Luk. 22 - BUKO SIPUNENAN

Isiat masimateiake Jesus

¹ Punen Roti Sitasioman sipuoni paska amalegerengan.

² Gabarangan enungan tai imam sabeu samba siagaisurat, kipa ragagali ramateiake Jesus, aipoi maloto sia ka sirimanua simigi.

Ipajo Jesus si Judas

³ ia geti guru sanitu ka paatuat Judas sipuoni leu Iskariot, sara ka talagat sipasiului sipulurua.

⁴ Einangan leu si Judas patibo ka tai imam sabeu samba ka sautera sipasijajago Uman Taikamanua kipa igagalai isegeake Jesus ka sia.

⁵ Maangkanangan bagada, pakerenangan bagada masikau bulagat ka tubunia.

⁶ Ooakenangan nia si Judas, gabanangan leu tetere sipasesese isegeake Jesus ka tubuda, taiaagaietda sirimanua simig.

Panarengan Pukoman Paska

⁷ Ia geti ailinangan gogoi Punen roti Sitasioman, ia te gogoi panajakat biribiri Paska.

⁸ Koiniakenangan Jesussi Petrus samba si Johanes, kuanangan, “kenan kam nutarekngake kam komen Paska, takom nia ka sita.”

⁹ Kuarangan ka matania, “Kaipa siobanu kutatarekngake kai nia?”

¹⁰ Kuanangan ka mtada Jesus, “Guru kam ka kota, ai leu nupaseseake kam sara sirimanua siambit sangalalaisu oinan. Tut kam nia ka lalep katugurukatnia,

¹¹ ia geti kuamuian ka sibakkat lalep; Ainounou si Guru, ‘Kaipa le kudduatmai sipasiuluiku mukom komen Paska?’

¹² Paitconangan leu ka kam sara bilik ka pata, simalio, amatarekngan uddenan, sedda te nupatatarek kam sangamberinia.”

¹³ Ei sia, seserangan leu kele siniboi Jesus ka matada. Tarekngakerangan leu komen Paska.

Patonekat Pukoman Sipunenan

¹⁴ Kele aiaili jam pukoman, puuddetnangan Jesus sambada tai apostelnia mukom.

¹⁵ Kuanangan ka matada, “Bulat akubesiakean mukom Paska nene sambamui kei kuorik paoreat.

¹⁶ Aipoi kukua nia ka matamui: Taan kukokom minca nene teret itugalaiake simasun ka Purimataat taikamanua.”

¹⁷ Lepa alanangan pulokat Jesus, kuanangan sura, kuanangan, “Ala kam nene, parubei kam ka sangamberimui.

¹⁸ Aipoi kukua nia ka matamui: taan kulolo anggur nene teret ibara Purimataat Taikamanua.”

¹⁹ Ia geti alanangan roti, kuanangan sura, paabbonangan nia, kaunangan nia ka sia, kuanangan, “Tubuku te nene, sinegeakenen lulumui; galai kam nene pasirerepdepmui aku.”

²⁰ Kisedda leu et alanangan pulokat lepat koman kuanangan, “Pulokat nene pakerekat baga sibau ka logauku te, sipiliakenen lulumui.

²¹ Tapoi itco kam, kabei sirimanua sipajo aku, aian nia sambaku sene ka meja nene!

²² Togatsirimanua geti kirenangan mamatei nia siripot siteuakenen Taikamanua, tapoi paan te ka sia sipajo nia!”

²³ Taddaakerangan paise pasasambada, kasei pa ka talagada sigalaiake nene.

Pajoggolat pagalaiat kasei siabeu

²⁴ Ia geti bara pajoggolatda sipasiului rapaukeli kasei le ka talagada siabeu.

²⁵ Kuanangan ka matada Jesus, “Tai rimata ka polak masipaneinei rakyatda le sia, samba sia simagege raoniake ‘sisakkeri tai rakyat’.

²⁶ Ka kam geti bui kisedda; bailoknia le, siabeu ka kam, kau le kele sule, sipaneinei kam, kau le kele pagugulet.

²⁷ Kasei poi siabeu: sipuuddet mukom, ele sipasitatarek? Ta pa sipuuddet mukom le? Tapoi aku kaku kele pagugulet le ka talagamui.

²⁸ Ka bagat sangamberi pugejaat bagaku mariuriu le kam sangamberimui ka bebeku.

²⁹ Ai leu kusegeake ka kam purimataat kele isegeake nia kaku Ukkuiku.

³⁰ Pukomtangan samba pulotangan sambata ka Purimataatku, ia geti puuddetmuian ka uddenan purimataat masiukum sipulurua muntogat bangsa Israel.”

Ipoiliat Jesus pagalaiat pakekelena nia si Petrus

³¹ “Simon, Simon, arepmake! Ai te ibebesiake Sanitu isatsat kam, kele bera.

³² Tapoi akutiddouakean ekeu, bui itata tonem bagam. Samba ke aioleian bagam, kau nusopo sasarainam.”

³³ Kuanangan si petrus, “Tuhan, matarek le aku masipaalei ekeu ka bagat penjara ele matei.”

³⁴ Kuanangan ka matania Jesus, “Kukua nia ka matam Petrus, tapei mutotokki gougou gogoi nene, anupakelengan aku telu ngaminca.”

Bulagat, suppit ele lanjau

³⁵ Lepa kuanangan ka matada Jesus, “ka teteret akukoiniake kam si ta bulagat, balut ele kasu, ai pa simagulai ka kam?” Alegirangan, “Ta anai.”

³⁶ Kuanangan Jesus, “Tapoi kineneiget, kasei sibara lompe kau iambit nia; kisedda leu sibara balut, samba kasei ta anai lanjau, kau isakiake leppeinia isaki sara lanjau.

