Luk. 21 - BUKO SIPUNENAN

Panguruat sinanalep silumang simageba

¹ Kele ailoggouake matania Jesus, itconangan sia simakayo rabulukngake panguruatda ka bagat petit bulagat panguruat.

² Iitco leu sara sinanalep silumang simageba masibulukngake rua rimis ka bagat peti nenda.

³ Kuanangan Jesus, “Kukua nia ka matamui, sibulukngakenen sinanalep silumang simageba nene pei le maigi ka sibulukngakenenda sabagei.

⁴ Aipoi sangamberida sibara ka legei pukayoatda le arakau panguruatda, tapoi silumang nene geti ka gebania le aikau, ia te sangamberi purimanuaiatnia.”

Ipoiliat Jesus pagalaiat kararagat Uman Taikamanua

⁵ Ai piga pa sia sipasititiboi pagalaiat Uman Taikamanua kopet laingenia kalulut pabukkubukku simalatsat samba panguruat sikaura sirimanua. Kuanangan Jesus,

⁶ “Babara te gogoinia, sangamberi siitcomui nene, beri sara bukku sipalalakke mulelegei, sangamberinia le turaragatnake.”

Gejat baga samba paoreat

⁷ Lepa nounourangan Jesus sipasiuluinia, “Guru pigamoi ibabara nene? Samba aponia katuaggaiatnia kei bara nene?”

⁸ Kuanangan Jesus, “Pagaba kam, bui rapepeake kam. Maigi poi siooi geti masipuoni oningku, kuarangan, “Aku te nia! samba ‘Aiailingan teterenia.’ Bui nutut kam sia.

⁹ Bara nuarep kam katuareman pasaggangan samba pulamagat, bui nutugege kam. Aipoi ta moi ta ibara boiki sangamberinia nene, tapoi tapei ia ne kalepakat polak.”

¹⁰ Lepa kuanangan minca ka matada, “Tususuru le geti bangsa sara masisaggangi bangsa bagei samba purimataat sara masisaggangi purimataat bagei.

¹¹ Babara te geti ngeungeu polak simaron samba kaipa kaipa bara pulajeat samba sorobut laggai. Bara leu kalotoakenen samba kiseiakenen ka manua.

¹² Tapoi kei bara sangamberi nene ralalaba samba rapaooreji re kam; segeakerangan leu kam ka uma parurukat samba ka penjara; pagiritrangan kam ka matada tai rimata samba sipasiukum kalulut oningku.

¹³ Ka bagat nene te ibailiu kam simunengake aku.

¹⁴ Oto siddoni kam ka bagamui, bui imakarat bagamui pagalaiat tiboakenenmui.

¹⁵ Ai leu kuake nia ka kam tiboiet samba sikut paatuat, bui ioi raalegi kam saggakmui ele rasakkala sikuamui.

¹⁶ Samba tubut eppumui leu inganganduake kam, sasarainamui, simalegere ka tubumui, sasuruakmui; samba piga pa ka talagamui ramateiake.

¹⁷ Sangamberi sirimanua malaga baga ka tubumui kalulut oningku.

¹⁸ Tapoi beri sangantaili alaimui ta malilimai.

¹⁹ Ke nuomake kam nia, ta isosoppi nupurimanua kam.”

Pagalaiat katukataikat Jerusalem

²⁰ “oto ke nuitco kam ragoilik Jerusalem tai saladdu, agaimuian amalegerengan te katukataikatnia.

²¹ Ka teterenia nenda kasei sikuddu ka Judea, kau ratuitui raei ka leleu; sikuddu ka bagat kota kau rabela, samba sikuddu ka mone, bui ratoili ka laggai.

²² Gogoi pasilumunan poi gogoi nenda, bule ipuaili sangamberi sinuratnakenen ka Surat Sipunenan.

²³ Katainangan te ka saina sibara suruket samba sipasitotottoni toga ka gogoi nenda. Babara poi paoreat sabeu ka laggai nene, samba ukuman Taikamanua ka bangsa nene.

²⁴ Ai simamatei ka son lanjau, sabagei rambit sia bangsa bagei orejetda; samba Jerusalem rapaperaki sipuarat sabulungan, teret sappuru tetere sinetereakenen ka sia.”

Kaoijanan Togatsirimanua

²⁵ “Lepa geti bara patuaggaiat ka matat sulu, ka laggo samba ka panyanyat. Malotorangan sirimanua ka polak nene, paingonangan sia raarep ipuukku samba ipujaa koat.

²⁶ Pakaddonangan sirimanua lotora rangenaake apa sibabara ka sangalio polak nene, mangeungeu poi ron manua.

²⁷ Ka teterenia nenda itcorangan Togatsirimanua ioi ka tanairusa ka gege samba pulatsanan sabeu.

²⁸ Ke aitaddaakean sangamberinia nene, rioake kam tubumui, teilaake kam matamui, amalegerengan poi puaragatmui.”

Masialaki nganturat ka sileu

²⁹ “Lepa tiboinangan Jesus ka matada pasikat: Itco le kam loinat sileu ele loina bagei.

³⁰ Ke nuitco kam amusinulangan, agaimuian amalegerengan te legeu manua.

³¹ Kisedda leu te ke nuitco kam ibara sangamberinia nene, agaimuian amalegerengan te Purimataat Taikamanua.

³² Kukua nia ka matamui: tapei tatata reddenan nene puailinangan sangamberinia nene.

³³ Manua samba polak tatata le, tivoietku geti ta tatata buru.”

Kau mariuriu mumata

³⁴ “Pagaba kam tubumui, bui nututuri kam pukokom samba pulolo simapuinengen, samba masipaatu purimanuaiat polak, bui sinulut ioi gogoi Tuhan ka kam.

³⁵ Kele jalo le poi ioi gogoi ka sangamberi sirimanua ka polak nene.

³⁶ Oto kau imariuriu nupumata samba nupanindou kam, ioi nukatsiliake kam sangamberi sibabara geti, samba ioi nupurio kam ka matat Togatsirimanua.”

³⁷ Sinago, Jesus mungantoman ka Uman Taikamnua, sinoibo geti ei nia ka leleu Tula mugogoi.

³⁸ Senen simancep oi sia sirimanua simigi ka matania ka Uman Taikamanua masiarep ngantomannia.