Luk. 20 - BUKO SIPUNENAN

Panounogat pagalaiat geget Tuhan Jesus

¹ Ka sara gogoi aipangangantoman sirimanua simigi Jesus ka Uman Taikamanua samba masipaarep Katuareman Simaeru, oi ka matania tai imam sabeu samba siagaisurat samba tai bajara tai Jahudi,

² kuarangan ka matat Jesus, “Kua pei ka matamai, ka geget apa nugalai nene? Kasei amasiake gege nene kekeu?”

³ Kuanangan Jesus ialegi sia, “Kaku leu koba kunounou kam sara panounogat. Kua pei kam ka mataku,

⁴ pasiraukat Johannes nenda, sibara ka Taikamanua ele sibara ka sirimanua?”

⁵ Ia geti patuptuprangan nia pasasambada kuarangan, “Ke takua bai sibara ka Taikamanua, kuanangan te ka matata, ‘Oto angoi ta matonem bagamui ka tubunia?’

⁶ Tapoi ke takua, ‘Sibara ka sirimanua,’ pabaijungirangan sita bukku sirimanua simigi, matonem poi bagada sangamberida nabi le si Johannes.”

⁷ Alegirangan nia, “Ta kuagai kai kabaraiatnia.”

⁸ Kuanangan ka matada Jesus, “Oto kaku leu ta kukukua ka matamui, kasei ka gege kugalai nene.”

Pasikat sipugagalai ka monen anggur

⁹ Ia geti taddaakenangan Jesus itiboi ka matada sirimanua simigi pasikat nene, “Ai sara sirimanua sigalai monen anggur. Lepa sewaakenangan nia ka sipugagalai mone, pasat ei nia ka sara laggai mukuddu simaburu.

¹⁰ Kele aiaili teteret pasimoneiat, koiniakenangan sara paguguletnia ka sipuuku mone, bule rakau ka sia rubeiatnia. Tapoi arabobo le nia sipuuku mone, tuituiakerangan nia si ta ambinen.

¹¹ Lepa koiniakenangan minca paguguletnia bagei, tapoi rabobo leu et nia samba rapaloloi nia, tuituiakerangan nia si ta ambinen.

¹² Lepa koiniakenangan minca paguguletnia sikatelunia, tapoi ramaujuki le nia, ribbaiakerangan nia ka bebet mone.

¹³ Ia geti kuanangan si tuan sibakkat monen anggur, ‘Kipangan le pa kugagalai? Togakungan le kilibet bagaku kukokoiniake; metnangan rakagilaake nia.’

¹⁴ Tapoi kele araitco toga nenda sipuuku mone, patiborangan pasasambada kuarangan, ‘Ia te ne sipasiikep, sita kam tamateiake nia, bule sitangan le masibabakkati ikepmakenennia.’

¹⁵ Ribbaiakerangan nia ka bebet mone, mateiakerangan nia. Oto kipa igagalai si tuan sibakkat mone ka tubuda?

¹⁶ Ta isosoppi ioi masimateiake sipuuku mone nenda, ia geti kaunangan monen anggur ka sabagei.” Kele araarep nia kuarangan, “Bui ibara nene!”

¹⁷ Kinerenangan sia Jesus kuanangan, “Oto apa katukolobatnia ruang ka Surat Sipunenan nene, ‘Bukku siribbaiakenenda tai tukang, aibailiuan bukku bongan inan arigi.’

¹⁸ Kasei sibebele ka bukku nenda, ta isosoppi imabubu tubunia; samba kasei isaksak bukku nenda iaanau le nia.”

¹⁹ Ia geti gelerangan siagaisurat samba tai imam sabeu masilaba Jesus ka jam nenda leu et, raagai poi sia le isasailu ka pasikat nene, tapoi maloto le sia ka sirimanua simigi.

Pagailaiat masikau juran kai Kaisar

²⁰ Ia geti taikorangan nia siagaisurat samba tai imam sabeu. Koiniakerangan sipatataju rapakau tubuda kele simatopit, bule ioi rajoake Jesus ka tiboietnia, ibara lulunia ranganduake nia kai gubernur sibara gege samba sipasiukum.

