Luk. 24 - BUKO SIPUNENAN

Katusuruat Jesus

¹ Ka gogoi Menggui, mamancep pei le, ei sia tainanalep ka ratei, raambit pasinginsingin sinarekda.

² Icora le bukku takket ratei atuguiluan.

³ Buluk sia ka baga, ta anai arasese tubut Tuhan Jesus.

⁴ Ai sia muririo, mureureu baga masipaatu pagalaiat nene, tulut rio rua taimanteu ka bebera sipuleleppei simakirisau.

⁵ Kopet lotora lukkukngakerangan utera; kuarangan ka matada taimanteu sirua nenda, “Kipa nugagaba kam sipuririmanua ka simamatei?

⁶ Ta anai nia se, atusurungan nia! Repdep le kam siniboinia ka matamui enan pei le nia ka Galilea,

⁷ aikua, ‘Tusesegeake te Togatsirimanua ka kabeira sirimanua sijo, lepa siliktengaakerangan nia, ia geti ka gogoi sikatelunia suru nia minca.’ ”

⁸ Repdep ararepdep tiboiet Jesus.

⁹ Kele aratoili barada ka ratei, segeakerangan nia ka sipasiului sipulusara samba ka sabagei.

¹⁰ Tainanalep nenda ia te si maria Magdalena, si Johanna, si Maria inan yakobus. Sia te samba tainanalep bagei saaleira amasisegeake sangamberinia nene tai apostel.

¹¹ Tapoi kele tiboiet si ta galai le raaddeake nene tai apostel, ta matonem bagada ka tiboietda tainanalep.

¹² Tapoi si petrus geti, suru nia, ei nia ka ratei. Kele ailoggouake ka baga, ta anai apa pa bage aiitco sarat komang tabut le. Tenan le kisei ka bagania, lepa toili nia ka bagat reureu baga masipaatu sibabara nene.

Rua sipasiului sieei ka laggai Emmaus

¹³ Ka gogoi nenda et ai rua sipasiului sieei ka laggai Emmaus, pulu sara kilometer reunannia ka Jerusalem.

¹⁴ Ai sia mueenung, palaiboakerangan sangamberi sibabara nene.

¹⁵ Ai sia patitibo, paise ruada, lotsit Jesus itagetnake, sia, paenungakenangan sia.

¹⁶ Tapoi amaramun le matada bui raagai nia.

¹⁷ Kuanangan ka matada Jesus, “Aponia nupalalaiboake kam aimueenung?” Rio sia ka reureu bagada.

¹⁸ Aleginangan nia sara sipuoni si Kleopas, “Saram le pa tairauma sikuddu ka Jerusalem, taiagai sibabara sedda ka gogoi simaruei?”

¹⁹ Kuanangan Jesus, “Aponia?” Kuarangan ka matania, “Ne, pagalaiat Jesus tai Natsaret, nabi simagege galajet samba titiboat ka matat Taikamanua samba ka matat sirimanua.

²⁰ Ranganduake nia tai imam sabeu samba tai bajamai, raukum nia simateiakenen samba rasiliktengaake nia.

²¹ Amaroan bedda bagamai, nia le sipasibebelaake tai Israel. Gogoi nene ia te gogoi sikatelu lepat sibabara nenda.

²² Ia geti ai leu piga pa tainanalep saaleimai sibaraake minca kisei bagamai. Mamancep pei le ameian sia ka ratei,

²³ tapoi ta arasese tubunia. Lepa toili sia kuarangan araitco samalaika sipasikukua amurimanuangan nia.

²⁴ Ai leu piga pa saaleimai sieei ka ratei, ailiringan bulatnia siniboira tainanalep, tapoi Jesus ta araitco.”

²⁵ Lepa kuanangan ka matada Jesus, “Pate taiagaimui paatuat! Pate besi nukatonemi kam sangamberi siniboira tai nabi!

²⁶ Ta ioorik le boiki sangamberinia Kristus, ia pei ituguru ka pulatsanannia?”