³⁷ Aipoi kukua nia ka matamui, sitususurat, ka Surat Sipunenan kisa, ‘Raaddeaka le nia kele sirimanua sijo,’ buita muaili ka tubuku. Sangamberi sitususurat pagalaiat tubuku poi amuailingan kineneiget.”

³⁸ Kuarangan sipasiului, “Tuhan, aian se rua lanjau.” “Paan leu!” ngangan Jesus.

Jesus ka mone Getsemane

³⁹ ia geti bela Jesus, ei nia ka leleu Tula kele simareirei, tutrangan nia sipasiuluinia.

⁴⁰ Sege sia sedda kuanangan ka matada, “Panindou kam, bui iorak kam pasisiboat.”

⁴¹ Areuakenangan tubunia goiso ka tubuda, siaili tubaijuk reugatnia, purekkuknangan manindou,

⁴² kuanangan, “Ukkui, ke momoi bai nia, sabauake le pulokat pangoringan nene ka tubuku. Tapoi bui ka teu bagaku, ka teu bagam le.”

⁴³ Ia geti oi sara malaika sibara ka sorga masisopo nia.

⁴⁴ Aipalalabaake kamateiat Jesus, panindounangan simakope. Attinangnia kele logau ipubaibai ka polak.

⁴⁵ Lepa aipanindou, suru nia, ei nia ka sipasiuluinia, ailinangan sia ai sia memerep, reureu bagada.

⁴⁶ Kuanangan ka matada, “Memerep koi kam? Suru kam manindou, bui iorak kam pasisiboat.”

Katulabakat Jesus

⁴⁷ Ai pei maninibo Jesus, oi sangarurukat sirimanua, ai si Judas, sara ka sipulurua musumbulat ka matada. Tagetnakenangan Jesus isigguk nia.

⁴⁸ Kuanangan ka matania Jesus, “Judas, pasiggungan le nukau masipajo Togatsirimanua?”

⁴⁹ Kele araitco sibabara nene sipasiuluinia sikudu sedda, kuarangan, “Tuhan, kuteteakean le kai lanjau?”

⁵⁰ Oi sara ka talagada, seppirinangan talingan sikattoet pagugulet imam sabeu.

⁵¹ Kuanangan Jesus, “Paan!” Rapenangan talingan pagugulet nenda, aleakenangan nia.

⁵² Kuanangan Jesus ka matada tai imam sabeu samba utera sipasijajago Uman Taikamanua samba tai bajara tai Jahudi siooi masilaba nia, “Sipananae pa aku ka bagamui nuooi kam sibara lanjau samba bobobo masilaba aku?

⁵³ Senen gogoi ai le aku ka talagamui ka Uman Taikamanua, ta anulaba kam aku. Tapoi ia te teteremui samba teteret geget pugepgeman.”

Ipakele Jesus si Petrus

⁵⁴ Lepa labarangan Jesus, taroakerangan nia ka lalep imam sabeu; ai leu si Petrus itut nia simareunan.

⁵⁵ Ka gerat lalep aian ararusui api; puuddetrangan sangamberida ka bebet api. Ei leu si Petrus ka sia puuddetnangan ka talagada.

⁵⁶ Kele aiitco nia sara pagugulet sinanalep ai nia mukukuddu ka bebet api, kinerenangan nia, kuanangan, “Sinene leu et aleinia.”

⁵⁷ Tapoi aipakele le si Petrus, kuanangan, “Ta, ta kuagai nia!”

⁵⁸ Ta amauju, ai minca sabagei masiitco nia, kuanangan, “Ekeu leu aleira leu et.” Kuanangan si Petrus, “Ta aku ale!”

⁵⁹ Ai pa sangajam ujunia, ai sara minca sipasikukua bulat simaron, “Buladhia, sinene leu aleinia leu et, aipoi tai Galilea leu et nia!”

⁶⁰ Kuanangan si Petrus, “Ta kuagai sikuam ale!” Ai pei le nia maninibo, putokkinangan gougou.

⁶¹ Beliuakenangan tubunia si Tuhan imattai si Petrus. Repdepnangan leu tiboiet Tuhan si petrus sikuania ka matania kise, “Tapei mutotokki gougou gogoi nene anupakelengan againu aku telu ngaminca.”

⁶² Belanangan leu ka gerat si Petrus, pusounangan sikuansikuan.

Rapaguileake samba rapaboboki Jesus

⁶³ Ia geti paguileakerangan Jesus sia sipasiuukkaake nia, pabobokirangan nia.

⁶⁴ Tabborangan matania, nounourangan nia, “Poiliat pei kasei sibobo ekeu?”

⁶⁵ Maigi pei le paloloiat rakua ka matania.

Jesus ka matat Rapat Sabeu

⁶⁶ Kele aimapato, parururangan tai bajara tai Jahudi, tai imam sabeu samba siagaisurat, taroakerangan Jesus ka matat rapatda.

⁶⁷ Kuarangan ka matania, “Ke Kristus bai ekeu, kua le ka matamai.” Kuanangan ka matada Jesus, “kenanen kukua ka matamui, ia leu et ta matotonem bagamui.

⁶⁸ Samba ke kunounou bai kam, ta leu et nuaalegi kam.

⁶⁹ Barania kineneiget muuddetnan te Togatsirimanua kai kattoet Taikamanua Sipulugege.”

⁷⁰ Kuarangan sangamberida, “Oto Togat taikamanua le ekeu?” aleginangan nia Jesus, “Kele sikuamui, ia tedda.”

⁷¹ Kuarangan, “Apananta pei le sipasimumuneng? Tubutangan poi amasiarep sibara ka ngangania!”