²¹ Nounourangan nia kuarangan, “Guru, kuagai kai maroipo le tiboietnu samba ngantomannu samba ta nurarasei sirimanua, simaroipo le nugelaiake enungan Taikamanua.

²² Kipa, pasesese leu tukau juran kai Kaisar, ele ta?”

²³ Iagai le poi pajoatda Jesus, kuanangan ka matada,

²⁴ “Paitco pei kam kaku sara bulagat perak; kasei tularat samba kasei oni ka bulagat nene?” Kuarangan, “Kai kaisar.”

²⁵ Kuanangan ka matada Jesus, “Oto kau kam kai Kaisar bakkat Kaisar, ka Taikamanua bakkat Taikamanua.”

²⁶ Ta amoi arajoake nia kat tiboietnia ka matat sirimanua simigi. Tenan sia meng kisei ka bagada raarep aialegi nia.

Panounogat pagalaiat katusuruat simamatei

²⁷ Ai piga tai Saduse amoi ka matat Jesus. Tai saduse ia te sitaikatonemi katususurut simamatei. Iserangan nia,

²⁸ “Guru aisuratnakean ka sita si Mose: Ke matei sara simanteu ikaddiuake sinanalepnia tapei anai togania, buita italimouake sinanalepnia sarainania, ibaraake tuppai tubut sarainania sitatata.

²⁹ Ai pitu sia sipusasaraina. Pukebbukatnangan sikebbbukat, lepa matei nia ta anai togania.

³⁰ Lepa talimouakenangan sinanalep nenda sarainania sikaruania,

³¹ lepa sikatelu, kisedda te sangamberida pituda, matei sia ta anai togada.

³² Kalepakatnia, matei leu ka sia sinanalep.

³³ Oto ka teteret katusuruatda simamatei, kasei ka talagada masibabakkati sinanalep nenda? Aipoi sangamberidangan aipusinanalepmake nia.”

³⁴ Aleginangan nia Jesus, “Tatogada taikapolak nene le mutatalimou samba tutalimouake, “tapoi simateu masiikepmake purimanuaiat ka gogoi sialu samba ka katusuruat simamatei, ta mukekebbukat samba ta tukekebbukatnake sia.

³⁶ Aipoi taan mamatei sia, kele samalaikangan le sia; tatogat Taikamanuangan le sia, atusuruakean poi sia ka simamatei.

³⁷ Pagalaiat katusuruatda simamatei aitiboian leu si Mose ka ruang pagalaiat rui sipujujuluu, sedda aioniake si Tuhan, Taikamanuan Abraham, Taikamanuan Isak samba Taikamanuan Jakob.

³⁸ Ta Taikamanuanda simamatei Taikamanua, Taikamanuanda le sipuririmanua; aipoi sangamberida murimanua ka tubunia.”

³⁹ Kuarangan piga pa siagaisurat ka matania, “Guru, bulat maeru alegim.”

⁴⁰ Kalulut nene taan maeme sia masiise apa pa ka tubut Jesus.”

Pagalaiat Mesias sinibalaakenen

⁴¹ Kuanangan ka matada Jesus, “Kipa galainia raooniake Kristus, togat David?

⁴² Aipoi beri si David masikua ka buko Psalmen, ‘Aikua si Tuhan ka matat Tuhanku: Uddetnake ekeu isit kai kattoetku,

⁴³ teret kukau saggaknu bailiu kalak rerem.’

⁴⁴ Oto ke ‘ituhan’ nia si David, kipa galainia ‘itotoga’ nia?”

Nganturat masijago tubu ka tubuda siagaisurat

⁴⁵ Airaarep sirimanua simigi ipanibo Jesus, kuanangan ka matada sipasiuluinia,

⁴⁶ “Jago kam tubumui ka siagaisurat, sioba mugejek muleppei simananta, samba raoba raroroi sia sirimanua ka pasakiat. Raoba muuddet ka uddenan siboiki ka uma parurukat samba uddenan sabeu tiboi tubu ka punen pasiraumaat.

⁴⁷ Rarudogat masilabbu kataira, masane le geti ukumanda.”