²⁷ Taddaakenangan Jesus ikolouake ka matada sangamberi siniboi ka Surat Sipunenan pagalaiat tubunia, barania ka bukot Mose aili ka bukoda tai nabi.

²⁸ Kele aramalegere ka laggai ailiakenenda, pakaunangan tubunia Jesus iriuriuake puenunganannia.

²⁹ Tapoi arakera le nia, kuarangan, “Ba kakaddiuake kai, amasoiboan, bebelean le sulu.” Tutnangan sia Jesus mei mugogoi sambada.

³⁰ Ai sia mukukuddu sambada, alanangan roti Jesus, sukatnakenangan nia, paabbonangan nia, kaunangan nia ka sia.

³¹ Tubukanangan leu matada, agairangan nia, lepa agounangan nia ka matada.

³² Kuarangan samba ikolouake Surat Sipunenan ka sita, ia leu?”

³³ Ka jam nenda leu et suru sia, soksokrangan minca ka Jerusalem. Sege sia sedda aian sipasiului sipulusara ai sia parururu sangamberida.

³⁴ Kuarangan sipasiului, “Bulatnia atusurungan si Tuhan, aipatoilaan tubunia kai Simon.”

³⁵ Lepa nunuakerangan sirua sipasiului nene sibabara ka enungan, samba kipa galai araagai nia ka teteret aipaabbo roti.

Ipatoila tubunia Jesus ka sangamberi sipasiuluinia

³⁶ Airatitiboi nene, tulut rio Jesus ka talagada, kuanangan ka matada, “Aban ka kam!”

³⁷ Tugegerangan pagalu loto, ka bagada poi sanitu le araitco.

³⁸ Kuanangan ka matada Jesus, “Tugegege koi kam, samba makakarat koi bagamui?

³⁹ Itco kam kabeiku samba rereku. Aku le nene! Rape pei kam tubuku samba lelekngake kam, aipoi sanitu ta anai akkulania samba tolatnia, kele siitcomui ka tubuku.”

⁴⁰ Aikukua nene, paitconangan kabeinia samba rerenia ka matada.

⁴¹ Kele tapei matotonem bagada kalulut angkat bagada samba kisei ka bagada, kuanangan ka matada, “Ai ka kam se goiso kan?

⁴² Lepa kaurangan sangapaggalaiba sigoreng.

⁴³ Alanangan nia, komnangan nia ka matada.

⁴⁴ Ia geti kuanangan ka matada Jesus, “Ia te ne tiboiet siniboiku ka matamui enan pei le aku ka bebemui: sangamberi sitususurat ka bukot Mose samba bukoda tai nabi samba buko Psalmen pagalaiat tubuku, buita muaili.”

⁴⁵ Lepa bukaakenangan paatuatda Jesus bule raagai katukolobat Surat Sipunenan.

⁴⁶ Kuanangan ka matada, “Ka Surat Sipunenan atusuratnakean: Buita masiorik le Kristus, samba ka gogoi sikatelunia suru nia minca.

⁴⁷ Ia leu et ka oninia tupaarep pagalaiat katubaugat paatuat samba katuappekat jo ka sangamberi bangsa, tutaddaake barania ka Jerusalem.

⁴⁸ Kam te sipasimumuneng sangamberinia nene.

⁴⁹ Ai leu kukoiniake ka kam sinibalaakenen Ukkuiku. Tapoi buita nungena kam se ka Jerusalem, teret tusegeake ka kam gege sibara ka pata.”

Katusakaiat Jesus ka sorga

⁵⁰ Lepa ambitnangan sia Jesus bela ka Betania. Sege sia sedda totoiakenangan kabeinia isukatnake sia.

⁵¹ Aisusukatnake sia, pasararangan, tuakkatnangan ka sorga.

⁵² Purapporangan ka matania, lepa toili sia ka Jerusalem ka angkat baga.

⁵³ Sarat ka Uman Taikamanua le sia masiumun Taikamanua.