuimai.’ Aipoi kukua nia ka matamui: Momoi le ibaraake tatogat Abraham Taikamanua ka bukku nene!

⁹ Amatarekngan baliok ka pailakkik loina; senen loina taibuaake bua simaeru tutatadde le, gik ka api.”

¹⁰ Nounourangan nia sirimanua simigi, “Oto kipangan le kugagalai kai?”

¹¹ Aleginangan nia si Johannes, “Kasei sipurua leppei, kau ikau sara ka si ta anai; samba simakan, kau iparubei nia ka sabagei.”

¹² Sipuuku cukai leu amoi sia masitiddou turau sia. Nounourangan si Johannes, “Guru, kipa kugagalai kai ka kai?”

¹³ Aleginangan nia si Johannes, “Bui isabau sinetereakenen nuala kam.”

¹⁴ Tai saladdu leu masinounou, “Kai ka kai, kipa kugagalai kai?” Kuanangan ka matada si Johannes, “Bui nugalai kam gege ka tubut kasei pa, ele bui nuala kam bulagatda pajoat. Upamui le karoni kam lepa.”

¹⁵ Ai le poi sia masingengena sirimanua simigi, patuptuprangan ka paatuatda pagalaiat si Johannes, baleu niangan pa Kristus.

¹⁶ Kuanangan ka matada sangamberida si Johannes, “Aku kaku oinan le kukakau masirau kam; tapoi momoi le geti sisaliu pei le gegeku. Beringan masirugut talit tarangainia ta mateu aku. Rauakenennia ka kam Ketsat Sipunenan samba api le.

¹⁷ Amatarekngan sasatsat ka kabeinia masilinaake bera ka paga. Bera iruruake ka kudduat pangoirikat, paga geti ilaboake ka api sitaipepee.”

¹⁸ Maigi pei le bagei ingantomanake si Johannes masisegeake Katuareman Simaeru ka sirimanua simigi.

¹⁹ Tapoi si Herodes geti rimata ka Galilea, kele aiase nia si Johannes kalulut si Herodias sinanalep sarainania, samba kalulut jo bagei sigalainia,

²⁰ aituppai pei le jonia, aikau poi si Johannes ka bagat penjara.

Katuraukat Jesus

²¹ Lepa aiturau sangamberi sirimanua simigi, samba Jesus leu turau samba ai nia maninindou, tubukanangan manua,

²² gorosot Ketsat Taikamanua kele tubut ngorut mei ka tubunia. Maarepnangan nganga sibara ka manua masikua, “Ekeu te Togaku, kilibet bagaku, obaket bagaku te ekeu.”

Paninikat Jesus

²³ Ka teteret aitaddaake galajetnia Jesus, ai pa telu pulu ngarura beunannia. Siripot sipaatuda sirimanua, togat Josep le nia, si Josep togat Eli,

²⁴ si Eli togat Mattat, si Mattat togat Lepi, si Lepi togat Melki, si Melki togat Janai, si Janai togat Josep,

²⁵ si Josep togat Matatia, si Matatia togat Amos, si Amos togat Nahum, si Nahum togat Hesli, si Hesli togat Naggai,

²⁶ si Naggai togat Maat, si Maat togat Matatia, si Matatia togat Simei, si Simei togat Josekh, si Josekh togat Joda,

²⁷ si Joda togat Johanan, si Johanan togat Resa, si Resa togat Serubabel, si Serubabel togat Sealtiel, si Sealtiel togat Neri,

²⁸ si Neri togat Melki, si Melki togat Adi, si Adi togat Kosam, si Kosam togat Elmadam, si Elmadam togat Er,

²⁹ si Er togat Jesua, si Jesua togat Elieser, si Elieser togat Jorim, si Jorim togat Mattat, si Mattat togat Lepi,

³⁰ si Lepi togat Simeon, si Simeon togat Juda, si Juda togat Josep, si Josep togat Jonam, si Jonam togat Eliakim,

³¹ si Eliakim togat Melea, si Melea togat Menna, si Menna togat Matata, si Matata togat Natan, si Natan togat David,

³² si David togat Isai, si Isai togat Obed, si Obed togat Boas, si Boas togat Salmon, si Salmon togat Nahason,

³³ si Nahason togat Aminadab, si Aminadab togat Admin, si Admin togat Arni, si Arni togat Hezron, si Hezron togat Peres, si Peres togat Juda,

³⁴ si Juda togat Jakob, si Jakob togat Isak, si Isak togat Abraham, si Abraham togat Terah, si Terah togat Nahor,

³⁵ si Nahor togat Serug, si Serug togat Rehu, si Rehu togat Peleg, si Peleg togat Eber, si Eber togat Salmon,

³⁶ si Salmon togat Kenan, si Kenan togat Arpaksad, si Arpaksad togat Sem, si Sem togat Noak, si Noak togat Lamekh,

³⁷ si Lamekh togat Metusala, si Metusala togat Henokh, si Henokh togat Jared, si Jared togat Mahalael, si Mahalael togat Kenan,

³⁸ si Kenan togat Enos, si Enos togat Set, si Set togat Adam, si Adam togat Taikamanua.